Ezira 8 - KITAWO MALEŊ Catholic

Ji ma jodwoko gi Ezira

¹ Me nyingi jotel nonin m'oyido jonitie i twec i Babilon aka ma jodwoko gi Ezira i Yerusalem munyo Aritakises oyido obedo kere.

² Nyikway Finehas, Gerisom, wok i nono pa Ithamar, Daniel, wok i nono pa Daudi, Hatus wod Sekaniya.

³ Nyikway Paros, Zekaria, gi cwo 150 (ndiko ma mako kwoŋ kwarere pajo oyido nitie)

⁴ Nyikway Pahath Mowab, Eliehoenay wod Zerahia, gi cwo 200.

⁵ Nyikway Zatu, Sekaniya wod Yahaziel, gi cwo 300.

⁶ Nyikway Adin, Ebed wod Yonathan, gi cwo piero abic.

⁷ Nyikway Elam, Yesaya wod Athalia gi cwo piero ario.

⁸ Nyikway Sefatiya, Zebadia wod Mikaili, gi cwo piero aboro.

⁹ Nyikway Yowab, Obadia wod Yehiel, gi cwo 218.

¹⁰ Nyikway Bani, Selomith wod Josifia gi cwo 160.

¹¹ Nyikway Bebay, Zekaria wod Bebay, gi cwo piero ario g'aboro.

¹² Nyikway Azigadi, Johanan wod Hakatan gi cwo 110.

¹³ Nyikway Adonikam, ma jobino rumacen, Elifelet, Yeuel, Samaya, gi cwo piero aucel.

¹⁴ Nyikway Bigvay, Uthay, Zakur, gi cwo piero ario.

Jotic ma Ot pa Were

¹⁵ An, Ezira, acoko ji i thengi malawa ma mol tundo kiri Ahava, aka waketho kambi kenyo ma ndelo adek. Aka munyo akaŋasa ji gi jocway ri Were i wi migam, anwaŋo ni nyikway Jolevi oyido jongoye.

¹⁶ Kenyo aoro wolwoŋi Elieza, Ariel, Samaya, Elinathan, Yarib, Elinathan, Nathan, Zekaria, gi Mesulam, m'oyido jobedo jotel, Yoyarib gi Elinathan m'oyido joriek swa.

¹⁷ Aoro jo bongi Ido, jatel pa Jolevi i kabedo m'ilwoŋo ni Kasifa, kwayo go gi wade pere gi jotic ma Ot pa Were dhiro riwan jotic ma Ot pa Were mawan.

¹⁸ Ato paka cingi Were ma wor oyido nitie kwoŋ wan, jodhiro riwan Serebia, jacwo ma janyalo, jalevi, aka janono pa Mahili, gi wote gi wutmin go j'apar g'aboro.

¹⁹ Jodhiro bende Hasabia gi Yesaya jonono pa Merari, gi wade pere piero ario,

²⁰ gi jotic ma Ot pa Were 200. Jotic ma Ot pa Were oyido jokonyo Jolevi, aka Kere Daudi gi jodhum pere ama joketho jo timo tic no. Joje ondiki nyingi jo.

Ezira telo ji riyo kec gi kwayo

²¹ Kenyo i thengi jangi malawa ma mol kadho Ahava, awodho or ri wajoje riyo gi mwolok ruwaŋ Were mawan gi kwayo go wotel wan i woth mawan gi kikwonga wan gi nyithindho mawan gi lim mawan je.

²² Kole wiyan okwot kwayo kere womiy wan jokur kwoŋ jokwor i woth mawan, paka oyido atieko waco ri kere ni Rwoth miyo silwany ŋata geno i go, to go kisangala gi ŋata kwedere kwoŋe aka miyo go gir'acula.

²³ Ameno wariyo gi kwayo Were wokwonga wan, aka go odwoko kwayo mawan.

Mic ma Ot pa Were

²⁴ An, Ezira, ayero jotel pa jocway ri Were i wi migam apar g'ario, Serebia, Hasabia, gi wade pajo apar.

²⁵ Kenyo apima feza, zahabu, gi gigipiny ma kere, jomic rieko pere gi jodhum pere, gi Joisiraili oyido jomiyo ma oro i Ot pa Were, aka amiyo jo.

²⁶ Apima lim paka amiyo jo aka onwaŋo nitie marom ama: Tan piero ario g'ario ma feza, gigipiny 100 ma feza kilo piero ario, zahabu kilo 3,400

²⁷ atewe ma zahabu kilo 8.4 g'acero ario ma ywel m'oyuy, ma cwe mere rom gi cwe mar'acero ma zahabu.

²⁸ Awaco rijo ni, “Wibedo ji maleŋ ri Rwoth, aka gigipiny me leŋ, feza gi zahabu me obedo mic m'omiy Rwoth, Were pa kwarere mewin.

²⁹ Kur win jo maber cuka witundo i Ot pa Were. Pima win kenyo i kisika pa jocway ri Were i wi migam aka wikethi i cingi jotel pajo gi apa Jolevi, gi jotel pa Joisiraili i Yerusalem.”

³⁰ Ameno jocway ri Were i wi migam gi Jolevi joyeyo tic ma tero gigipiny me i Ot pa Were i Yerusalem.

Dwoko i Yerusalem

³¹ Kenyo waeye i jangi malawa ma Ahava k'apar g'ario ma dwe marapena kadho i Yerusalem. Were mawan oyido nitie gi wan aka ogwoko wan kwoŋ kisinye pa jokwor mawan gi jokinyaga paka wawotho.

³² Munyo watundo i Yerusalem, waywomere ma ndelo adek.

³³ I ndelo mar'aŋwen wakadho i Ot pa Were, wapima feza, zahabu, gi gigipiny je, aka wamiyo Meremoth jacway ri Were i wi migam, wod Uriya. Go oyido nitie gi Eliazar wod Finehas gi Jolevi, Yozabad wod Yesuwa gi Nowadia wod Binuy.

³⁴ Gigipiny je okwan aka opima, aka ondiki piny kicutho gi sawa no won.

³⁵ Kenyo ji je m'oyido jodwoko wok i twec jokelo mic awaŋa paka cowirok ri Were pa Isiraili. Jomiyo thwondhe apar g'ario ri Isiraili, wot rombo piero abuŋwen g'aucel, nyithindhi rombo piero ario g'ario, gi diegi apar g'ario paka mic ma cwako reco pajo.

³⁶ Jo bende jotero balwa ma kere oyido omiyo jo aka jomiyo jogavana gi jodhum mar'adec ma yuwok ceŋ ma Yufrete, ma bende jomiyo kony pajo ri ji gi Ot pa Were.