Kitawo mar'ario mapa Musa m'ilwoŋo ni Wok 28 - KITAWO MALEŊ Catholic

Ruk pa jocway ri Were i wi migam

¹ “Lwoŋ omin in Aron gi wote, Nadab, Abihu, Eliazar, kodi Ithamar. Pok jo i dier Joisiraili ŋey jowotiy ran paka jocway ri Were i wi migam.

² Kwoy ri Aron ruk pa jocway ri Were i wi migam, ri dwoŋ kodi ŋono.

³ Lwoŋ jotic je ma jondijo m'amiyo jo nyalo, aka iwaci rijo jowokwoy nangin pa Aron, ŋey womiyan go paka jacway ri Were i wi migam i tic paran.

⁴ Waci rijo jowokwoy mugowa ma ketho giŋeyo mito pa Were, law pa jocway ri Were i wi migam, kanzu, sati m'olok maŋon, junga, kodi thol ma pier jo. Jowokwoy ruk me ri Aron gi wote ŋey jowotiy ran paka jocway ri Were i wi migam.

⁵ Jotic ma jondijo jowoor yer rombo manyabululu, manyarangi ariŋo, kodi m'obokere, uzi ma rangi ma zahabu, kodi nanga mafoth.”

⁶ “Jowokwoy law pa jocway ri Were i wi migam gi yer rombo manyabululu, manyarangi ariŋo, kodi m'obokere, uzi ma rangi ma zahabu, kodi nanga mafoth, aka wokwoy maŋon.

⁷ Wobedi gi thondhe ario i goke m'omakere gi thenge m'inyalo tudo kanyacel.

⁸ Wokwoy'iye thol gi gigipiny acel, ŋey jowobedi ma tim acel gi law pa jocway ri Were i wi migam.

⁹ Kwany telin ario ma welo m'obokere obokere aka indik'iye nyingi wot Yakobo apar g'ario,

¹⁰ cungo kwoŋ nywolirok pajo, aucel i tele acel, kodi aucel i tele man.

¹¹ Nwaŋ jandijo ma pac wondiki nyingi wot Yakobo aka ikethi i miango ma zahabu.

¹² Kethi jo i thol ma goki law pa jocway ri Were i wi migam jowocungi ri nonin apar g'ario ma Isiraili. I nger me Aron bino tiŋo nyingi jo i goke, ŋey An, Rwoth abino poyo ji paran noknok.

¹³ Tim miango ma zahabu ario

¹⁴ kodi lijegere ario wok kwoŋ zahabu macil m'otudi p'adasa, aka iriw jo i miango.”

Mugowa ma ketho giŋeyo mito pa Were

¹⁵ “Tim ri jadwoŋ pa jocway ri Were i wi migam mugowa ma ketho giŋeyo mito pa Were. Wobedi ma tim acel kodi law pa jocway ri Were i wi migam aka gi kwoco acel.

¹⁶ Wobedi gi thenge je ma jorom aka wodol dirio, boro mere wobedi inci abuŋwen, aka laco bende inci abuŋwen.

¹⁷ Ican bol aŋwen ma telin ma welo. I bol marapena can tele m'obokere, tele manyarangi oliv, kodi tele manyarangi aremo.

¹⁸ I bol mar'ario can tele manyaboke pendi, tele manyabululu, kodi diamondi.

¹⁹ I bol mar'adek cani telin m'obokere nyamicungwa, tele m'oruwo rangi matar g'akwaro kodi tele manyarangi ariŋo.

²⁰ I bol mar'aŋwen can tele manyatongweno, tele m'obokere obokere, kodi tele manyaboke pendi. Can joje i miango ma zahabu.

²¹ Kwoŋ kisi telin apar g'ario me wondik'iye nyingi acel kwoŋ wot Yakobo, wocungi ri nonin ma Isiraili.

²² Ri mugowa ma ketho giŋeyo mito pa Were tim lijegerin wok kwoŋ zahabu macil, m'otudi p'adasa.

