Hoseya 1 - KITAWO MALEŊ Catholic

¹ Wac pa Rwoth m'obino ri Hoseya wod Ber i hongo pa Uziya, Yotham, Ahaz kodi Hezekia kerin ma Yuda, kodi i hongo pa kere ma Isiraili, Yerobowam wod Yowas.

Peco pa Hoseya

² Munyo Rwoth oluwo gi Hoseya marapena, Rwoth owaco ri Hoseya ni, “Kadhi, inywom dhako m'obedo malaya aka i nywol nyithindho ma jobedo malaya paka go, kole piny timo malaya madwoŋ swa gi jwango Rwoth.”

³ Hoseya okadho to nywomo Goma nyar Diblayim. Goma ogamo iye to nywolo ri Hoseya wode.

⁴ Rwoth owaco ri Hoseya ni, “Cwoki rigo nyinge ni Yezirel. Kole i hongo manok alamiyo gir'acula ri ot pa Yehu ro remo pa Yezirel, aka alaketho i gike ker ma dhum ma ot pa Isiraili.

⁵ I ndelo no alaturo asere ma Isiraili i milelo ma Yezirel.”

⁶ Goma ogamo iye kendo to nywolo nyare. Rwoth owaco ri Hoseya ni, “Cwoki nyinge ni Loruhama; Kole Ak'omaki wor gi ot pa Isiraili kosa ak'ocwaki jo.

⁷ To alamako wor gi ot pa Yuda, aka alabotho jo gi an Rwoth Were pajo; ak'obothi jo g'atum abor, kosa abor, kosa lweny, kosa gi kayinin, kosa gi cwo ma jogweyo kayinin.”

⁸ Munyo Goma otieko cero Loruhama dhoth, ogamo iye kendo to nywolo wode.

⁹ Rwoth owaco ri Hoseya ni, “Cwoki nyinge ni Loami; Kwoŋbedo wikibedo ji paran aka akibedo Were mewin.”

Dwoko Isiraili

¹⁰ Kucel welo pa Joisiraili lacale paka kwoyo ma nam, ma kipimere kosa kwanere; aka i kabedo m'owac'iye rijo ni, “Wikibedo ji paran.” Ilalwoŋo jo ni, “Nyithindho pa Were makwo.”

¹¹ Ji ma Yuda kodi Joisiraili jolacokere kanyacel, to joyero rijo wegi jatel acel; to jotero lowo, kole ndelo pa Yezirel labedo madwoŋ.