Ezira 10 - KITAWO MALEŊ Catholic

Ji jotuco reco pajo

¹ Korin munyo Ezira oyido okule kwayo ruwaŋ Ot pa Were, kareno ywak aka tuco reco pa Joisiraili, lwak Joisiraili madwoŋ, cwo, mon gi nyithindho jocokere bonge, aka bende joywak gi litho.

² Kenyo Sekaniya wod Yehiel, aka nyakwar Elam, owaco ri Ezira ni, “Watuco ni wakibedo g'adieri ri Were mawan, kole wanywomo mon jopath me ma lowo me. To makada nende obedo ameno, Isiraili fodi nitie gi geno.

³ Onyo weyi watim cikirok gi Were mawan riemo woko mon me je gi nyithindho pajo. Walaluwo rieko ma in gi jono ma jolworo or pa Were mawan winomiy. Walatimo gima cik pa Were waco.

⁴ Obedo tic perin timo gima mitere. Walathielin i gim'imito je, bedi gi meni.”

⁵ Ameno Ezira oay malo aka omiyo jotel pa jocway ri Were i wi migam, Jolevi, gi Isiraili je kwoŋirok ni jolatimo gima Sekaniya owaco, ameno jokwoŋere.

⁶ Kenyo Ezira oeye woko ruwaŋ Ot pa Were aka okadho peco pa Yehohanan to nindo kenyo. Obedo ma k'ocemo kosa k'omadho pi kwoŋbedo go oyido ywak ri ngoye g'adieri pa ji.

⁷ Odhir mikwenda i Yerusalem gi Yuda gipi ni jono je m'oyido jodwoko wok i twec joworomi i Yerusalem

⁸ gi cik pa jotel pa ji. Aka ni ŋata k'obino i ndelo adek, ilamako gigipiny pere je, aka kilabedo acel kwoŋ ji m'oyido jodwoko wok i Babilon.

⁹ I ndelo adek, ka piero ario ma dwe mar'abuŋwen, cwo je ma jobedo iy'adec ma Yuda gi Benyamin jobino i Yerusalem to jocokere i diedipo ma Ot pa Were. Koth ocwe swa, aka ro ŋico g'atoŋa ma romo kisi dhano oyido kirin.

¹⁰ Kenyo Ezira jacway ri Were i wi migam oay malo to waco rijo ni, “Wituro cik pa Were gi nywomo mon jopath, aka wikelo banja kwoŋ Isiraili.

¹¹ Onyo, tuci win reco mewin ri Rwoth, Were pa kwarere mewin, aka witim gima sangala go. Pokere win kwoŋ jopath ma jobedo i lowo mawan aka riemi win woko mon mewin ma jobedo jopath.”

¹² Kenyo ji je jodwoko gi dwondi jo malo ni, “Obedo ameno, waripo timo paka iwaco.

¹³ To ji jothoth, aka koth cwe, wakinyali cungo kam'othangere, aka me k'obedo tic m'inyalo timo i ndelo acel kosa ario, kwoŋbedo wathothi ma watimo reco me.

¹⁴ Weyi jodhum mawan jowobedi i Yerusalem aka jowotiy kwoŋ wac me. Kenyo kisi ŋata nitie gi dhako ma japath wobin i sawa m'oyik, kanyacel gi jotel gi jothum banja ma tindi madwoŋ me. I nger me Were lacwako to weyo mako gi wan nge ro gime.”

¹⁵ Ongoye ŋat'okwero can me kwanyo woko Yonathan wod Asahel gi Yazeya wod Tikiva, aka Mesulam gi Sabethay Jolevi jothielo jo.

¹⁶ Ameno ji m'oyido jodwoko wok i twec jotimo ameno. Ezira jacway ri Were i wi migam oyero cwo m'oyido jobedo jotel nonin aka ondiko nyingi jo piny. K'acel ma dwe mar'apar jocako kikaŋasa wac me,

¹⁷ aka i dwe adek m'oluwo jonyalo cowo banja pa cwo je m'oyido jonitie gi mon jopath.

Cwo m'oyido jonywomo mon jopath

¹⁸ Onwaŋ nyikway jocway ri Were i wi migam m'oyido jonywomo mon jopath; kwoŋ nyikway Yesuwa wod Yehozadak gi wutmin go: Maseya, Elieza, Yarib gi Gedalia.

¹⁹ Jociko riemo woko mon pajo, aka jomiyo wod rombo paka cowirok ma cwako reco pajo.

²⁰ Nyikway Ima: Hanani gi Zabadia

²¹ Nyikway Harim: Maseya, Elia, Samaya, Yehiel gi Uziya.

²² Nyikway Pasur: Eliowenay, Maseya, Isimayil, Nethanel, Yozabad gi Elasa.

²³ Kwoŋ Jolevi obedo: Yozabad, Simey, Kelaya (ma bende ilwoŋo ni Kelita) Pethahia, Yuda gi Elieza.

²⁴ Kwoŋ jower obedo: Eliasib. Kwoŋ jokur waŋkac obedo Salum, Telem, gi Uri.

²⁵ Joman jobedo; wok i nono pa Paros: Ramia, Izia, Malikija, Miyamin, Eliazar, Malikija gi Benaya.

²⁶ Nyikway Elam: Matania, Zekaria, Yehiel, Abidi, Yeremoth gi Elia

²⁷ Nyikway Zatu: Eliowenay, Eliasib, Matania, Yeremoth, Zabad gi Aziza.

²⁸ Nyikway Bebay: Yehohanan, Hanania, Zabay gi Athilay.

²⁹ Nyikway Bani: Mesulam, Maluk, Adaya, Yasub, Seal gi Yeremoth.

³⁰ Nyikway Pahath Mowab: Adina, Kelal, Benaya, Maseya, Matania, Bezalel, Binuy gi Manase.

^31-32 Nyikway Harim: Elieza, Isiya, Malikija, Samaya, Simeo, Benyamin, Maluk gi Semaria.

³³ Nyikway Hasum: Matenay Matata, Zabad, Elifelet, Yeremay, Manase gi Simey.

³⁴ Nyikway Bani: Maday, Amram, Uwel,

³⁵ Benaya, Bedeya, Keluhi,

³⁶ Vania, Meremoth, Eliasib,

³⁷ Matania, Matenay gi Yasu.

³⁸ Nyikway Binuy: Simey,

³⁹ Selemia, Nathan, Adaya,

⁴⁰ Makinadebay, Sasay, Saray,

⁴¹ Azarel, Selemia, Semaria,

⁴² Salum, Amaria kodi Yozefu.

⁴³ Nyikway Nebo: Yeyel, Matithia, Zabad, Zebina, Yaday, Yowel gi Benaya.

⁴⁴ Cwo me je oyido jonywomo mon jopath, aka joriemo woko mon no gi nyithindho pajo.