Kitawo mar'abic mapa Musa m'ilwoŋo ni Cik 8 - KITAWO MALEŊ Catholic

Lowo maber lunjo

¹ Or me je m'amiyo win konon wiripo kuro gi kinen, ŋey winyal kwo aka wimedi nyay, to wikadho donjo to wibedo i lowo ma Rwoth ociko i kwoŋirok ri kwarere mewin.

² Poyi win royo je ma Rwoth Were mewin otieko telo win oro piero aŋwen me i thim, mwolo win, temo win, ŋeyo gima nitie i cuny win, k'inen oyido winyalo kuro or pere kosa be.

³ Go omwolo win gi miyo kec neko win, to pidho win gi mana, ma win kosa kwarere mewin oyido kuya, ma miyo win ŋeyo nike dhano kikwo gi cemo kende, to gi wac je ma wok i dhok Rwoth.

⁴ Nangin mewin k'oti aka tiendi win k'obomere ma oro piero aŋwen me.

⁵ Ŋey win i cuny win nike paka janywol tiro nyathi, apaka Rwoth Were mewin tiro win.

⁶ Riameno kur win or pa Rwoth Were mewin, gi wotho i royo pere kodi lworo go.

⁷ Kole Rwoth Were mewin kelo win i lowo maber, lowo manitie gi waŋ pi, jwombe, kodi pi ma wok piny wok i milelo kodi i wi tendere,

⁸ lowo ma nyak ŋano kodi bale, nyingi vini kodi nyandere, pomo, yen oliv kodi mo kic.

⁹ Lowo ma wilacam'iye cemo ma romo, kama wikilacando gimoro, lowo ma telin mere obedo nyweny aka wilakunyo lowo ma thedho nyweny.

¹⁰ Wilacemo to wiyeŋ aka wilapako Rwoth Were mewin ri lowo maber ma go miyo win.

Gwokirok kwoŋ wicwil gi Rwoth

¹¹ Kure win wiwin okir wowili gi Rwoth Were mewin, ka wiweyo mako or pere, fonji kodi cik, m'amiyo win konon.

¹² Ka witieko cemo to wiyeŋ to wigeto udi mabeyo to wibed'iye,

¹³ ka dhok kodi mwendi mewin jotieko medirok, to feza gi zahabu mewin medere, kodi gima winitie gine je,

¹⁴ wikiri wipakere, to wicwil mako win gi Rwoth Were mewin, m'owodho win wok i lowo ma Misir, wok i ot ma twec.

¹⁵ Go m'otelo win luwo i thim madwoŋ ma kelo lworo, lowo m'othwo manitie iye thwole ma jonitie gi kwir kodi thwol gwokere. Go omiyo pi wok riwin i tele ma lwanda.

¹⁶ Go m'opidho win i thim gi mana ma kwarere mewin oyido jokuya, mwolo win kodi temo win, aka i cowe timo riwin bero.

¹⁷ Gwokere win waco ni, “Meni paran kodi teko ma cingan won am'okelo ran lim me.”

¹⁸ To poyi win Rwoth Were mewin, kole go ama miyo win meni ma nwaŋo lim, ŋey woridhi cikirok pere m'okwoŋere ri kwarere mewin, paka go timo konon.

¹⁹ Ka wicwil omaki win gi Rwoth Were mewin to wiluwo werin man, tiyo kodi lamo jo, apiro win konon nike wilarere adieri.

²⁰ Paka nonin ma Rwoth reyo woko ruwaŋ win, ameno wilarere, kwoŋbedo wikinyalo winjo dwondi Rwoth Were mewin.