Isaya 12 - KITAWO MALEŊ Catholic

Wer ma foyo

¹ Wilawero i ndelo no ni: Alamiyin foyo, Awi Rwoth, kole kad'oyido imako nge kodan, nge perin owire woko, aka iyomo cunyan.

² Neni, Were obedo both paran, alageno go, aka akilabwok; kole Rwoth obedo meni paran gi wer paran, go otieko bedo both paran.

³ Gi kisangala wilatwomo pi wok i waŋ pi ma both.

⁴ Wilawaco i ndelo no, miy win Rwoth foyo, lwoŋ win nyingi go, miy win tim pere woŋeyere i dier nonin, tuci win ni nyingi go dwoŋ.

⁵ Wer win pak ri Rwoth, kole go otieko timo gigipiny madongo, weyi gime woŋeyere i piny gibe.

⁶ Koki win malo, aka wer win ri kisangala ji ma Zayon, kole ŋatadwoŋ i dier win, obedo Ŋataleŋ pa Isiraili.