Hoseya 5 - KITAWO MALEŊ Catholic

Thumo banja ma kuro Isiraili kodi Yuda

¹ Winji win gime, Awi jocway ri Were i wi migam! Ciki ithin, Awi ot ma Isiraili! Winji, Awi ot pa kere! Kole thumo banja me mako win; kole wilokere bwo i Mizipa, kodi bwo m'oyar kwoŋ Tabor,

² kodi bur m'okuny maluth i Sitim; to alamiyo joje gir'acula.

³ Aŋeyo Efrayim, aka Isiraili k'opanere kwoŋan; kole pama, Awi Efrayim, itieko timo kidakana; Isiraili onyekere.

⁴ Tim pajo kiyey jo gik bongi Were pajo. Kole cuny ma kidakana nitie i jo, aka jokuya Rwoth.

⁵ Kwoto pa Isiraili won ama luwo kwoŋe; Efrayim tangatanga i banja pere; Yuda bende tangatanga gi jo.

⁶ Gi mwendi kodi sidwol pajo, jolakadho, dwaro Rwoth, to jok'onwaŋ go; go otieko weyo jo.

⁷ Jotieko tic gi Rwoth m'ongoye yeyo; kole jotieko nywolo, nyithindho makicar. Pama onyo dwe manyen lacuto jo kanyacel gi ndelin pajo.

Lweny i dier Yuda kodi Isiraili

⁸ Kudhi tungi dhiaŋ i Gibeya, gi gwara i Rama. Goy ndur i Bethaven; Wire iŋiy yuŋeyin, Benyamin!

⁹ Efrayim lalokere kam'ojwangi, i ndelo ma gir'acula. I dier nonin ma Isiraili, atuco kamaler gir'adieri.

¹⁰ Wot kerin ma Yuda jolokere, paka jono ma jofudho burowa ma kew. Alakonjo kwoŋ jo, keme paran paka pi.

¹¹ Idiyo Efrayim piny, iŋinyo go i thumo banja, kwoŋbedo go oyido oyeyo timo gipilok.

¹² Riameno acalo kilajaja ri Efrayim, kodi paka topo ri ot ma Yuda.

¹³ Munyo Efrayim oneno two pere, to Yuda neno adhola pere, nyaka to Efrayim kadho i Asiria, aka odhir go bongi kere madwoŋ, bongi kere ma latekere loyo jakwor. To go kinyal bothin, kosa cango adhola perin.

¹⁴ Kole alabedo paka simbwor ri Efrayim, kodi paka simbwor ma nyaka ay ri ot ma Yuda. An won alayeco, t'angoye ran; alatiŋo woko, aka ongoye ŋata labotho.

¹⁵ Alagik kendo i kabedo paran, cuka joyey banja pajo to jodwaran. I rembo pajo jolakwayo nema paran.