Kitawo mar'ario mapa Musa m'ilwoŋo ni Wok 38 - KITAWO MALEŊ Catholic

Timo migam ma waŋo mic

¹ Bezalel otimo migam ma waŋo mic wok kwoŋ mbawo kasia. Oyido obedo mita 2.2 i boro, mita 2.2 i laco kodi mita 1.3 i ŋawirok.

² Otimo tunge i kisi sonda aŋwen, ŋey jowobedi tim acel gi migam. Aka oumo gi ywel thoko.

³ Bezalel otimo gigipiny ma migam; degi, mwiko, atewe, siragetere kodi sapikere gi ywel.

⁴ Bezalel otimo kicungwo ma ywel aka oketho i ŋangi miango ma migam, ŋey wotundi i kore migam.

⁵ Otimo petin aŋwen aka oketho i kisi sonda aŋwen.

⁶ Bezalel otimo gute wok kwoŋ mbawo kasia ma tiŋo aka oumo gi ywel,

⁷ aka orwako jo i petin i kisi thenge migam. Migam otim gi yen, aka oyido oŋamere.

Timo kalaya ma ywel

⁸ Bezalel otimo kalaya ma ywel gi pende ma ywel wok kwoŋ ndewirin pa mon m'oyido jotiyo i dhiot Wema Maleŋ.

Diedipo ma Wema Maleŋ

⁹ Bezalel otimo diedipo ri Wema Maleŋ wok kwoŋ nangin ma liero m'otimi gi nangin mafoth. Yuthenge ma yupiny nangin ma liero oyido obedo mita piero aŋwen g'aŋwen i boro,

¹⁰ to thielo gi gute piero ario ma ywel i pende piero ario ma ywel, siragetere kodi ludhe m'otimi gi feza.

¹¹ Diedipo oyido tim acel yuthenge ma yumalo.

¹² Yupodho ceŋ oyido nitie nangin ma liero ma mita piero ario g'ario i boro, kodi asu apar, pende apar, siragetere kodi ludhe ma feza.

¹³ Yuthenge ma wok ceŋ, kama dhiot nitie iye, diedipo oyido obedo mita piero ario g'ario i laco.

^14-15 I kisi thengi dhiot oyido nitie nanga ma liero ma mita 6.6 asu adek kodi pende adek.

¹⁶ Nangin ma liero je thoko diedipo otim gi nanga mafoth.

¹⁷ Pende je ri asu je otim gi ywel, aka siragetere, ludhe kodi giumo wi asu je otim gi feza. Asu je thoko diedipo oyido oriw gi ludhe ma feza.

¹⁸ Nangin ma liero i waŋkac ma diedipo otim gi nangin m'okwoy manyabululu, manyarangi ariŋo, kodi yer rombo m'obokere aka okwoy gi piso. Oyido obedo mita abuŋwen i boro kodi mita ario i ŋawirok paka nangin ma liero ma diedipo.

¹⁹ Oyido othiel gi asu aŋwen i pende aŋwen ma ywel. Siragetere mere, giumo wiye kodi ludhe oyido otim gi feza.

²⁰ Loce ma Wema gi diedipo je otim gi ywel.

Nyweny m'oor i Wema Maleŋ

²¹ Me gigipiny je m'oor i Wema Maleŋ, kam'okan'iye telin mapando ario m'ondik'iye Or Apar. Musa am'okwano aka Jolevi ama jotimo tic munyo Ithamar wod pa Aron jacway ri Were i wi migam waco rijo gir'atima.

²² Bezalel, wod pa Uri aka nyakwar Hur, janono pa Yuda am'otimo kisi gima Rwoth owodho or ni wotim.

²³ Oholiab wod pa Ahisamak, janono pa Dan, am'oyido jakidonya, japac kodi jacwey nangin mafoth gi yer rombo manyabululu, manyarangi ariŋo kodi m'obokere.

²⁴ Zahabu je m'omiy Rwoth ri Wema Maleŋ oromo kilo gana acel m'opima gi rapim m'ioro.

²⁵ Feza m'ocoki wok kwoŋ ji m'okwan oromo kilo 3,430 cungo kwoŋ latir m'otire.

²⁶ Kisi ŋat'okwan oculo welo ma mitere, aka oyido nitie cwo 603,550 ma jo oro piero kosa kalo.

²⁷ Kwoŋ feza, kilo 3,400 oor ma timo pende miya acel ri Wema Maleŋ kodi ri nangin ma liero, kilo piero adek g'aŋwen ri kisi pende.

²⁸ Bezalel otimo ludhe, siragetere, asu, kodi giumo wiye gi kilo piero adek ma feza m'odoŋ.

²⁹ Ywel m'omiy Rwoth oromo kilo 2,425.

³⁰ Bezalel otimo gine pendi dhiot ma Wema Maleŋ, migam ma ywel gi kicungwo mere, gigipiny ma migam je,

³¹ pendi diedipo kodi ri waŋkac ma diedipo, kodi loce ma Wema gi diedipo m'othoko.