Kitawo mar'ario mapa Musa m'ilwoŋo ni Wok 19 - KITAWO MALEŊ Catholic

Joisiraili i Got Sinai

^1-2 Joisiraili joeye Refidim, aka i ndelo marapena ma dwe mar'adek rumacen ma wok i Misir jotundo i thim ma Sinai. Kenyo joketho kambi i tiendi got Sinai.

³ Aka Musa oidho wi got Sinai romo gi Were. Rwoth olwoŋo go gi wi got aka owaco rigo ni, “Waci ri Joisiraili, nyikway Yakobo ni,

⁴ Wineno gima An Rwoth atimo ri Jomisir kodi nger m'atiŋo win'iye paka aŋo tiŋo nyithindhe i bwombe to akelo win ka.

⁵ Onyo riameno, ka winowinji dwondan to wikuro cikirok paran, wilabedo ji paran won. Piny gibe aparan, to wibino bedo ji paran m'ayero,

⁶ aka wilabedo ran ker pa jocway ri Were i wi migam aka piny maleŋ.”

⁷ Ameno Musa obino to lwoŋo jotel pa ji je, aka owaco rijo wac ma Rwoth oyido omiyo go or ni wowaci.

⁸ Kenyo ji jodwoko akwora ni, “Kisi gima Rwoth owaco wabino timo.” Aka Musa odwoko wac pa ji ri Rwoth.

⁹ Aka Rwoth owaco ri Musa ni, “Neni, abino bongin i pondeponde m'opoto, ŋey ji jowoyeyin wok pama kidho yuwaŋe.” Musa owaco ri Rwoth gima ji jodwoko.

¹⁰ Aka Rwoth owaco ri Musa ni, “Kadhi bongi ji aka iwaci rijo jowolokere macil konon gi dikin ma lamo. Joripo lwoko nangin pajo

¹¹ aka jowoyikere i ndelo mar'adek. I ndelo no abino loro piny wi got Sinai, kama ji je jonyalo nenan iye.

¹² Cer kew thoko got ma ji jokiripi kalo, aka wac rijo jokiri jowoidhi wi got kosa jowocore cegin gine. Ka nyatoro okethi tiende, iripo neko go.

¹³ Wolili go gi tele, kosa g'asere m'ongoye ŋat'ogeyo go. Kosa obedi nyatoro kosa ogwaŋ, iripo neko. To k'okudhi gwara, kenyo ji jowoidhi malo wi got.”

¹⁴ Kenyo Musa oloro wok wi got aka owaco ri ji nike jowoyikere ri lamo. Ameno jolwoko nangin pajo.

¹⁵ Aka Musa owaco ri ji ni, “Yikere win i ndelo mar'adek, aka wongoye ŋata wonindi gi cege kutho.”

¹⁶ Odikin ma ndelo mar'adek obedo mwoc koth gi lithkoth, aka pondeponde m'opoto oneno wi got, aka dwondi gwara ma malo owinjere. Ji je i kambi jokirin gi lworo.

¹⁷ Kenyo Musa otelo ji wok i kambi romo gi Were, aka jocungo i tiendi got.

¹⁸ Yiro oyido otweyo got gibe, kwoŋbedo Rwoth oloro iye i mac. Yiro oduny malo pa yiro ma wok i mac madwoŋ, aka ji je jokirin swa.

¹⁹ Dwondi gwara omedere malo. Musa oluwo aka Rwoth odwoko go gi mwoc koth.

²⁰ Rwoth oloro piny wi got Sinai aka olwoŋo Musa malo wi got. Musa oidho malo

²¹ aka Rwoth owaco ri Musa ni, “Lori piny igwoki ji jokiri jowokal kew bino nenan rupiri madit kwoŋ jo jobino tho.

²² Kiri jocway ri Were i wi migam ma jobino bongan je joripo lokirok macil, kosa abino miyo jo gir'acula.”

²³ Musa owaco ri Rwoth ni, “Ji jokinyal bino malo, kwoŋbedo in won imiyo wan or nike water got paka maleŋ aka wacer kew thoko.”

²⁴ Rwoth odwoko ni, “Lori piny ikeli Aron kodin. To jocway ri Were i wi migam gi ji jokiripi kalo kew bino bongan, kosa abino miyo jo gir'acula.”

²⁵ Ameno Musa oloro piny to waco ri ji gima Rwoth owaco.