Isaya 10 - KITAWO MALEŊ Catholic

¹ Kidamba ri jono, ma jotimo cik ma kidakana, gi jondiko ma jondiko teko,

² ma wiro thumo banja pa jocandi, gi mayo jocandi tiro, ŋey jowonyaga mon tho, aka jowokwal nyithindho kic.

³ Winotim aŋo i ndelo ma gir'acula, gi rerok ma labino wok bor? Winoŋwec bongi ŋa rango kony? Aka winowey lim mewin kune?

⁴ Ongoye gima doŋ, to guŋo i dier jotwec, kosa podho i dier jom'onek. Kole nge fodi omako Rwoth, go fodi orieyo cinge miyo gir'acula.

Rwoth laoro Asiria

⁵ Awi Asiria, luth ma nge paran, Rwoth waco, abiro ma cingi jo obedo keme paran!

⁶ Aoro Asiria monjo piny ma bu Were, amiyo go or kwoŋ ji ma jomiyan nge, kinyaga gi kwalo, gi nyono jo piny paka cwodho ma royo.

⁷ To me k'agima go ocano, kosa k'agima go nitie gine i paro; to go nigi paro ma nyeko, gi reyo woko piny kweth.

⁸ Kole go waco ni: “Jomituka paran je jok'obedo kerin?

⁹ Amako Kalino gi Karkemis, Hamath kiri gi Aripad. Samaria kiri gi Damasiko.

¹⁰ Paka cingan otundo i kerin pa cal, ma cal pajo thoth loyo ma Yerusalem gi Samaria,

¹¹ ak'otim ri Yerusalem gi cal pere je, gim'atieko timo ri Samaria gi cal pere je?”

¹² Ka Rwoth otieko timo tic pere je kwoŋ Got Zayon gi kwoŋ Yerusalem, go lamiyo gir'acula ri kere ma Asiria ri delok pere je gi noro pere je.

¹³ Kole go waco ni, “Gi meni paran atieko timo, aka gi rieko paran, kole anigi niaŋ, atieko kwanyo woko kewin pa nonin, t'akwalo woko lim pajo, paka thwon, anyono piny ji m'oyido jodhumo.

¹⁴ Cingan onwaŋo lim pa ji, paka od winyo, aka paka cwo jocoko tongi winyo m'ojwangi, ameno bende apaka acoko piny, to ngoye m'oyaro bwombe, kosa m'oŋamo dhoke ywak.”

¹⁵ Le bende owaci ni dwoŋ loyo ŋata toŋere gine, kosa musimeno bende nigi cwe loyo ŋata randa gine? Abiro bende tiŋo malo ŋat'omako, kosa luth bende otiŋ ŋata k'obedo mbawo?

¹⁶ Riameno Rwoth pa lwak jolweny, ladhiro two kwoŋ jolweny pere ma jokor gin, aka dwoŋ pere laliel paka liel pa mac.

¹⁷ Were, lero pa Isiraili labedo paka mac, Were maleŋ pa Isiraili labedo paka mac, ma laliel to reyo woko, kudhin gi okure i ndelo acel.

¹⁸ Dwoŋ ma lul pa Asiria gi ndelo olemo pere, ilareyo woko kicutho paka cuny gi del, aka jolarere paka ŋata two.

¹⁹ Yen ma lul pere ladoŋ, manok swa ma kiri nyathi je nyalo kwano.

Ji manok joladwoko

²⁰ I ndelo no Joisiraili gi Joyuda ma joboth kendo jokilagoŋere kwoŋ piny m'otemo reyo jo woko, to jolagoŋere kwoŋ Rwoth Maleŋ pa Isiraili, iy'adieri.

²¹ Jom'oboth joladwoko, jom'oboth pa Yakobo jolawire bongi Were pajo ma jameni.

²² Kole makada nende Joisiraili oyido jothoth paka kwoyo ma nam, nyaka ma joboth ama joladwoko. Rerok nitie ri ji, aka opoŋ de oy gi tiro.

²³ Kole Rwoth, Rwoth pa lwak jolweny lakelo rerok paka go owaco ni latimo i dier piny gibe.

²⁴ Riameno Rwoth, Rwoth pa lwak jolweny waco, “Awi ji paran, ma wibedo i Zayon, wikiri wibwok ro Joasiria ka jocwado win g'abiro gi luth paka Jomisir jotimo.

²⁵ Kole i hongo macek won, gir'acula paran riwin latundo i gike, aka nge paran lacomere gi jo.

²⁶ Rwoth pa lwak jolweny lacwado jo gi luth pere paka i hongo m'ocwad'iye ji ma Midian i got ma Oreb. Aka luth pere ma nyweny labedo i wi nam, aka latiŋo malo paka otimo i Misir.

²⁷ Aka i ndelo no peko pere langoye woko i gokin, aka bieto pere ilareyo woko i ŋutin ro peko mere.”

Asiria monjo

²⁸ Neni, jakwor omako tindi madwoŋ Ayath, oluwo gi Migron, okano gigipiny pere i Mikmas.

²⁹ Joŋado g'iger, jonindo i Geba wor, ji ma Rama jokirin, Gibeya pa Saulo oringo.

³⁰ Ywak win malo, awi ji ma Galim! Winji win, awi ji ma Layisa! Dwoki win, awi ji ma Anathoth!

³¹ Madimena oringo, ji ma jobedo i Gebim joringo pondo.

³² I ndelo me won, go lacungo i Nob, go lawito adol pere, wi got Zayon, tendere ma Yerusalem.

³³ To neni, Rwoth pa lwak jolweny, latoŋo jange gi meni kweth, ma joboyo malo ilatoŋo piny, aka ma jolile iladwoko piny.

³⁴ Rwoth latoŋo yukino ma lul gi le, Lebanon gi yen mere matek.