Hoseya 11 - KITAWO MALEŊ Catholic

Mar pa Were ri ji pere ma jogwenyirok

¹ Munyo Isiraili obedo nyathi, amaro go, aka wok i Misir alwoŋo wodan.

² Paka amedo lwoŋo jo, apaka bende jomedo weyan; jomedere miyo cowirok ri Bal, kodi waŋo buban ri cal.

³ Kucel obedo An m'afonjo Efrayim woth, abielo jo i cingan; aka jok'oŋeyo ni abotho jo.

⁴ Afudho jo g'adasa ma wor pa dhano, gi mar m'oasere. Oyido acalo rijo jono, ma jociwo nyithindho maŋic i badi jo, to joluŋere pidho jo.

⁵ Jolagik i piny Misir, aka Asiria labedo kere pajo, kwoŋbedo jotieko kwero dwoko bongan.

⁶ Abor liel i tindin madongo pajo, lareyo woko nywenye ma waŋkac mere, to cuto jo kwoŋbedo nyaliŋliŋ pajo.

⁷ Ji paran jomiyere wirok kwoŋan. Jolwoŋo Jamalo Swa, to go kitiŋi jo malo kada mathi.

⁸ Anyalo nedi jwangin, a Efrayim? Anyalo nedi weyin i cingi ŋatiman a Isiraili? Anyalo nedi lokin paka Adima? Anyalo nedi terin paka Zeboyim? Cunyan raman, mar paran rin lokere matek kendo mayom.

⁹ Ak'onyuthi nge paran maliel; doko ak'orey Efrayim; kole abedo Were makiweno dhano, Ŋataleŋ manitie i dier win, aka akilabino i keme.

¹⁰ Jolaluwo Rwoth, ma uja paka simbwor; ka go ouja, nyithindho pere jolabino ka jokirin wok yupodho ceŋ.

¹¹ Jolabino ka jokirin paka winyin ma wok Misir, kodi paka akurin ma wok i piny Asiria; aka alamiyo jo bedo i udi pajo, Rwoth waco.

¹² Efrayim othokan gi twodo, kodi ot ma Isiraili gi ledhirok; to Were fodi dhumo i Yuda, aka fodi ogeno Ŋataleŋ.