Isaya 22 - KITAWO MALEŊ Catholic

Mikwenda ma teko ma mako kwoŋ Yerusalem

¹ Me mikwenda ma teko ma mako kwoŋ milelo ma menyirok. Winyutho aŋo ni wikadho malo, wijoje, i wi udi mewin?

² Awi tindi madwoŋ m'opoŋ woy, Awi tindi madwoŋ m'opoŋ kisangala. Ji mewin ma jotho k'oneki jo g'abor, kosa jok'otho i lweny.

³ Jodhum mewin je joringo kanyacel, omaki jo m'ongoye atum bor. Ji mewin je m'onwaŋ omaki, makada nende oyido joringo bor swa.

⁴ Riameno awaco ni, Ŋiy bor kwoŋan, weyi aywak pigi waŋan makec, ikir'icandere kweyo cunyan ro rerok pa ji paran.

⁵ Kole Rwoth pa lwak jolweny nigi ndelo, ma teko, nyono piny gi nywowirok, i milelo ma menyirok, guro piny kor udi, gi koko ri wi gote.

⁶ Elam otiŋo malo kakano gilweny pere, gi cawilin gi jogwey kayinin, aka Kiri oyawo kwot.

⁷ Milelo mewin maŋon loyo, opoŋ gi cawilin, jogwey kayinin jocungo matek, i waŋkace.

⁸ Owey Yuda m'othangere. I ndelo no wiŋiyo gilweny ma Ot ma Lul,

⁹ aka wineno ni hoŋere ma tindi madwoŋ pa Daudi oyido thoth, aka wikulo pi wok i kidiwa ma piny.

¹⁰ Wikwano udi ma Yerusalem, aka wituro piny udi ri geto kor ot.

¹¹ Wigeto gikano pi i dier kor ot ario ma pi ma kidiwa m'oti. To wikicomo waŋ win kwoŋ ŋat'ocano gime cango con to miyo wotimere.

¹² I ndelo no Rwoth Were pa lwak jolweny olwoŋo ndur gi ywak, cido ye wiwin gi ruko kutiya.

¹³ Ere neni, withumo dhok gi rombo, wicamo riŋo to wimadho vini. Weyi wacem, wamedhi, kole dikin wanyalo tho.

¹⁴ Rwoth pa lwak jolweny oluwo m'awinjo gi ithan. Adieri reco me k'ocwaki riwin, cuka winotho, Rwoth pa lwak jolweny waco.

Gwoko Sebina

¹⁵ Rwoth pa lwak jolweny owaco ran ni, “Biye kadhi bongi jagwoki lim me, bongi Sebina, ma jakur ot aka ipenji go ni,

¹⁶ ‘Imito timo aŋo ka, aka inigi ŋa ka, m'ipayo kayik perin, win ma wipayo kayik mewin kam'oŋawere, aka wigoro kabedo mewin i tele?

¹⁷ Neni, Rwoth cegin dimin to bolin woko gi meni, awi in jal ma jameni me. Go lamakin matek,

¹⁸ aka lawitin to bolin paka mupira i piny malac. Ilatho kenyo i thengi cawilin perin m'oyido inor gine. Ibedo wickwot ri ot pa jadwoŋ perin.’

¹⁹ Alakwanyin wok i ka tic perin t'adwokin piny.”

²⁰ “I ndelo no alalwoŋo ŋeca paran Eliakim wod Hilikia,

²¹ aka alaruko rigo kanzu perin t'itweyo rigo del perin. Alamiyo go dwoŋ m'oyido inigine. Go labedo ba ji ma jobedo i Yerusalem gi i ot pa Yuda.

²² Alaketho i goke rayaw ma ot pa Daudi, ka go oyaw, ongoye ŋata lacego, ka go ocegi, ongoye ŋata layawo.

²³ Alaloko go m'ocwiny paka kedi ma wema m'ocom matek, aka Eliakim labedo kom madwoŋ i ot pa bamere.”

²⁴ “Dwoŋ ma ot pa bamere je laliero kwoŋ go, gi nyithindho je. Jolaliero kwoŋe paka degi g'acerin ma joliero wok i kedi.

²⁵ I ndelo no, Rwoth pa lwak jolweny waco, kedi m'oyido ocom m'ocwiny lalwogere, ilatoŋo to podho, aka bieto m'oyido nitie i wiye ilatoŋo woko.” Kole Rwoth pa lwak jolweny otieko luwo.