Kitawo mar'ario mapa Musa m'ilwoŋo ni Wok 24 - KITAWO MALEŊ Catholic

Ridho Cikirok

¹ Rwoth owaco ri Musa ni, “Biye bongan wi got malo, in kodi Aron, Nadab, Abihu, kodi jodongo piero abirio ma Isiraili, aka ma fodi wikitundo, kule win wilaman.

² In kendin iŋat'ibin cegin gi Rwoth, to ji man jokiri jowocore cegin, aka ji jokiri jowobin malo gi jo.”

³ Musa obino to waco ri ji je Or pa Rwoth gi cik je, aka ji je jodwoko akwora ni, “Walatimo gima Rwoth owaco je.”

⁴ Musa ondiko piny Or pa Rwoth je. Yawere odikin maŋic ogeto migam ri Rwoth i tiendi got aka oketho telin apar g'ario, acel ri kisi nonin apar g'ario ma Isiraili.

⁵ Kenyo ooro yac, aka jomiyo Rwoth cowirok awaŋa to jomiyo megikwe paka cowirok ma siem.

⁶ Musa okwanyo adec ma remo mar'ogwaŋe aka oketho i kalaya aka man okiro i wi migam.

⁷ Kenyo okwanyo kitawo ma cikirok m'oyido ondiki iye Or pa Rwoth to soma ri ji, aka jodwoko ni, “Wabino timo kisi gima Rwoth owaco aka wabino winjo.”

⁸ Musa okwanyo remo to kiro kwoŋ ji to waco ni, “Me remo ma ridho cikirok ma Rwoth otimo gi win munyo omiyo Or me je.”

⁹ Musa, Aron, Nadab, Abihu, kodi jodongo piero abirio ma Isiraili joidho malo wi got

¹⁰ aka joneno Were pa Isiraili. I par tiende oyido nitie gima cale tele ma welo manyabululu pa polo m'ilwoŋo ni Safire.

¹¹ Were k'omiyo go litho jodongo ma Isiraili, joneno Were, aka jocemo to jomedho kanyacel.

Musa wi got Sinai

¹² Rwoth owaco ri Musa ni, “Biye malo bongan wi got, aka ikuri kenyo. Alamiyin telin mapando ario manitie iye cik gi Or m'atieko ndiko ma fonjo jo.”

¹³ Ameno Musa oay gi jakony pere Yosuwa, aka Musa oidho wi got pa Were.

¹⁴ Aka owaco ri jodongo ni, “Kur win ka, cuka wanodwoki bongi win kendo, aka neni, Aron gi Hur jonitie gi win ŋata nitie gi teko wokidhi bongi jo.”

¹⁵ Musa oidho wi got aka pondeponde oumo.

¹⁶ Dwoŋ pa Rwoth obino wi got Sinai to pondeponde umo got ma ndelo aucel. I ndelo mar'abirio Rwoth olwoŋo Musa wok i pondeponde.

¹⁷ Onyo cal madwoŋ pa Rwoth oyido cale mac maliel wi got i waŋ Joisiraili.

¹⁸ Aka Musa odonjo i pondeponde to idho wi got. Musa obedo wi got ma ndelo piero aŋwen, wor gi odieceŋ.