Isaya 1 - KITAWO MALEŊ Catholic

¹ Menyirok pa Isaya wod Amoz ma go oneno ma mako kwoŋ Yuda gi Yerusalem i hongo pa Uziya, Yotham, Ahaz gi Hezekia, kerin ma Yuda.

Kidakana pa Yuda

² Winji, awi polo, ciki ithin, awi piny, kole Rwoth otieko luwo. Nyithindho m'apidho t'adongo, jogwenyere kwoŋan.

³ Merikwa oŋeyo won mere, aka punda ma roya oŋeyo wer ma cemo pa jadwoŋ pere, to Isiraili okuya an, ji paran jokiniaŋ.

⁴ Awi, piny m'opoŋ gi reco, ji mareco pajo pek rijo. Kodhi ma jotimo gimarac, nyithindho ma jodakana, jotieko jwango Rwoth, jotieko cayo Were maleŋ pa Isiraili, jotieko rwenyo kicutho!

⁵ Raŋo wirango goco man? Raŋo wimedere gwenyirok? Wiy win gipi two, aka cuny win gipi podho.

⁶ Wok i par tiendi win kiri i wiwin, ongoye kama ber, kwanyowoko alama gi dhethi, g'adholin macwer, ma k'obiy kosa k'otwey, ma kimadi kosa kirway gi mo.

⁷ Piny mewin ojwangere, tindin mewin madongo iwaŋo gi mac, kareno wineno ama. Jokicar josika lowo mewin, ojwangere paka jopath jomako.

⁸ Ojwangi Yerusalem kakende, paka kayindi i ndelo vini, paka kaywomirok i ndelo biriŋanya nyamizungu m'ilwoŋo ni kakamba, paka tindi madwoŋ m'okar mako.

⁹ Bedi Rwoth pa lwak jolweny k'oweyo riwan ji mogo, oyido wacal Sodom, oyido wacal Gomora.

¹⁰ Winji win wac pa Rwoth, awi jotel ma Sodom! Ciki ithi win ri fonji pa Were mawan awi ji ma Gomora!

¹¹ Cowirok mewin mathoth obedo aŋo ran? Rwoth waco. Mic mewin awaŋa ma wot rombo, gi bor ma dhok mewin oroman. Akisangala gi remo thwondhe, kosa rombo kosa wot diegi.

¹² Ka wibino ruwaŋan, Ŋa m'okwayo win gime wok i cingi win, nyono diedipo paran?

¹³ Ongoye kelo mic ma bukony kendo, buban obedo ran amien, Kalima ma Dwe Manyen gi Sabato kodi cokirok manyadini mewin, akinyali ciro cokirok m'opoŋ kidakana.

¹⁴ Kalima mewin ma Dwe Manyen gi ndelo mewin maleŋ je, cunyan odak; jolokere ran bieto, aol gi ciro jo.

¹⁵ Ka witiŋo cingi win malo i kwayo, alakano waŋan kwoŋ win; makada nende winokway i thotho, akilawinjo; cingi win opoŋ oyo remo.

¹⁶ Lwokere win, lokere win m'olony, kwany win woko raco i tim mewin ruwaŋan, weyi win timo gimarac,

¹⁷ fonjere win timo bero, rangi win tiro, both win ji m'idiyo, thiel win nyithindho kic, osa win ri citho.

¹⁸ Onyo biye win, weyi waluw kanyacel, Rwoth waco. Makada nende reco mewin obokere swa, lalony matar paka pe, paka yer rombo.

¹⁹ K'inen wiyere aka winowinjan, wilacamo gimaber ma wok i lowo.

²⁰ To ka wikwero to wigwenyere, ilakisika win g'abor, kole dhok Rwoth otieko luwo.

Tindi madwoŋ ma jareco

²¹ Tindi madwoŋ m'oyido timo adieri, olokere nedi malaya! Go m'oyido opoŋ gi tiro, m'oyido itim'iye gim'otire, onyo pama jonek!

²² Feza perin olokere gima bukony, vini perin oruwere gi pi.

²³ Jodhum perin jobedo jodudi, aka merin pa jokwo. Kisi dhano omaro cami nyew aka joredo jolo mic. Jokithiel nyithindho kic, aka jokiwinji banja pa citho.

²⁴ Riameno, Rwoth pa lwak jolweny, Jameni je pa Isiraili waco ni, “Ey, alakonjo keme paran kwoŋ jokwor paran, alaculo kwor kwoŋ jokwor paran!

²⁵ Alawiro cingan kwoŋ win, alathodho win kwanyo woko koco mewin, t'awaro woko cilo mewin je.

²⁶ Aladwoko riwin jothum banja paka marapena, jomic rieko paka i cakirok. Rumacen ilalwoŋo win ni tindi madwoŋ ma timo tiro, tindi madwoŋ ma timo adieri.”

²⁷ Zayon laboth gi tiro, aka jono ma jobed'iye ma joŋuti reco, gi timo gim'otire.

²⁸ To jogwenyirok gi joreco, ilareyo woko jo kanyacel, aka jono ma jokwero Rwoth jolarere woko.

²⁹ Kole wickwot lamako win kodi olwa mewin, m'oyido wiyodere gine; gi ndelin mewin ma wiyero.

³⁰ Kole wilacale paka olwa, ma boke mere thwo, kendo paka ndelo m'ongoy'iye pi.

³¹ Jameni lalokere ŋat'iywayo, aka tic pere cuk mac ma cot, jolawaŋ kanyacel gi tic pajo, m'ongoye ŋata nyalo neko.