Ezira 1 - KITAWO MALEŊ Catholic

Siras wodho or ri Joyuda dok i Yerusalem

¹ I oro marapena ma dhum pa Siras kere ma Pasia, Rwoth omiyo wac pere m'owaco luwo kwoŋ Yeremia tundo i kare. Rwoth oguro cuny kere Siras ŋey owodho or m'ondiki t'isoma malo i ker pere gibe.

² Kere Siras ma Pasia owaco ni, Rwoth, Were ma i Polo, omiyan dhumo kerin je ma i piny, aka owodho ran or geto rigo Ot pa Were i Yerusalem i Yuda.

³ Weyi Rwoth wobedi gi jono je ma jobedo ji pere. Onyo ayeyo win kadho i Yerusalem geto kendo Ot pa Rwoth, Were pa Isiraili, go obedo Were manitie i Yerusalem.

⁴ Aka weyi ji pere ma joboth je, i kabedo ma jobed'iye je, ji ma diere pajo jowokony jo gi feza, zahabu, gigipiny ma woth kodi ogwaŋe kiri gi mic ri Ot pa Were i Yerusalem.

⁵ Kenyo jotel ma nonin ma Yuda gi Benyamin, jocway ri Were i wi migam kodi Jolevi kodi kisi ŋata Were oguro cunye joyikere kadho geto kendo Ot pa Rwoth i Yerusalem.

⁶ Ji ma diere pajo je jokonyo jo g'atewe ma feza, zahabu, gigipiny ma woth, ogwaŋe, gi mic ma welo kodi mic man ma wegi jomiyo.

⁷ Kere Siras won owodho woko atewe ma Ot pa Rwoth ma Kere Nebukadineza oyido otiŋo wok i Yerusalem to ketho i ot pa werin pere.

⁸ Kere Siras owodho or ri Methireda, jakan ma Pasia kwano jo to ketho i cingi Sesibazar, jadhum ma Yuda.

⁹ Me a gigipiny m'onwaŋ; galaya ma zahabu piero adek, galaya ma feza 1,000 apalin piero ario g'abuŋwen,

¹⁰ acero ma zahabu piero adek, acero ma feza 410 kodi atewe man 1,000.

¹¹ I je oyido nitie atewe 5,400 ma zahabu gi feza. Sesibazar okelo je i Yerusalem wok i Babilon.