Ezekiel 44 - KITAWO MALEŊ Catholic

Oro waŋkac ma yuwok ceŋ

¹ Jacwo no okelan i waŋkac ma woko ma Ot pa Were, ma ŋiyo yuwok ceŋ, aka oyido ocegi.

² Rwoth owaco ran ni, waŋkac me ladoŋ m'ocegere aka kiripi yawo. Ongoye ŋata ripo donjo gine, kwoŋbedo Rwoth, Were pa Isiraili otieko donjo gi kenyo, riameno ladoŋ m'ocegere.

³ Nyaka wod kere, kwoŋbedo go obedo wod kere, ama nyalo bedo to camo cemo ruwaŋ Rwoth. Go nyalo donjo gi kalikondi ma waŋkac to kendo wok gi kenyo.

Cik ma yeyo dhano donjo i Ot pa Were

⁴ Jacwo okelan gi royo ma waŋkac ma yumalo yuwaŋ Ot pa Were. Aŋiyo, aka neni, dwoŋ pa Rwoth opoŋo Ot pa Were; t'apodho piny gi nyiman.

⁵ Rwoth owaco ran ni, wod dhano, neni m'odoco, kaŋasa, aka cik ithin iwinji maber kisi gim'alawaco rin kwoŋ or je ma Ot pa Rwoth kodi cik mere je, aka ŋey maber jono ma joripo donjo i Ot pa Were kodi jono ma jokiripi donjo.

⁶ Waci ri ot pa jogwenyirok no, ot pa Isiraili ni, Rwoth Were waco ama: Awi ot pa Isiraili weyi win amien mewin je ameno.

⁷ Wiyeyo jopath, ma jok'othumere donjo i ot paran, wikoco ot paran ka wimiyan cemo, bor kodi remo. Witieko turo cikirok paran g'amien mewin.

⁸ Wikikuro cik ma mic paran maleŋ, to wiyero jopath tic riwin kuro cik paran i ot paran.

⁹ Rwoth Were waco ama: Ongoye japath ma k'othumere, kwoŋ jopath je ma jonitie i dier Joisiraili, ma ripo donjo i ot paran.

Jolevi ma jokiripi bedo jocway ri Were i wi migam

¹⁰ Jolevi ma jojwangan, to jolamo calin munyo Joisiraili jonyeko, jolalimo gir'acula pajo.

¹¹ Jolabedo i ot paran ka jotiyo, jolakuro waŋkace ma Ot pa Were kodi tiyo i iy Ot pa Were. Jolathumo mic awaŋa kodi cowirok pa ji, aka jolatic ri ji.

¹² Kwoŋbedo jotiyo rijo ruwaŋ calin pajo to jomiyo ot pa Isiraili podho i reco, riameno atieko kwoŋirok kwoŋ jo ni jolalimo gir'acula. Rwoth Were waco.

¹³ Jokilacore cegin kodan, tiyo ran paka jocway ri Were i wi migam, kosa bino cegin gi mic paran maleŋ, gigipiny maleŋ loyo, to jolatiŋo wickwot pajo kodi gir'acula mar'amien pajo ma jotimo.

¹⁴ Kucel alaketho jo kuro Ot pa Were, tic mere je kodi gim'imito iye je.

Jocway ri Were i wi migam ma jobedo Jolevi

¹⁵ Jocway ri Were i wi migam ma jobedo Jolevi ma nyikway Zadok, ma jokuro ot paran munyo Joisiraili jonyeko, jolacore cegin kodan tiyo ran. Jolamiyan mic mabor, kodi remo, Rwoth Were waco.

¹⁶ Joladonjo i ot paran, jolatic ran i meza paran, aka jolatelo lamo.

¹⁷ Ka jodonjo waŋkace ma diedipo ma iye, jolaruko nangin mafoth, aka jokiripi ruko nanga ma yer rombo ka jotiyo i waŋkace ma diedipo ma iye kodi i iye.

¹⁸ Joripo ruko junga mafoth i wi jo, kodi palere mafoth i pier jo. Jokiripi tweyirok gi gima miyo jo cwero kwok.

¹⁹ Ka jowok woko i diedipo ma woko bongi ji, joripo lunyo woko nangin ma tic, to joketho i kisika maleŋ aka jolaruko nangin man, ŋey nangin pajo wokiri womiy ji litho.

²⁰ Jocway ri Were i wi migam jokiripi lielo ye wi jo kosa weyo ye wi jo dongo mabor. Joripo nyaka dwoko cen.

²¹ Jocway ri Were i wi migam jokiripi madho vini ka jodonjo i diedipo ma iye.

²² Jokiripi nywomo citho, kosa dhako m'opokere gi cwore, kwanyowoko nyako mambula wok i ot pa Isiraili, kosa citho m'oyido obedo cipa jacway ri Were i wi migam.

²³ Joripo fonjo ji paran pokirok i dier gimaleŋ kodi gima kileŋ, gimakoc kodi gim'olony.

²⁴ Ka kiŋunyaŋunya nitie, joripo bedo jothum banja, aka joripo thumo banja luwo kwoŋ thumo banja paran. Joripo kuro cik paran kodi or paran kwoŋ kalimin m'ayero, aka joripo kuro sabato paran maleŋ.

²⁵ Jokiripi kocirok gi kidho cegin gi delkwoŋ ŋat'otho, kwanyowoko yok jo kosa bajo kosa wod jo kosa nyar jo, kodi omin jo kosa nyamin jo ma fodi jok'onywomere.

²⁶ Rumacen ma bedo m'olony kendo, iripo kwano rigo ndelo abirio.

²⁷ I ndelo ma go donjo iye i Kabedo Maleŋ, i diedipo ma iye, tiyo, go ripo miyo mic ma cwako reco, Rwoth Were waco.

²⁸ Me labedo alunja pajo, aŋat'abedo alunjo pajo. Wikiripi miyo jo lim i Isiraili, abedo lim pajo.

²⁹ Jolacamo mic ma cemo, mic ma cwako reco, mic ma cul, kodi kisi gim'omiy ri Rwoth i Isiraili.

³⁰ Olemo mewin je marapena, mic ma nger je kwoŋ mic mewin je labedo apa jocway ri Were i wi migam. Wilamiyo jo bende cemo mewin marapena, ŋey silwany wobedi i ot mewin.

³¹ Jocway ri Were i wi migam jokiripi camo gimoro je, winyo kosa ogwaŋ, ma won otho kosa m'ogwaŋ madudi oneko.