Hoseya 7 - KITAWO MALEŊ Catholic

¹ Kisi k'anomiti cango Isiraili, reco pa Efrayim wok kamaler, kanyacel gi kidakana pa Samaria. Kole jotimo gikomo, jakwo turo ot donj'iye, aka jodudi jonyaga woko.

² To jokidew, ni apoyo kidakana pajo je. Pama onyo tim pajo othoko jo, jonitie ruwaŋan.

³ Gi kidakana pajo, jomiyo kere kisangala, kodi jodhum gi tedo wic pajo.

⁴ Joje jobedo jotimi cot; jocale paka kabulirok malieth, ma jatedi mugat mere kimitere rigo buko mac, wok i hongo ma dwanyo, moko tundo ketho thow.

⁵ I ndelo pa kere mawan, wot kerin, jolokere joma two gi lietho ma vini; go oyaro cinge gi jonyero ma rendirok,

⁶ Kole paka kabulirok malieth, cuny jo waŋ g'acama tiendi; wor gipi nge pajo cokere; odikin gaŋere pa mac maliel.

⁷ Joje jolieth paka kabulirok, aka jocuto jodhum pajo. Kerin pajo je jotho; ongoye kad'acel kwoŋ jo ma lwoŋan.

Isiraili gi nonin man

⁸ Efrayim ruwere gi ji; Efrayim cal mugat ma k'oloki.

⁹ Jokicar jocuto meni pajo, to go okuya rigin; kwo pajo lokere macek, to jokuya rigin.

¹⁰ Delok pa Isiraili osa go; kucel jokigiki bongi Rwoth Were pajo, kosa jodwar go, ro gime je.

¹¹ Efrayim onyo olokere paka akuru, mamiŋ aka bu rieko; jogoyo koko ri Misir, to jokadho Asiria.

¹² Ka jokadho, alaciko bwo paran kwoŋ jo; t'akelo jo piny paka winyin ma koyo; alafonjo jo kite maber paka oluwi kwoŋ jo i kacokirok.

¹³ Kidamba rijo, kole jotieko rwenyo kwoŋan! Rerok rijo, kole jotieko gwenyere kwoŋan! D'anyalo botho jo, to joluwo twodo kwoŋan.

¹⁴ Jokiywak ran wok, iy'adundin pajo, to jodwanyere gi ywak wi kitandin pajo; iy jo mwomere ri cemo kodi vini; jogwenyere kwoŋan.

¹⁵ Kad'afonjo t'amiyo cingi jo meni, kucel jotimo apondi ma gimarac kwoŋan.

¹⁶ Jogik bongi Bal; jotieko lokere paka asere m'ongoye kony; wot kerin pajo abor laneko jo, kwoŋbedo gero kodi ngoye gi wor ma lew jo. Me labedo nyero pajo ma twodo i piny ma Misir.