Isaya 44 - KITAWO MALEŊ Catholic

Silwany pa Were kwoŋ Isiraili

¹ T'onyo pama winji, awi Yakobo ŋeca paran, Isiraili m'atieko yero!

² Rwoth m'ocweyin waco ama, go m'otimin i ici aka lakonyin. Ikir'ilwor, awi Yakobo ŋeca paran, Yesurun m'atieko yero.

³ Kole alakonjo pi i piny m'othwo, gi waŋ pi i lowo m'othwo, alakonjo cuny paran kwoŋ nyikwayin, gi silwany paran kwoŋ nyithindho perin.

⁴ Jolakitula paka lum i dier pi, paka osege i thengi pi ma mol.

⁵ Me lawaco ni, “Abedo apa Rwoth.” Man lalwoŋere gi nyingi Yakobo, aka man landiko i cinge ni, “Apa Rwoth.” Go lalwoŋere gi nyingi Isiraili.

⁶ Rwoth, Kere pa Isiraili waco, Jaboth pere, Rwoth pa lwak jolweny ni “Abedo marapena aka macowe, aka ongoye were man kwanyowoko an.

⁷ Ŋa ma cal an? Weyi go wotuci, weyi go wowodhi kamaler to jengo ruwaŋan. Ŋa m'otieko tuco wok cene gigipiny ma labino? Weyi go wowaci riwan gima fodi labino.

⁸ Wikiri wikirin, kosa wibwok, fodi akiwaco riwin wok cene t'awodho kamaler? Wibedo jokony paran! Nitie were man je kwanyowoko an? Ongoye tele man, ongoye m'aŋeyo.”

Miŋo ma lamo cal

⁹ Jono ma jotimo cal makicar jongoye kony, aka gigipiny ma joyodere gine ongoye magowa; jokony pajo jokinen kendo jokuya, ni inyalo ketho jo i wickwot.

¹⁰ Ŋa won m'oyido nyalo timo were kosa timo cal ma dimagowa ma nono?

¹¹ Neni, joma jomakere gine je ilaketho jo i wickwot, jopac ma jobedo ji a jiya. Weyi joje jowocokere, weyi jowoay malo. Jolakirin, ilaketho jo i wickwot kanyacel.

¹² Jathedhi nyweny kwanyo nyweny to ketho i wi mac. Bade ma meni tiŋo nyundu ma ŋinyo nyweny. Ka go tiyo, kec gi riyo neko to meni loyo to lacere.

¹³ Japac cero bol, ketho ranyuth gi kalam, gori gi gigoro, ketho ranyuth gi lew cuma, timo i cal makicar pa dhano, gi ŋono pa dhano, to ketho i ot.

¹⁴ Go toŋo yath sida kosa yero yath lwiyo kosa olwa to weyo dongo matek i dier lul. Go pidho yath sida to koth dongo.

¹⁵ Kenyo inyalo oro paka yen ma tedo. Adec mere go kwanyo to oyo, go moko mac to tedo mugat. Bende go timo were to lamo, payo cal were m'ogor to riewere piny rigo.

¹⁶ Adec man go waŋo i mac, i wi adec me, go bul'iye riŋo, camo to yeŋ. Go bende oyo mac to waco ni, “A, atieko bedo malieth, atieko oyo mac!”

¹⁷ M'odoŋ mere to go timo gine were, cal makicar pere, riere piny rigo to lamo go, go kwayo ka waco ni, “Bothan, kole ibedo were paran!”

¹⁸ Jokuya, jokiniaŋ; kole waŋ jo ocule, ŋey jokiri jowoneni, gi paro pajo je, ŋey jokiri jowoniaŋ.

¹⁹ Ongoye ŋata par, ongoye ŋeyo je kosa poko bero kwoŋ raco, ma waco ni, “Adec mere awaŋo i mac; atedo bende mugat i cuk mere, abulo riŋo t'acamo. Onyo anoloki m'odoŋ mere gir'amien? Anoriere piny ruwaŋ kidhur yen?”

²⁰ Go pidhere gi buru, cuny ma komo otieko rwayo go, aka kinyal botho kwo pere kosa waco ni, “Gima nitie i cingan maracuc me k'obedo gitwodo?”

Wiy jo k'owil gi Isiraili

²¹ Poyi gigipiny me, awi Yakobo, gi Isiraili, kole ibedo ŋeca paran; acweyin, ibedo ŋeca paran, awi Isiraili, wiyan kinyal wil kodin.

²² Atieko ywero woko reco perin paka pondeponde, gi reco mewin paka fumbi, dwoki bongan, kole atieko bothin.

²³ Wer, awi polo, kole Rwoth otieko timo, koki awi thutho ma piny; bar dwondin gi wer, awi gote, awi lul, gi kisi yath ma iye! Kole Rwoth otieko botho Yakobo, aka go lalimo dwoŋ i Isiraili.

²⁴ Rwoth, Jaboth perin waco ama, go m'ocweyin i ici. Abedo Rwoth, m'otimo gigipiny je, go kende m'orieyo polo, an m'awon ayaro piny,

²⁵ ma mieno amien pa jotwodo, gi ma miŋo jor'ajwoka; go ma dwoko cen jomariek, to loko ŋeyo pajo miŋo.

²⁶ Go ma ridho wac pa ŋeca pere, to ketho i kare gima ŋecin pere jowaco. Go ma waco kwoŋ Yerusalem ni, “Ilabed'iye.” Go waco kwoŋ tindin ma Yuda ni, “Ilageto jo kendo, aka alacewo gundin pajo.”

²⁷ Go ma waco ri pi maluth ni, “Thwo, alathwo woko malawin mewin.”

²⁸ Go ma waco ri Siras ni, “Jakwath paran, aka lamiyo atoŋa paran je wotundi i kare.” Go waco bende ri Yerusalem ni, “Ilageto go kendo.” To waco ri Ot pa Were ni, “Ilajengo misingi perin.”