Kitawo mar'ario mapa Musa m'ilwoŋo ni Wok 1 - KITAWO MALEŊ Catholic

Joisiraili jocandere i Misir

¹ Me nyingi wot Yakobo ma jokadho i Misir kodi Yakobo, joje gi pecin pajo.

² Ruben, Simeo, Levi, kodi Yuda.

³ Isakar, Zebulun, kodi Benyamin,

⁴ Dan kodi Nafital, Gad kodi Aser.

⁵ Welo pa nyikway Yakobo je oyido piero abirio, aka Yakobo oyido nitie i Misir.

⁶ Kenyo Yozefu gi wutmin kodi luse pere je jotho woko.

⁷ To nyikway Yakobo jolimo nyithindho kweth ma jomedere i welo aka jolokere matek to jomore i Misir.

⁸ Kenyo kere manyen m'oyido fodi k'oŋeyo Yozefu, olimo dwoŋ i Misir.

⁹ Aka owaco ri ji pere ni, “Neni, Joisiraili jokweth swa aka jotek loyo wan.

¹⁰ Biye win watiy gi jo gi gwayo, ka k'obedo ameno jobino more, aka ka lweny ocakere, jobino riwirok gi jokwor mawan to jolwenyo gi wan to jokwale wok i piny mawan.”

¹¹ Ameno joketho joromi jo timo tic matek dhumo jo gi miyo jo litho gi tic aka Joisiraili jogeto ri Farawo tindin ario madongo, Pithom gi Rameses paka kakan.

¹² To paka jomedo diyo Joisiraili, apaka bende Joisiraili jomedere i welo. Aka Jomisir oyido jolworo Joisiraili.

¹³ Ameno Jomisir joromo jo tic gi gwayo,

¹⁴ aka joloko kwo pajo magway gi tic matek, geto kodi timo tic nger je i ndelin pajo. I tic pajo je jomiyo jo timo m'ongoye mako gi jo wor.

¹⁵ Kenyo kere ma Misir owaco ri mon ma jocolo mon ma nyingi jo Sifira kodi Puwa ni,

¹⁶ “Ka wicolo mon Joebulaniya i kacolo mon, ka jonywolo nyathi majayac neki win, to k'obedo manyako weyi win wokwo.”

¹⁷ To mon ma jocolo mon oyido jolworo Were, aka jok'otimo paka kere ma Misir omiyo jo or, aka joweyo nyithindho mayac kwo.

¹⁸ Ameno Farawo olwoŋo mon ma jocolo mon aka openjo jo ni, “Raŋo witimo gime, wiweyo nyithindho mayac kwo?”

¹⁹ Jodwoko go ni, “Rupiri mon Joebulaniya jokicale gi mon Jomisir; kole jo jonywol i yoto, aka nyithindho pajo jonywolo mafodi acel kwoŋ wan k'otundo bongi jo.”

^20-21 Rupiri mon ma jocolo mon oyido jolworo Were, Were onyutho jo bero to miyo jo pecin pajo wegi. Aka Joisiraili jomedere to jolokere matek.

²² Kenyo Farawo omiyo ji pere cik ni, “Kisi nyathi majayac ma Joebulaniya jonywolo bol win i malawa Nayil, to manyir mere weyi win jowokwo.”