Isaya 33 - KITAWO MALEŊ Catholic

Kwayo ri kony

¹ Kidamba rin ijarey jo, in m'ongoye fodi ŋat'oreyin, in ijar'akor, m'ongoye fodi ŋat'otimo rin akor! Tekin icowo reyo woko, in bende ilareyin woko, tekin icowo timo akor, in bende ilatimo rin akor.

² Awi Rwoth, maki gi wan wor, wakurin. Bedi meni mawan kisi odikin, both mawan i hongo ma teko.

³ Nonin joringo, ro derino ma koko, kiay malo, nonin jokedhere woko.

⁴ Ocok gim'onyaga paka bonyo poto, paka tome bonyo ma por, ilapor kwoŋe.

⁵ Rwoth oŋawere, go bedo malo; go opoŋo Zayon gi tiro kodi timo gim'otire.

⁶ Go lakelo kwe piny i hongo perin, both ma gibe, rieko gi ŋeyo; aka lworo Rwoth obedo lim madwoŋ swa ri Zayon.

⁷ Winji win, jomiseni joywak i royo, jomikwenda mawan ma siem joywak tektek.

⁸ Royo odoŋ nono, jowoth joweyo royo. Cikirok otur woko, dhano ocayo tindin madongo, aka ongoye ŋata woro dhano.

⁹ Lowo thwo woko aka lacere, Lule ma Lebanon thwo woko, Saron cal thim, aka i Basan kodi Got Kamel boke oy woko.

Rwoth piro jokwor pere

¹⁰ Rwoth waco ni, “Onyo alaay malo, aka alatiŋere malo, onyo ilatiŋan malo.

¹¹ Tim mewin cal kanja kosa cuŋ, luya mewin obedo mac ma lareyo woko win.

¹² Ji je jolacale pa jowaŋ to jolokere buru, paka kudhin m'itoŋo t'iwaŋo gi mac.”

¹³ Winji, win ma winitie bor, gim'atieko timo, aka win ma winitie cegin, yey win meni paran.

¹⁴ Joreco i Zayon jobwok, ji ma bu Were jokirin. Jowaco ni, “Ŋa i dier wan manyalo bedo kanyacel gi mac ma reyo jo? Ŋa i dier wan manyalo bedo kanyacel gi mac makitho cil gi cil?”

¹⁵ Jono ma jotimo gim'otire, aka joluwo adieri, jono ma jocayo cwe ma kwo, jono ma joteŋo cingi jo jolo nyew, jono ma jokimiti winjo can ma oyo remo, aka jokimiti neno ni itimo gimarac.

¹⁶ Jolabedo i kabedo ma malo, aka jolapondo i tele, jolabedo gi cemo kodi pi ma romo.

Rwoth obedo Kere mawan

¹⁷ Waŋ win laneno kere i ŋono pere, wilaneno go dhumo lowo ma tundo bor swa.

¹⁸ Kenyo wilapenjere ni: Nikune jodhum no, ma jobwoko wan to joromo wan culo misolo mapek.

¹⁹ Wikilaneno jocay kendo, ji ma joluwo luwo ma wikinyal niaŋ, jodhombo dhodhok wikinyal niaŋ.

²⁰ Ŋiy Zayon, tindi madwoŋ ma timo kalima mawan m'oyik, waŋin laneno Yerusalem, kabedo m'oliŋ, wema ma kicore, ma loce mere k'ofudhi woko, aka thondhe mere kicoti.

²¹ To kenyo Rwoth labedo gi wan i dwoŋ pere, kenyo labedo malawin maluth gi jwombe malac, riato m'icewo gi mel madongo jok'ocewer'iye.

²² Kole Rwoth obedo jathum banja mawan, Rwoth obedo jadhum mawan; Rwoth obedo kere mawan, go labotho wan.

²³ Thondhe mewin olwogere, kinyal mako tiendi mel matek, kosa miyo mel wocewere. Ilapoko cemo m'onyaga, aka kiri jor'aŋolo je jolalimo.

²⁴ Ongoye ŋata bedo i lowo mawan ma latwo kendo, ji ma jobedo kenyo je ilacwako ri joreco pajo.