Isaya 28 - KITAWO MALEŊ Catholic

Thumo banja ri ker ma yumalo

¹ Kidamba ri sangaria ma noro, pa jomero ma Efrayim, ma ŋono madwoŋ pere cal mawuwa ma thwo; manitie i wi milelo ma diwa pa joma jolacere gi vini!

² Neni, Rwoth nigi jameni aka tek; paka asur pe, ma reyo woko ŋawirok, paka asur matek, paka pi ma poŋ de oy; go laredho jo piny gi cinge.

³ Ilanyono piny gi tiendi jo, sangaria ma noro pa jomero ma Efrayim.

⁴ Ŋono madwoŋ pere lacale paka mawuwa ma thwo, manitie i wi milelo ma diwa, labedo paka nyandere macek marapena mafodi milengela; nyatoro je ma neno camo woko tekin podho i cinge.

⁵ I ndelo no, Rwoth pa lwak jolweny labedo sangaria madwoŋ, gi sangaria ma ŋono, ri ji pere ma joboth;

⁶ kodi cuny ma tiro, ri jathum banja, gi meni ri jono ma joriemo lweny i waŋkac.

Isaya gi jotuci wac Were ma jomero ma Yuda

⁷ Jome bende jobenga gi vini, jotangatanga gi math matek, jocway ri Were i wi migam gi jotuci wac Were. Jonywowere gi vini, jotangatanga gi math matek, aka jobenga i mikwenda pajo, aka jokom i miyo rieko.

⁸ Kole mezin oumere gi ŋok, m'ongoye kama kikoc.

⁹ Ŋa ma go ofonji ŋeyo, kosa ŋa ma go otiti rigo mikwenda? Kono nyithindho ma nyaka ocieri jo dhoth, ma joweyo thundho.

¹⁰ Kole obedo nyikuta i wi nyikuta, bol i wi bol, wac i wiwaci.

¹¹ Adieri, gi dhok jo ma dwal, kodi lew joman, go laluwo gi ji me,

¹² m'otieko waco rijo ni, “Me kabedo ma ywomirok miy ywomirok ri jom'olacere me kabedo ma ywomirok, kucel jok'onyalo winjo.

¹³ Riameno, wac pa Rwoth labedo rijo, nyikuta i wi nyikuta, bol i wi bol, wac i wiwaci.” Nyaka jowonyal kadho, to jopodho aŋey, jowotur, ocik rijo bwo, aka woter jo.

Tele ma sonda ri Zayon

¹⁴ Riameno, winji win wac pa Rwoth, win jogero, ma widhumo ji me ma jonitie i Yerusalem.

¹⁵ Kwoŋbedo witieko waco ni, “Watieko timo cikirok gi tho, watieko yerok gi piny pa jom'otho, ka goco ma teko oluwi, kilatundo bongi wan, kole watieko loko gima k'adieri kapondo mawan, gi twodo kabwok mawan.”

¹⁶ Riameno me apaka Rwoth Were waco ama: Neni, aketho misingi matek ri Zayon, gi tele ma welo ma sonda, misingi matek. Ŋat'oyey k'okwakere.

¹⁷ Alaketho tiro paka bol ma kipima, timo gim'otire paka gi bipo, pe layweyo woko kapondo ma twodo, aka pi lapoŋ i kabwok.

¹⁸ Cikirok mewin ma witimo gi tho ilareyo woko, yerok mewin ma witimo gi piny pa jom'otho k'ocungi, ka goco ma teko oluwi, ilacwado win gine piny.

¹⁹ Wok i dito ma luwo gine, latero win, kole kisi odikin laluwo, odieceŋ gi wor, labedo nyaka kirin, niaŋ mikwenda mere.

²⁰ Kitanda cek swa ma dhano kinyal rierok i iye, aka bilangit thin ma dhano kinyal minirok i iye.

²¹ Kole Rwoth laay malo, paka otimo wi got Perazim, kodi i milelo Gibeon; timo tim pere, tim pere ma dhier, kodi timo tic pere, tic pere ma kiniaŋere.

²² Onyo riameno, wikiri winyer, kosa gir'acula mewin labedo matek loyo, kole atieko winjo Rwoth Were pa lwak jolweny, wodho or ma reyo woko piny gibe.

²³ Ciki ithi win, aka winji win dwondan, winji win, aka winji win luwo paran.

²⁴ Ŋata furo gi kwer dhok, furo m'oluwere aluwa, ka go lacwoyo, yawo to teŋo lowo pere.

²⁵ Go kutho bipo lowo, cwoyo kodhi, pidho ŋano gi bale i bol, to nyaka cwoyo kodhi man i kew.

²⁶ Kole ofonji go woŋey, Were pere fonjo go.

²⁷ Nyim kiteŋ gi ngolo, kosa tiendi magal kiŋili wi nyim, to nyim iteŋo gi luth, igoyo gi ngolo.

²⁸ Dhano bende ŋinyo mugat ŋano? Be, go kiŋiny kicutho, ka go ogweyo tiendi magal pere i wiye, kayina pere kiŋiny woko.

²⁹ Gime bende wok bongi Rwoth pa lwak jolweny; go jamic rieko ma gir'aura, aka jarieko ma malo swa.