Kitawo mar'abic mapa Musa m'ilwoŋo ni Cik 9 - KITAWO MALEŊ Catholic

Gima wok i gwenyirok kwoŋ Were

¹ Winji, Awi Isiraili! Wicegin ŋado Yordan konon, kadho donjo riemo nonin ma jolac aka jotek loyo win, tindin madongo malac, m'otinda tundo i polo,

² ji ma jotek aka jolile, nyikway Anakim, ma wiŋeyo jo. Witieko winjo k'iluwo kwoŋ jo ni, “Ŋa manyalo ciro nyikway Anakim?”

³ Ŋey win konon me nike Rwoth Were mewin ama ŋado telo yuwiy win paka mac ma reyo woko, go lakikengila jo cowo woko jo ruwaŋ win, ŋey wiriem jo kodi reyo woko jo piyo, paka Rwoth otieko ciko win.

⁴ Ka Rwoth Were mewin otieko riemo woko jo ruwaŋ win, wikiri wiwaci ni, “Obedo ro bedo gi tiro mawan am'omiyo Rwoth okelo wan mako lowo me.” To obedo ro kidakana pa nonin me am'omiyo Rwoth riemo woko jo ruwaŋ win.

⁵ K'obedo kwoŋbedo witimo gim'otire kosa cuny win cil am'omiyo wikadho donjo lunjo lowo pajo, to ro kidakana pa nonin me, Rwoth Were mewin riemo woko jo ruwaŋ win, ŋey wokethi i kare gim'ociko i kwoŋirok ri kwarere mewin Abraham, Isaka, kodi Yakobo.

⁶ Ŋey win nike Rwoth Were mewin kimiy win lowo maber me lunjo kwoŋbedo winitie gi tiro; kole wibedo ji ma jowictek.

⁷ Poyi win aka wicwil okir omaki win gi nger ma wikwiny'iye keme pa Rwoth Were mewin i thim; witieko gwenyirok kwoŋ Rwoth wok i ndelo ma wiwok i lowo ma Misir cuka witundo i kabedo me.

⁸ Kiri i Horeb wikwinyo keme pa Rwoth, aka Rwoth omako nge swa gi win m'oyido oyikere reyo woko win.

⁹ Munyo aidho malo wi got jolo telin mapando ario, telin ma cikirok ma Rwoth otimo gi win, adoŋ wi got ma odieceŋ piero aŋwen kodi wor piero aŋwen; akicamo cemo kosa madho pi.

¹⁰ Aka Rwoth omiyan telin mapando ario m'ondik'iye gi lwet cingi Were; ondik'iye wac je ma Rwoth oyido oluwo riwin i got wok i mac i ndelo ma cokirok.

¹¹ Rumacen ma odieceŋ piero aŋwen kodi wor piero aŋwen, Rwoth omiyan telin mapando ario, telin ma cikirok.

¹² Rwoth owaco ran ni, “Ay malo, redi piny piyo wok ka, kole ji m'ikelo wok i Misir jotimo gikidakana. Jokwako swa wirok kwoŋ yo m'amiyo jo or luwo, jotimo cal m'onyel.”

¹³ Rwoth omedere waco ran ni, “Atieko neno nike ji me adieri jobedo jowictek.

¹⁴ Weyere kodan ŋey arey woko jo aka arey woko nyingi jo wok i pendi polo; aka alalokin nono matek aka mathoth loyo jo.”

¹⁵ Awire gik piny wok wi got, kareno got liel mac, aka oyido atiŋo telin mapando ario ma cikirok i cingan.

¹⁶ Gikenyo aneno nike adieri oyido witimo reco kwoŋ Rwoth Were mewin, gi timo cal ma rwath m'onyel, oyido wiwire piyo kwoŋ yo ma Rwoth omiyo win or luwo.

¹⁷ Amako telin ario aka abolo jo wok i cingan ario, to ŋinyere ruwaŋ win.

¹⁸ Aka ariere ruwaŋ Rwoth kendo, ma odieceŋ piero aŋwen kodi wor piero aŋwen; akicamo cemo kosa amadho pi, ro reco je m'oyido witimo, miyo Rwoth nge gi timo gimarac ruwaŋe.

¹⁹ Kole oyido abedo gi bwok nike nge ma Rwoth oyido ogut gine gi win oyido ger manyalo reyo woko win. To Rwoth owinjan i hongo no bende.

²⁰ Rwoth omako nge swa gi Aron m'oyido oyikere reyo woko go, t'akwayo ri Aron i hongo acel no bende.

²¹ Akwanyo gireco mewin ma witimo, cal ma rwath, aka awaŋo gi mac t'aŋinyo woko, t'arego swa, cuka olokere fukefuke; aka akonjo i pi ma mol loro piny ma got.

²² I Tabera bende kodi i Masa, kodi i Kibroth Hatava, wikwinyo keme pa Rwoth.

²³ Aka munyo Rwoth ooro win wok i Kades Barineya, k'awaco ni, “Kadhi win malo wimaki lowo m'atieko miyo win.” Wigwenyere kwoŋ or pa Rwoth Were mewin, wikigeno go, kosa winjo dwonde.

²⁴ Witieko bedo jogwenyirok kwoŋ Rwoth wok i ndelo m'aŋey'iye win.

²⁵ Ariere piny ruwaŋ Rwoth ma odieceŋ piero aŋwen kodi wor piero aŋwen kwoŋbedo Rwoth oyido otieko miyere reyo woko win,

²⁶ akwayo Rwoth k'awaco ni, “Rwoth Were, ikir'irey woko ji ma jobedo lim perin won, ji m'ibotho gi meni perin, ji m'iwodho wok i Misir gi cingin ma meni.

²⁷ Poyi ŋecin perin Abraham, Isaka, kodi Yakobo, ikir'ipar kwoŋ wictek pa ji me, kidakana pajo kodi reco pajo,

²⁸ kosa piny m'iwodho wan wok'iye lawaco ni, ‘Kwoŋbedo Rwoth k'onyalo kelo jo i lowo m'ociko jo, aka kwoŋbedo odak jo, owodho jo to weyo jo tho i thim.’

²⁹ Jobedo ji perin, alunja perin won, m'iwodho gi meni perin madwoŋ kodi cingin m'oyare.”