Kitawo mar'ario mapa Musa m'ilwoŋo ni Wok 29 - KITAWO MALEŊ Catholic

Cik ma kwoŋo jocway ri Were i wi migam

¹ “Onyo me a gim'ila timo ri Aron kodi wote k'ikwoŋo jo tic ran paka jocway ri Were i wi migam. Kwany rwath dhiaŋ kodi wot rombo ario ma jok'oŋol.

² Or moko ŋano maber loyo, to ma buthow, aka itimi mugat gi mo, man m'ongoy'iye mo, kodi man ma cale bisikwit m'owir gi mo.

³ Kethi jo iy'adita aka imiyan k'imiyo cowirok ma rwath dhiaŋ kodi wot rombo ario.”

⁴ “Ikeli Aron gi wote i dhiot ma Wema ma romo, aka ilwoki jo gi pi.

⁵ Kenyo ruk go gi ruk pa jocway ri Were i wi migam; sati, kanzu ma pendi law pa jocway ri Were i wi migam, law pa jocway ri Were i wi migam, mugowa ma ketho giŋeyo mito pa Were, kodi del.

⁶ Kethi junga i wiye, aka ikethi sangaria maleŋ i wi junga.

⁷ Kenyo kwany mo, ikonji i wiy go, aka iwir go.”

⁸ “Keli wote aka ikethi satere kwoŋ jo,

⁹ tweyi thondhe i pier jo, aka itwey jungin i wi gin. Ameno apaka ibino kwoŋo Aron gi wote. Jo gi nyikway jo jobino tiyo ran paka jocway ri Were i wi migam kicutho.”

¹⁰ “Keli rwath ruwaŋ Wema Maleŋ aka iwaci ri Aron gi wote jowokethi cingi gin i wic mere.

¹¹ Thum kenyo ruwaŋ Rwoth, i dhiot ma Wema Maleŋ

¹² Kwany remo moro gi lwet cingin aka ikethi i tungi migam. Kenyo ikonji m'odoŋ i pendi migam.

¹³ Ma luwo, kwany bor ma umo gigipiny ma iye, kodi adec ma cuny maber loyo, kodi roge ario gi bor ma kwoŋ jo aka iwaŋ i wi migam paka mic ran.

¹⁴ To waŋ riŋo mere, pien, kodi gigipiny ma iye woko ma kambi. Me mic ma kwanyo woko reco pa jocway ri Were i wi migam.”

¹⁵ “Kwany acel kwoŋ wot rombo aka iwaci ri Aron gi wote jowokethi cingi gin i wic mere.

¹⁶ Thum, aka ikwany remo mere ikiri thoko migam, thenge aŋwen je.

¹⁷ Iyaŋ mathindho thindho, lwoki gigipiny ma iye kodi bate, aka ikethi i wi wic mere kodi adec man.

¹⁸ Waŋ gipi i wi migam paka mic ma cemo manyinge. Kur ma mic me sangala an.”

¹⁹ “Kwany wod rombo man ca, aka Aron gi wote jowokethi cingi gin i wic mere.

²⁰ Thum, aka ikwany remo moro ikethi i ithi Aron gi wote maracuc. Lwet cingi gin ma thwon maracuc, gi lwet tiendi gin ma thwon maracuc. Kiri remo m'odoŋ thoko migam.

²¹ Kenyo ikwany remo moro wok kwoŋ ma migam, kodi mo, aka ikir'ikwoŋ Aron gi wote, kodi nangin pajo. Go, wote, gi nangin pajo bino miyirok ran.”

²² “Iŋadi bor ma wod rombo, yiwe ma dibor, bor ma umo gigipiny ma iye, adec maber loyo ma cuny, roge ario, kodi bat mere maracuc.

²³ Wok kwoŋ mugat m'omiyan, kwany mugat acel m'otimi gi mo, acel ma k'otimi gi mo, kodi bisikwit acel.

²⁴ Kethi cemo no i cingi Aron gi wote aka iwaci rijo jowomiyan paka mic ma welo.

²⁵ Kenyo ikwany wok i cingi jo aka iwaŋ i wi cowirok awaŋa paka cowirok ma cemo ran. Kur ma mic me sangala an.”

²⁶ “Kwany aŋakin ma wod rombo aka imiyan paka mic ma welo. Adec me bino bedo aperin.”

²⁷ “K'ikwoŋo jacway ri Were i wi migam, aŋakin kodi bat wod rombo m'ioro ma kwoŋo womiyan paka mic ma welo aka wokethi gicen ri jacway ri Were i wi migam.

²⁸ Adece no labedo ri Aron gi wote paka gima Joisiraili joripo timo, kole obedo adec pa jocway ri Were i wi migam ma Joisiraili jomiyo wok kwoŋ cowirok pajo ma siem, obedo mic pajo ri Rwoth.”

²⁹ “Ruk pa Aron womiy wote joworuki ka go otho, joworuki k'ikwoŋo jo.

³⁰ Wod Aron m'olunji go paka jacway ri Were i wi migam aka ma donjo i Wema Maleŋ tiyo ran i Kabedo Maleŋ woruki ruk me ma ndelo abirio.”

³¹ “Kwany riŋo ma wod rombo m'oor ma kwoŋo Aron gi wote aka itedi i Kabedo Maleŋ.

³² Jowocami i dhiot ma Wema Maleŋ gi mugat m'odoŋ iy'adita.

³³ Jowocami gi m'oor i kwer ma cwako i kwoŋo jo. Jocway ri Were i wi migam kende ama jowocami cemo me rupiri leŋ.

³⁴ Ka riŋo moro kosa mugat moro k'ocami tundo odikin, wowaŋ kiripi camo rupiri leŋ.”

³⁵ “Tim kwer ma kwoŋirok me ri Aron gi wote ma ndelo abirio paka amiyin or.

³⁶ Kisi ndelo iripo miyo thwon paka cowirok, ŋey reco wocwaki. Me bino lonyo migam. Kenyo iwir gi mo woloki maleŋ.

³⁷ Tim gime kisi ndelo ma ndelo abirio. Kenyo migam bino bedo maleŋ kicutho, aka nyatoro kosa gimoro je m'ogey bino limo litho gi meni ma leŋo mere.”

Mic ma kisi ndelo

³⁸ “Kisi ndelo i hongo je, miy cowirok ma nyithindhi rombo ario ma wote ma jo oro acel i wi migam.

³⁹ Miy cowirok ma nyathi rombo ma wode acel odikin, aka acel othieno.

⁴⁰ Gi nyathi rombo ma wode marapena miy bende kilo acel ma moko ŋano m'oruw gi lita acel mangil. Konji lita acel ma vini paka mic.

⁴¹ Miy cowirok ma nyathi rombo ma wode mar'ario gi gigipiny no bende paka odikin. Me mic ma cemo manyinge ran, Rwoth aka kur mere sangala an.

⁴² I hongo je ma bino, mic awaŋa me iripo miyo ruwaŋan i dhiot ma Wema Maleŋ. Kenyo a kam'abino rom'iye gi ji paran t'aluwo gi jo.

⁴³ Kenyo abino romo gi Joisiraili, aka abino loko jo maleŋ gi dwoŋ paran.

⁴⁴ Abino loko Wema Maleŋ gi migam maleŋ, aka abino ketho gicen Aron gi wote tiyo ran paka jocway ri Were i wi migam.

⁴⁵ Abino bedo i dier ji paran Joisiraili, aka abino bedo Were pajo.

⁴⁶ Jobino ŋeyo ni Abedo Rwoth Were m'owodho jo wok i Misir ŋey abedi i dier jo. An abedo Rwoth Were pajo.”