Kitawo mar'ario mapa Musa m'ilwoŋo ni Wok 26 - KITAWO MALEŊ Catholic

Wema ma bedo pa Rwoth

¹ Wotim ran Wema maleŋ, Wema m'alabed'iye, g'adece apar ma nangin mafoth m'okwoy gi yer rombo manyabululu, manyarangi ariŋo, kodi m'obokere. Wokwoy jo gi cal pa cwec ma jobwombi gin.

² Wotim kisi adec mita apar g'ario mabor, aka mita ario malac.

³ Wokwoy abic kanyacel, kodi abic man kanyacel.

⁴ Wokwoy kondin ma nanga manyabululu i dhok adec ma woko i kisi adec abic.

⁵ Wokwoy kondin piero abic iy'adec acel, kodi kondin piero abic iy'adec man.

⁶ Wotim siragetere piero abic gi zahabu ma riwo adec m'okwoy kadirio kanyacel.

⁷ “Wotim giumo Wema maleŋ wok kwoŋ adec nangin apar g'acel m'otimi gi yer diel.

⁸ Wotim jo marom, mita apar g'adek i boro, kodi mita ario i laco.

⁹ Wokwoy abic kanyacel, aka abic man bende. Adec acel m'odoŋ wodol ruwaŋ Wema maleŋ.

¹⁰ Wokwoy kondin piero abic i tok adec acel m'okwoy kanyacel, kodi iy'adec man bende.

¹¹ Wotim siraget ma ywel piero abic t'iketho i ithi adec ario m'okwoy kanyacel woriw jo.

¹² Woŋaw adec acel m'odoŋ yucen ma Wema maleŋ.

¹³ Adec yadi m'odoŋ mabor i kisi thenge woŋaw i thengi Wema maleŋ woum.”

¹⁴ “Wotim giumo man kendo, acel ma pien wod rombo m'owir gi rangi m'obokere, kodi man ma yer diel, ma geŋo woko.”

¹⁵ “Wotim miango wok kwoŋ mbawo kasia ri kor Wema maleŋ.

¹⁶ Kisi miango wobedi mita aŋwen i boro, aka laco wobedi inci piero ario g'abirio,

¹⁷ kodi akare ario manyalo yeyo jo riwirok. Kisi miango wobedi gi akare.

¹⁸ Wotim miangin piero ario ri thenge ma yupiny,

¹⁹ gi pende piero aŋwen ma feza, pende ario i ŋangi kisi miango ma mako akare mere ario.

²⁰ Wotim miangin piero ario ri thenge ma yumalo,

²¹ gi pende piero aŋwen ma feza, ario i ŋangi kisi miango.

²² Ri yucen ma Wema yupodho ceŋ, wotim miangin aucel,

²³ kodi miangin ario ri kisi sonda.

²⁴ Miangin ma kisi sonda iripo riwo jo wok malo kiri piny. Miangin ario ma jotimo sondin iripo timo jo ama.

²⁵ Ameno joje jowobedi miangin aboro gi pende apar g'aucel, ario i ŋangi kisi miango.”

²⁶ “Wotim yen ariwa apar g'abic wok kwoŋ mbawo kasia, abic ri miango ma thenge acel ma Wema maleŋ

²⁷ abic ri miango ma thenge man, aka abic ri miango ma thenge ma yupodho ceŋ, yucen.

²⁸ Ma diere, i kor miango woluwi wok i gike tundo i gike ma Wema.

²⁹ Woum miangin gi zahabu aka worwaki gi petin ma zahabu womaki yen ariwa, ma bende woum gi zahabu.

³⁰ Wotim Wema i can m'anyuthin wi got.”

³¹ “Wotim nanga ma liero gi nangin mafoth, kodi yer rombo manyabululu, manyarangi ariŋo, kodi m'obokere. Loki maŋon i cal pa cwec ma jonitie gi bwombe gin.

³² Woŋaw iy'asur aŋwen ma mbawo kasia m'oum gi zahabu, gi siragetere ma zahabu, kwoŋ pende aŋwen ma feza.

³³ Wolier nanga m'iliero i ŋangi bol ma siragetere ma wi kisul Wema, aka wokethi Kakan ma Cikirok m'otiŋo telin mapando ario yuŋeye. Nanga m'olier bino poko Kabedo Maleŋ kwoŋ Kabedo Maleŋ Loyo.

³⁴ Wokethi giumo i wi Kakan ma Cikirok.

³⁵ Woko ma Kabedo Maleŋ Loyo, wokethi meza yumalo ma Wema kodi raŋaw tala yupiny.”

³⁶ “Ri dhiot ma Wema wotim nanga ma liero gi nanga mafoth, gi yeri rombo manyabululu, manyarangi ariŋo, kodi m'obokere aka woloki maŋon gi kwoyo gi piso.

³⁷ Ri nanga ma liero me wotim asu abic wok kwoŋ mbawo kasia to iumo gi zahabu aka worwaki gi siragetere ma zahabu. Wotim rijo pende abic ma ywel.”