²³ Aka itimi petin ario gi zahabu t'itweyo jo i kisi sonda ma malo ma mugowa ma ketho giŋeyo mito pa Were,

²⁴ aka itwey adasin ario ma zahabu i petin ario.

²⁵ Tweyi gike ario ca mar'adasin i miangin ario, aka i nger me tweyi jo yunyime i thol ma goki law pa jocway ri Were i wi migam.

²⁶ Kenyo tim petin ario ma zahabu aka itwey i kisi sonda ma piny ma mugowa ma ketho giŋeyo mito pa Were i gike ma iye cegin gi law pa jocway ri Were i wi migam.

²⁷ Tim petin ario kendo ma zahabu aka itwey jo piny ma yunyim thol ario ma goki law pa jocway ri Were i wi migam cegin gi kama riwer'iye gine malo ma thol m'otudi.

²⁸ Tweyi petin ma mugowa ma ketho giŋeyo mito pa Were i petin ma law pa jocway ri Were i wi migam g'adasa manyabululu, ŋey mugowa ma ketho giŋeyo mito pa Were wobedi i wi thol aka wokiri wolwogere.”

²⁹ “Ameno ka Aron odonjo i Kabedo Maleŋ, go bino ruko mugowa ma ketho giŋeyo mito pa Were m'ondik'iye nyingi nonin ma Isiraili, ŋey An Rwoth, abino poyo ji paran noknok.

³⁰ Kethi Urim gi Thumim i mugowa ma ketho giŋeyo mito pa Were, ŋey Aron wotiŋo jo ka go bino i Kabedo Maleŋ. I hongo paka ameno go ripo ruko mugowa ma ketho giŋeyo mito pa Were, ŋey woŋeyo mito pa Were ri Joisiraili.”

Ruk pa jocway ri Were i wi migam man

³¹ “Kanzu ma ruko piny ma law pa jocway ri Were i wi migam ripo wotim gi yer rombo manyabululu.

³² Wobedi gi hoŋ i wiye, aka hoŋ no woridhi kodi gitweyo m'okwoy ŋey wokiri woyec.

^33-34 Thoko rinda mere gipi wokwoy cal ma pomo gi yer rombo manyabululu, manyarangi ariŋo, kodi m'obokere, m'oluwere g'olaŋere ma zahabu.

³⁵ Aron bino ruko kanzu me ka tiyo paka jacway ri Were i wi migam, ka bino ruwaŋan i Kabedo Maleŋ kosa ka eye, ywak p'olaŋ lawinjere, aka kilaneko go.”

³⁶ “Aka itimi sen gi zahabu macil aka indik'iye ni, ‘Leŋo ri Rwoth.’

³⁷ Tweyi ruwaŋ junga gi thol manyabululu.

³⁸ Aron woruki i nyime, ŋey An Rwoth, abino jolo mic je ma Joisiraili jomiyan, makada nende ji jotimi raco ka jomiyan.”

³⁹ “Kwoy sati pa Aron kodi junga gi nanga mafoth, kodi thol bende m'okwoy maŋon.”

⁴⁰ “Kwoy ri wot Aron satere, thondhe, kodi jungin, ma miyo dwoŋ kodi ŋono.

⁴¹ Ikethi nangin me kwoŋ omin in Aron gi wote. Kenyo ilami jo aka ikethi ran jo gicen t'iwiro jo gi mo ŋey jowotiy ran paka jocway ri Were i wi migam.

⁴² Tim rijo palere gi nanga mafoth ma wok i pier jo tundo i bat jo, ŋey jokiri jowothangere.

⁴³ Aron gi wote joripo ruko noknok ka jodonjo i Wema Maleŋ kosa ka jocore i migam tiyo paka jocway ri Were i wi migam i Kabedo Maleŋ, ŋey wokiri woneki jo ro thangirok. Me cik ri Aron gi nyikwaye cil gi cil.”