Ezekiel 7 - KITAWO MALEŊ Catholic

Gike cegin ri Isiraili

¹ Wac pa Rwoth obino ran ka waco ama:

² In wod dhano, Rwoth Were waco ama ri lowo ma Isiraili: Gike otieko bino, gike i sondin aŋwen ma lowo.

³ Onyo gike nitie kwoŋ win, aladhiro nge paran kwoŋ win, alathumo riwin banja luwo kwoŋ yo mewin, alaculo kwor kwoŋ win ro amien mewin je.

⁴ Waŋan k'oŋiy win gi wor, aka ak'onyuthi win wor. Alaculo kwor kwoŋ win ro yo mewin, kareno amien mewin nitie i dier win. Kenyo wilaŋeyo ni An Abedo Rwoth.

⁵ Rwoth Were waco, teko i wi teko eno bino.

⁶ Gike obino, gike otundo, oay kwoŋ win, neni, bino!

⁷ Kisika obino kwoŋ win, Awi ji ma jobedo i Piny, hongo otieko bino, ndelo nitie cegin, ma nywowirok makiweno koko pa gote ma kisangala.

⁸ Akoru konjo keme paran kwoŋ win, alacowo nge paran kwoŋ win, alathumo riwin banja luwo kwoŋ yo mewin, aka alaculo kwor kwoŋ win ro amien mewin.

⁹ Waŋan k'oŋiy win gi wor, aka ak'onyuthi win wor. Alaculo kwor kwoŋ win luwo kwoŋ yo mewin, kareno amien mewin nitie i dier win. Kenyo wilaŋeyo nike obedo An Rwoth m'ogoyo win.

¹⁰ Eno ndelo, eno bino, kisika owok, akaka othiwo, gero oloth.

¹¹ Akaka olokere luth ma kidakana, ongoye kwoŋ jo ma ladoŋ, ki lwak pajo, ki lim pajo, langoye dwoŋ i dier jo.

¹² Hongo obino, aka ndelo otundo, janyew wokiri wosangala, aka jamitan wokiri woywaki, kole keme nitie kwoŋ lwak pajo je.

¹³ Kole jamitan k'ogiki i gim'otieko kitana kafodi kwo, kwoŋbedo menyirok obedo ri lwak je, aka kilawire, ro reco pajo, ongoye ŋata lanyalo cungo matek i kwo pere.

¹⁴ Jotieko kudho gwara, joyiko kisi gimoro, to ongoye ŋata kadho i lweny, kwoŋbedo keme paran nitie kwoŋ lwak je.

¹⁵ Abor nitie woko, two nundu kodi kec nitie i ot. Jono ma jonitie woko jotho g'abor, jono ma jonitie i tindi madwoŋ, kec kodi two nundu reyo woko jo.

¹⁶ Ka jom'oboth joringi, jolanwaŋere wi gote, paka akurin ma milelo, joje jolaywak kisi dhano ro reco pere.

¹⁷ Cingi jo lanyapere, aka congi jo lagore.

¹⁸ Jolatweyo kutiya, bwok laumo jo, wickwot labedo i nyim jo, aka pata lacowo wic jo.

¹⁹ Jolawito feza pajo i royo, zahabu pajo lalokere gimakoc. Feza pajo kodi zahabu k'onyal konyo jo, i ndelo ma keme pa Rwoth. Jok'oyeŋ kec pajo, aka iy jo k'opoŋ, kwoŋbedo jolokere gi timo reco pajo.

²⁰ Wok i ŋono ma thiwino pajo, jotimo gi noro, wok i cal mar'amien pajo, jotimo gine gim'adak, riameno alaloko rijo gimakoc.

²¹ Alaketho i cingi jopath, jowonyeki, ri jokidakana ma piny jowonyaga, aka jolakoco.

²² Alawiro woko waŋan kwoŋ jo, ŋey jowokoci kabedo paran ma dicwe, jokwo joladonjo to jokoco.

²³ Tim lijegere, kole lowo opoŋ banja ma oyo remo, aka tindi madwoŋ opoŋ akaka.

²⁴ Alakelo nonin pa jokidakana, lunjo udi pajo, alaketho i gike noro pa jomatek, aka ilakoco Kabedo pajo maleŋ.

²⁵ Kidamba otieko bino, jolarango siem, to ngoye.

²⁶ Teko i wi teko labino, pokopoko i wi pokopoko, jolarango menyirok wok bongi jatuci wac Were, aka fonji langoye bongi jacway ri Were i wi migam, kodi mic rieko wok bongi jodongo.

²⁷ Kere laywak, jadhum lapoŋ gi lworo, cingi ji ma piny lakirin. Alatic gi jo luwo kwoŋ yo pajo, alathumo rijo banja luwo kwoŋ thumo banja pajo wegi. Kenyo jolaŋeyo ni An Abedo Rwoth.