Ezira 7 - KITAWO MALEŊ Catholic

Ezira tundo i Yerusalem

¹ Rumacen ma oro kweth, munyo kere Aritakises oyido dhumo Pasia, oyido nitie jacwo m'ilwoŋo ni Ezira. Me a kwarere pa Ezira: Ezira oyido obedo wod Seraya, wod Azaria, wod Hilikia,

² wod Salum, wod Zadok, wod Ahitub,

³ wod Amaria, wod Azaria, wod Merayoth,

⁴ wod Zerahia, wod Uzi, wod Buki,

⁵ wod Abisuwa, wod Finehas, wod Eliazar, wod Aron jadwoŋ pa jocway ri Were i wi migam.

⁶ Ezira me obino wok i Babilon. Go oyido obedo jandiko manitie gi niaŋ i thutho kwoŋ cik pa Musa ma Rwoth Were pa Isiraili oyido omiyo. Kere omiyo go gim'okwayo je, kole cingi Rwoth oyido nitie kwoŋe.

⁷ Joisiraili megi, gi jocway ri Were i wi migam gi Jolevi megi, jower, jokur ma waŋkac, gi jotic ma Ot pa Were bende jodok i Yerusalem, i oro mar'abirio ma dhum pa Kere Aritakises.

^8-9 Joweyo Babilon k'acel i dwe mar'acel, aka gi kony pa Were jotundo i Yerusalem k'acel i dwe mar'abic.

¹⁰ Ezira oyido omiyere kisoma Cik pa Rwoth, gi timo gima cik waco, gi fonjo Joisiraili thenethene mere je.

Balwa ma Kere Aritakises omiyo Ezira

¹¹ Me cal ma balwa ma Kere Aritakises omiyo Ezira, jacway ri Were i wi migam, jandiko m'oyido nitie gi niaŋ i thutho kwoŋ Cik gi Or ma Rwoth oyido omiyo Isiraili:

¹² “Wok bongi Aritakises, kere pa kerin, ri Ezira jacway ri Were i wi migam, aka jafonji Cik pa Were ma i Polo: Siem rin.

¹³ Amiyo or ni Jaisiraili mogo je kosa jocway ri Were i wi migam pajo kosa Jolevi i ker paran ma jomito dok i Yerusalem jowokadhi kodin.

¹⁴ An, kanyacel gi jomic rieko paran abirio, waorin dwaro gima mako kwoŋ Yuda gi Yerusalem, gi neno nger ma joluw'iye Cik pa Were perin, m'omiyin.

¹⁵ Iripo bende tero mic ma zahabu gi feza ma an gi jomic rieko paran wamito miyo Were pa Isiraili, ma Ot pere nitie i Yerusalem.

¹⁶ Iripo bende tero feza gi zahabu m'icoko iy'adec ma Babilon gipi gi mic je ma Joisiraili gi jocway ri Were i wi migam pajo jomiyo ri Ot pa Were i Yerusalem.

¹⁷ Gi pesa me, nyew thwondhe, wot rombo, megi rombo, ŋano, gi vini aka imiy Rwoth i wi migam i Ot pa Were i Yerusalem.

¹⁸ Winyalo oro feza gi zahabu m'odoŋ ri gigipiny ma in gi wadin wimito, cungo kwoŋ mito pa Were mewin.

¹⁹ Iripo miyo Were i Yerusalem gigipiny je m'omiyin ma tic i Ot pa Were.

²⁰ Aka giman je m'imito ri Ot pa Were inyalo kwanyo wok i mugowa pa kere ma kan.

²¹ An, Kere Aritakises, awodho or ri jokan lim je mar'adec ma yuwok ceŋ ma Yufrete miyo Ezira jacway ri Were i wi migam aka jafonji Cik pa Were ma i Polo kisi gima go mito gi kinen.

²² Miy win go tundo kiri kilo 3,400 ma feza, kilo 10,000 ma ŋano, lita 2,000 ma vini, lita 2,000 ma mo gi cumbi ma mitere.

²³ Neni win ni wimiyo kisi gima Were ma i polo miyo or ni mitere i ot pere, ŋey keme pere wokiri wobin kwoŋ kere gi jono ma jodhum rumacen paran.

²⁴ Wikiripi coko misolo wok bongi jocway ri Were i wi migam, Jolevi, jower, jokur, jotic ma Ot pa Were, kosa ŋatiman je ma timo tic m'omakere gi Ot pa Were.

²⁵ In, Ezira, cungo kwoŋ rieko ma Were ocweyin gine, yer jodhum gi jothum banja ma joluwo Cik pa Were perin dhumo ji ma yuwok ceŋ ma Yufrete. Aka iripo fonjo Cik ŋat'okuya kwoŋe je.

²⁶ Ŋat'okwer winjo cik pa Were perin je kosa cik ma ker, iripo miyo go gir'acula gi sawa no won; ma tho kosa tero go i piny man kosa mako gigipiny pere kosa tweyo go i katwec.”

Ezira pako Were

²⁷ Ezira owaco ni, “Rwoth wopak, Were pa kwarere paran! Go omiyo kere miyo Ot pa Rwoth i Yerusalem dwoŋ i nger me.

²⁸ Gi wor pa Were, anwaŋo wor i waŋ kere, jomic rieko pere gi jodhum ma jomeni je; Rwoth Were omiyan miseni, aka anyalo dwoŋo jotel nonin ma Isiraili kweth dok kanyacel kodan.”