Isaya 17 - KITAWO MALEŊ Catholic

Were lamiyo Siria gi Isiraili gir'acula

¹ Me mikwenda ma teko ma mako kwoŋ Damasiko. Neni, Damasiko kilabedo tindi madwoŋ kendo, aka labedo kidhur gunda.

² Ilajwango tindin pere kicutho, jolabedo kabedo pa mwendi, ma jolariere piny aka ongoye ŋata ladwoko jo.

³ Ka pondo langoye i Isiraili, aka Damasiko langoye gi ker. Josiria ma joboth, jolacale dwoŋ pa Isiraili, Rwoth pa lwak jolweny waco.

⁴ I ndelo no, dwoŋ pa Yakobo iladwoko piny, aka bor ma delkwoŋe ilawaro woko.

⁵ Lacale paka jakeco, ma coko withi ŋano m'ocungo, gi paka ŋata dimo withi ŋano gi cinge, i milelo ma Refayim.

⁶ Ilakeco abudha abudha, paka k'igoyo yath oliv, nyinge ario kosa adek, aŋwen kosa abic, i jange ma wilwindi, kosa i jangi yath olemo. Rwoth Were pa Isiraili waco.

⁷ I ndelo no, ji jolawire bongi Jacwec pajo, aka waŋ jo laŋiyo bongi Were maleŋ pa Isiraili.

⁸ Jok'omiy dwoŋ ri migame, m'obedo tic ma cingi jo, aka jok'oŋiy gima cingi gin am'otimo, obedi werin ma mon, Asera kosa migame ma waŋo buban.

⁹ I ndelo no tindin madongo ma pondo pere lacale paka kabedo m'ojwangi i lul, gi wilwindi yath, ma joweyo ro Joisiraili, aka lakisika woko.

¹⁰ Kole wiy win owil gi Were ma both mewin, aka wikipoyo Tele ma pondo mewin; riameno makada nende winofur ndelin, ma lamo were makicar,

¹¹ makada nende jotwi to jodongo gi ndelo m'opidh'iye, kucel keco kilabedo, kwanyowoko two gi litho makicangi.

Ikengila piny ma jokwor

¹² Awi, mwoc pa nonin kweth, jomwoc paka mor ma nam! Awi kihola pa piny kweth johola paka pi ma nigi derino madwoŋ!

¹³ Nonin johola paka pi kweth, to Were ladwoko jo, to joringo bor, ilariemo jo paka cuŋ ma koyo kwadho wi gote, kodi rudino mar'asur ruwaŋ koth ma cwe gi koyo madwoŋ.

¹⁴ K'otundo othieno, neni, teko! Mafodi piny k'oyawere, jongoye. Me a gima timere ri jono ma jonyaga wan, gi gigipiny pa jono ma jokwalo wan.