Isaya 42 - KITAWO MALEŊ Catholic

Ŋeca pa Rwoth

¹ Neni ŋeca paran ee, m'athielo, dhano paran m'ayero, ma cunyan sangala gine, atieko ketho cuny paran kwoŋe, go lakelo tiro ri nonin.

² Go k'oywaki kosa otiŋ dwonde malo, kosa k'omiy wowinjere i yo.

³ Go k'otur kedi midole, aka k'oneki mac maliel ma nimnim; go lakelo tiro iy'adieri.

⁴ Go k'ojok kosa k'odwokere cen, cuka okeli tiro i piny, aka piny ma yuthengi nam kuro cik pere.

⁵ Me apaka Were, Rwoth waco, m'ocweyo polo to yaro jo woko, m'oyaro piny gi gima wok'iye, go ma miyo ji ma jobed'iye luya ma ywe, gi cuny ri jono ma jowoth'iye.

⁶ An Rwoth, atieko lwoŋin i tiro, atieko kwanyin gi cingan t'akurin, atieko miyin paka cikirok ri ji, gi lero ri nonin.

⁷ Ma yawo waŋ jo m'otho ma fudho jotwec ma jonitie i mudho, ma gonyo wok i katwec jono ma jonitie i colo.

⁸ An abedo Rwoth, meno nyingan; dwoŋ paran akimiy ŋatiman, kosa pak paran ri cal m'ogor.

⁹ Neni, gigipiny ma cango jotieko tundo i kare, aka onyo pama awodho kamaler gigipiny manyen, mafodi jok'otimere, awaco riwin kwoŋ jo.

Wer ma pak

¹⁰ Wer ri Rwoth wer manyen, pak pere wok i tum ma i piny! Weyi nam womor, kodi gima kwo i iye je, piny ma yuthengi nam gi ji ma jobed'iye je.

¹¹ Weyi thim gi tindin mere jowotiŋ dwondi jo malo, calin je ma jonitie i Keda; weyi ji ma jobedo Sela jowower gi kisangala, weyi jowohola wok wi gote malo.

¹² Weyi jowomiy Rwoth dwoŋ, to jowodho kamaler pak pere i piny ma yuthengi nam.

¹³ Rwoth telo paka siragama, paka dhano ma jalweny, go tugila nge pere, go ywak, go koko malo, go nyutho meni pere kwoŋ jokwor pere.

¹⁴ Ma hongo malac, atieko bedo liŋ, atieko bedo liŋ t'atwenyere, onyo pama alaywak paka dhako ma ŋedi ramo, alacole to ŋetan geŋ.

¹⁵ Alareyo gote gi tendere, t'athwo woko lum gi yen, alawiro malawin jowolokere kigodin ma pi, t'athwo woko kidiwin.

¹⁶ Alatelo ji ma waŋ jo otho, gi royo ma jokuya, g'iger ma fodi jokuya, alatelo jo. Alawiro mudho ma ruwaŋ jo wobedi lero, kabedo m'onyany onyany wobedi lowo m'obipere. Me a gigipiny m'alatimo, aka ak'ojwangi jo.

¹⁷ Ilawiro jo aŋey t'iketho jo i wickwot kicutho, jono ma jogeno cal makicar m'opay, ma jowaco ri cal makicar m'oleny ni, “Wibedo werin mawan.”

¹⁸ Winji win, win ma ithi win otho; gi win ma waŋ win otho, ŋiy win malo aka winen!

¹⁹ Ŋa ma waŋ'otho kwanyo woko ŋeca paran, kosa ma ithe otho paka jamikwenda paran m'adhiro? Ŋa ma waŋ'otho paka ŋat'atimo gine cikirok, kosa ma waŋ'otho paka ŋeca pa Rwoth?

²⁰ Go neno gigipiny kweth, to kikaŋasa; ithe oyawere, to kiwinji.

Cay pa Isiraili

²¹ Rwoth osangala ro timo gim'otire, ma tiŋo malo cik pere gi miyo dwoŋ.

²² To me a ji m'okwal jo t'inyaga jo, joje jomoko i buce, aka jopanere i katwec, jolokere gim'omoko m'ongoye jagony jo, gim'onyekere m'ongoye ŋat'owaci ni, “Dwoki i kare!”

²³ Ŋa kwoŋ win m'ocik ithe ri gime, ŋa m'okidhi rigo to winjo gime i hongo ma labino?

²⁴ Ŋa m'omiyo Yakobo ri janyeki, gi Isiraili ri jokwo? K'obedo Rwoth, ma watieko timo reco kwoŋe, k'obedo go ma jok'onyalo woth i royo pere, ma bende jok'onyalo kuro or pere?

²⁵ Ameno go okonjo kwoŋe lietho ma nge pere, gi keme ma lweny, omoko kwoŋe mac i thenge je, to go k'onyalo niaŋ, owaŋo go, to k'ofonjere kada gimoro.