Isaya 38 - KITAWO MALEŊ Catholic

Two pa Hezekia gi both pere

¹ I hongo no kere Hezekia two omako aka obothi tho. Isaya jatuci wac Were wod Amoz obino bonge to waco rigo ni, “Me apaka Rwoth waco: ‘Kethi gigipiny je i kare, kole ikilaboth, ibino tho.’”

² Kenyo Hezekia owire to ŋiyo kor ot aka okwayo ni,

³ “Awi Rwoth, mondo akwayin, poyi paka awotho ruwaŋin iy'adieri aka gi cunyan je. Atieko timo gim'otire ruwaŋin.” Kenyo Hezekia oywaki gi geregere.

⁴ Rwoth owaco ri Isaya ni,

⁵ “Giki bongi Hezekia jadhum pa ji paran iwaci rigo ni Rwoth, Were pa kwarin Daudi waco ni owinjo kwayo perin to neno pigi waŋin. Go lamedin oro apar g'abic man.

⁶ Go labotho tindi madwoŋ Yerusalem kwoŋ kere ma Asiria aka lamedo kikwonga tindi madwoŋ me.”

⁷ “Me ranyuth rin wok bongi Rwoth, ni Rwoth bino timo gima go ociko.

⁸ Neni, alamiyo tipo gik cen ma madala ma kere Ahaz ogeto dipar.” Ameno tipo owire gik cen ma madala dipar m'oyido.

⁹ Rumacen munyo Kere Hezekia otieko both kwoŋ two pere, ondiko wer ma pak me:

¹⁰ Oyido aparo ni i oro paran mabeyo, alakadho i piny pa jom'otho, ma kwo paran ongoye kendo.

¹¹ Awaco ni, akilaneno Rwoth kendo, i piny pa jomakwo. Akilaneno ji kendo, kwoŋ ji ma jokwo i piny.

¹² Kwo paran oyido oŋadi aka oromo, paka wema pa jakwath rombo, paka nanga m'oŋad wok i nyweny ma cuma kwoyirok. Oyido aparo ni Were okelo kwo paran i gike.

¹³ Wor gipi aywak i litho, paŋini simbwor oyido turo cokin paran. Oyido aparo ni Were okelo kwo paran i gike.

¹⁴ Dwondan oyido thin aka nyap, aka aywak paka akuro. Waŋan jool gi ŋiyo polo. Awi Rwoth, odiyan, bedi jakur paran!

¹⁵ T'anowaci aŋo? Kole go otieko luwo kodan, aka go won am'otimo gime. Nindo paran je orwenyo, ro keco mar'adundo paran.

¹⁶ Awi Rwoth, gi gigipiny me ji jokwo, aka i gime je ama cunyan kwo i iye. Awi, dwokan akwo maber aka miyan akwo!

¹⁷ Neni, obedo ro bero paran won, ama abedo gi keco madwoŋ, t'idwoko kwo paran wok i bur ma rerok, rupiri ibolo reco paran je yuŋeyan.

¹⁸ Kole piny pa jom'otho kinyal foyin, tho kinyal pakin, kole jono ma jokadho piny i bur jokinyal geno adieri perin.

¹⁹ Jomakwo, jomakwo, jofoyin, paka atimo ndelo me, jonywol jomiyo nyithindho ŋeyo, adieri perin.

²⁰ Rwoth labothan, aka walatuko tongol ka wawero pak, ndelo ma kwo paran je, i Ot pa Rwoth.

²¹ Isaya oyido owaco ni, wonyadhi nyandere wokethi i bur pa Hezekia, ŋey wocangi.

²² Kere Hezekia openjo Isaya ni, “Aŋo ma nyutho ni abino kidho i Ot pa Rwoth?”