Isaya 34 - KITAWO MALEŊ Catholic

Were lamiyo jokwor pere gir'acula

¹ Core win cegin, awi nonin, wiwinji; cik ithi win, awi ji! Weyi piny gi cwec mere je jowowinji; piny gibe, gi gima bed'iye je.

² Rwoth omako nge gi piny je, gi jolweny pajo je. Othumo rijo banja ma rerok.

³ Ilabolo woko delkwoŋ jom'otho pajo, joriere kenyo m'otop aka maŋwe; gote lamol gi remo pajo.

⁴ Lwak ma polo je latop woko, aka pondeponde ladole paka kitawo. Jolweny pajo jolathwo, paka boke yath thwo wi yath vini, kosa paka olemo thwo wi yath makuyu.

⁵ K'abor pa Rwoth otieko timo gima mito i polo, neni, laloro i Edom, kwoŋ ji m'atieko thumo rijo banja ma rerok.

⁶ Rwoth nitie g'abor, oduwere gi remo, omok'iye bor, gi remo pa nyithindhi rombo gi diegi, gi bor ma rogi wot rombo. Kole Rwoth nigi cowirok i Bozra, neki madwoŋ swa i piny ma Edom.

⁷ Mirikwa madudi jolapodho gi jo, mirikwa pajo gi thwondhe pajo. Lowo pajo laduwere gi remo pajo, aka lowo pajo latop gi bor pajo.

⁸ Kole Rwoth nigi ndelo ri Zayon, ma culo kwor kwoŋ jokwor pere.

⁹ Jwombe ma Edom lalokere kisawe mupira, aka lowo pere lalokere telin ma wodho mac kibiriti, aka piny gibe lalokere kisawe mupira maliel.

¹⁰ Kilatho wor g'odieceŋ, yiro mere laduny malo cil gi cil. Wok i luse tundo i luse ladoŋ gunda, aka ongoye ŋata laluw'iye kendo.

¹¹ To kinapupu gi katateŋ ama jolaloko peco pajo, tula g'agak jolabed'iye, Were lakelo i iye nywowirok, gi rerok kwoŋ jodhum mere.

¹² Ilalwoŋo ni ker m'ongoye, aka jodhum mere je jolangoye kony.

¹³ Kudhin latwi i muluwir gi tindin mere, aka ogwaŋe madudi gi nyar maya jolabedo kenyo.

¹⁴ Pusere madudi jolaromo g'ondiekere, jwogi diegi jolaywomere kenyo, g'ogwaŋe je ma jowotho wor.

¹⁵ Tula jolageto od jo kenyo, jolabuto to jotoŋo i tipo mere; otengo bende jolakiwura kenyo ma jacwo gi madhako.

¹⁶ Rangi aka wisoma gima wok i kitawo pa Rwoth; ongoye kwoŋ cwec me ma kilabedo, je jolabedo ma jacwo gi madhako. Kole dhok Rwoth otieko wodho or, aka cuny pere otieko coko jo.

¹⁷ Rwoth otieko miyo joje adec lowo pajo, go otieko baro rijo adec gi cinge, jolabed'iye luse gi luse, aka labedo apajo cil gi cil.