Isaya 3 - KITAWO MALEŊ Catholic

Nyawin i Yerusalem

¹ Kole neni, Rwoth, Rwoth pa lwak jolweny, kwanyo wok i Yerusalem gi Yuda, kony gi luth ma kwath, kony je ma cemo, gi kony je ma pi.

² Jacwo ma jameni gi jalweny, jathum banja gi jatuci wac Were, jathieth gi ŋat'otegino,

³ jatel ma piero abic, gi ŋat'iworo, jamic rieko gi jandijo ma timo gir'aura ma curcur, kodi jandijo ma kingirok.

⁴ Alaketho yac bedo jotel pajo, aka nyithindho joladhumo jo.

⁵ Ji jolabedo iy'adica, kisi dhano ladiyo nyawote, kisi dhano gi jager pere, soye lacayo jadwoŋ, aka ji ma bukony jokilaworo jodongo pajo.

⁶ Dhano lamako wat pere, wok i ot pa bamere, ka waco ni, “Inigi law, bedi jatel mawan, aka weyi kidhur gunda me wobedi i cingin.”

⁷ To ŋat'oyer laywak i ndelo no, ka waco ni “Akilabedo jaboth, kole i ot paran ongoye mugat kosa law, ikir'ikethan jatel pa ji.

⁸ Kole Yerusalem ocer, aka Yuda otieko opodho, kwoŋbedo luwo pajo gi tim pajo gwenyere kwoŋ Rwoth, geŋo neno madwoŋ pere.”

⁹ Ŋiyo ma nyim jo osa jo, jotimo reco kamaler paka Sodom, jokikan. Kidamba rijo! Kole jotieko kelo gimarac kwoŋ jo.

¹⁰ Waci ri ŋata timo gim'otire ni, lakadho maber gi jo, kole jolacamo ranyak ma tim pajo.

¹¹ Kidamba ri jakidakana, kole tim marac ma cinge am'ila timo rigo.

¹² Ji paran, nyithindho ama jodiyo jo, aka mon jodhumo jo. Awi ji paran, jotel mewin jorwenyo win, aka jomieno yo maber wiluw.

Rwoth thumo banja ri ji pere

¹³ Rwoth mako kabedo pere kiosa banja pere, go cungo malo thumo banja ri nonin.

¹⁴ Rwoth bino ri thumo banja, gi jodongo kodi jodhum pa ji pere. Win wiŋati winyaga ndelo vini, udi mewin opoŋ gigipiny pa jocandi.

¹⁵ Winyutho aŋo ka wiŋinyo ji paran, ka wirego nyim jocandi? Rwoth pa lwak jolweny waco.

Igwoko mon ma Yerusalem

¹⁶ Rwoth owaco, kwoŋbedo nyir ma Zayon jodele, aka jowotho ka jotelo ŋuti gin, jombieto waŋ gin m'ongoye wickwot, jothule gi woth, aka jowiyo tiendi jo.

¹⁷ Riameno Rwoth laketho situka, i wi mon ma Yerusalem, to lero wi jo gi pata.

¹⁸ I ndelo no Rwoth lakwanyo woko gigipiny ma jonor gine, thiwino ma joruko iy'odondo tiendi jo, i wi jo, gi ŋuti jo.

¹⁹ Thiwino ma ithi jo, aminda, gi giboyo wi jo,

²⁰ kodi jungin pajo. Atego ma jotweyo iy'odondo, kisiwiro, sanduku mo akudha gi tiko ma joruko.

²¹ Peta ma cingi gin gi ma um gin,

²² nangin pajo ma kadho i kalima, rinda pajo, law, mugowe ma cingi jo,

²³ nanga pajo ma nyaparpar, nanga mafoth, jungin pajo gi kitambalin maboyo ma joruko i wi gin.

²⁴ I kabedo ma kur maber, labedo ŋwece marac, i kabedo ma kisiwiro, labedo thol, i kabedo ma wi jo m'oyik, pata, i kabedo ma nangin mafoth, kutiya; i kabedo ma ŋono, waŋ.

²⁵ Cwo mewin jolatho g'abor, aka jomeni mewin jolatho i lweny.

²⁶ Waŋkac ma tindi madwoŋ lakumo to ywak, ladoŋ nono, to jengere piny.