Isaya 21 - KITAWO MALEŊ Catholic

Podho pa Babilon

¹ Me mikwenda ma teko ma mako kwoŋ Babilon. Paka asur ma yupiny ma Kanan yweyo piny, teko bino wok i thim, wok i piny ma kiwacere.

² Onyuthan menyirok, ma gigipiny ma kiwacere, jamisegey, segeya, aka janyeki nyeko. Kadhi malo, Awi Elam, thoki ma mako, Awi Mediya, Rwoth otieko ciko kelo i gike, candirok pere.

³ Riameno, pieran opoŋ g'arama ma litho, ŋedi omakan paka dhako ma ŋedi ramo. Akule piny ŋey anyal bedo m'akiwinjo, adhier m'akinyal neno.

⁴ Cunyan podho, lworo miyan kirin; othieno m'oyido akuro, onyo olokere ran lworo.

⁵ Joyiko meza, jopedho okute, jocemo, jomedho. Ay win malo, awi jodhum, wir win kwot gi mo!

⁶ Kole Rwoth owaco ran ni, “Kadhi, kethi jakur, weyi go wowaci gima neno.

⁷ Go laneno, cwo ma jogweyo kayina j'ario ario, jogwey punda, gi jogwey ŋamia, go laciko ithe maber, maber swa.”

⁸ Kenyo jakur olwoŋo ni, “Awi Rwoth, acungo i wi kakur, noknok odieceŋ, aka apidhere ka tic paran, wor gipi.

⁹ Aka neni, eno jogweco jobino, cwo ma jogweyo kayina j'ario ario!” Kenyo jakur odwoko ni, “Opodho, Babilon opodho; aka cal ma werin pere je, dhano oŋinyo piny.”

¹⁰ Awi ji paran, wicale gim'osusila t'ipiedho, gim'atieko winjo wok bongi Rwoth pa lwak jolweny, Were pa Isiraili, atuco riwin.

Mikwenda ma teko ma mako kwoŋ Duma

¹¹ Me mikwenda ma teko ma mako kwoŋ Duma. Dhano lwoŋan wok i Edom, “Jakur, wor nedi? Jakur, wor nedi?”

¹² Jakur odwoko ni, “Odikin bino, aka wor bende bino, k'ilapenjo, penji, t'idwoko kendo.”

Mikwenda ma teko ma mako kwoŋ piny pa Jowarabu

¹³ Me mikwenda ma teko ma mako kwoŋ piny pa Jowarabu. Wilanindo i lul ma piny pa Jowarabu, awi jowoth pa Jodedan.

¹⁴ Keli win pi ri ji ma riyo neko, miy win jopath cemo, win ji ma jobedo i lowo ma Tema.

¹⁵ Kole joringo kwoŋ abor, abor m'icelo, kwoŋ atum bor m'okom, gi kwoŋ teko ma lweny.

¹⁶ Kole Rwoth owaco ran ni, “I oro acel cungo kwoŋ oro pa jotic m'opangisa dwoŋ pa Kedar latundo i gike,

¹⁷ aka jolweny g'atum abor ma joboth, cwo matek ma Kedar lanoko; kole Rwoth, Were pa Isiraili, otieko luwo.”