Kitawo mar'abic mapa Musa m'ilwoŋo ni Cik 33 - KITAWO MALEŊ Catholic

Musa miyo nonin ma Isiraili silwany

¹ Me silwany ma Musa, dhano pa Were omiyo Joisiraili mafodi go k'otho.

² Rwoth oluwo wok i Sinai, aka oloro kwoŋ jo wok i Edom, aka omenyo ji pere wok i Got Paran. Jomalaika gana apar oyido jonitie gi go, gi mac maliel i cingi go maracuc.

³ Adieri, go omaro ji pere, jomaleŋ perin je jobedo i cingin, joŋanjo ka tiendin, itelo jo gi wac perin.

⁴ Musa omiyo wan or, paka lim ri nyikway Yakobo.

⁵ Go obedo kere i Yesurun, munyo jodhum kodi nonin pa Isiraili, jocokere kanyacel.

⁶ Weyi Ruben wokwo, aka wokiri wotho, aka weyi jokiri jowobedi manok i welo.

⁷ Ri Yuda go owaco ama: Winji dwondi Yuda, Awi Rwoth, aka keli go bongi ji pere, loki cingi go matek, gi cingi go opiemo aka bedi kony pere kwoŋ jokwor pere.

⁸ Ri Jolevi go owaco ni: Thumim perin kodi Urim perin, obedo gi jacwo ma winjin, m'itemo i Masa, m'ipiemo gine i pi ma Meriba.

⁹ M'owaco kwoŋ min kodi bamere ni, “Fodi akineno go.” Kosa k'oyeyo wutmin kosa ŋeyo nyithindho pere, kole joluwo wac perin, aka jokuro cikirok perin.

¹⁰ Jolafonjo Yakobo kodi Isiraili cik perin. Jolaketho buban ruwaŋin, kodi mic awaŋa gikululu i wi migam perin.

¹¹ Rwoth, miy gipere silwany, ijoli tic ma cingi go, ŋiny pier jokwor pere, jono ma jodak go, ŋey jokiri jowoay kendo.

¹² Kwoŋ Benyamin go owaco ni: “Jamitirok pa Rwoth ywomere i siem, kwonga go ndelo gipi, aka ywomere i dier goke.”

¹³ Ri Yozefu go owaco ni: “Rwoth womiy lowo pere silwany, gi mic ma welo wok i polo malo, wok i thoyo kodi pi ma wok piny.

¹⁴ G'olemo mabeyo macek gi ceŋ, gi ranyak mabeyo ma kisi dwe.

¹⁵ Gi ranyak mabeyo ma wi gote macene, kodi dito ma tendere ma cil gi cil.

¹⁶ Gi mic ma welo ma piny gibe, gi wor pa ŋat'obedo i dudi weyi me wobin i sangaria ma wi Yozefu, i wi ŋat'okethi gicen kwoŋ wutmin go.

¹⁷ Dwoŋ pere cale paka apa rwath makayo, tunge cale paka tungi merikwa madudi, guro gine nonin, dhiro ji kanyacel kiri i gike ma piny, Joefrayim gana apar, Jomanase ganin.”

¹⁸ Ri Zebulun go owaco ni: Fore, Awi Zebulun, i wok woko perin, aka Isakar, i wema perin.

¹⁹ Jolalwoŋo nonin wi got pajo, koro jolamiyo cowirok m'otire, kole jolacwiyo cwe ma nam, kodi lim m'opanere i kwoyo.

²⁰ Ri Gad go owaco ni, Silwany ri ŋata bupo Gad! Gad kwo paka simbwor, aka go yeco cingi jo gi sangaria ma wic.

²¹ Go oyero maber loyo paka apere, kole kenyo okoy adec pa jamituka, aka go obino gi jotel pa ji, go otimo tiro pa Rwoth, kodi thumo banja pere ri Isiraili.

²² Ri Dan go owaco ni: “Dan cale paka nyathi simbwor, ma por wok i Basan.”

²³ Ri Nafital go owaco ni: “Awi Nafital, opoŋ gi wor, opoŋ gi silwany pa Rwoth, aka lunjo yupodho ceŋ kodi yupiny.”

²⁴ Ri Aser go owaco ama: Wot Aser josilwany loyo, weyi go wonwaŋi wor bongi wutmin, aka woluthi tiende i mo.

²⁵ Petin perin labedo nyweny kodi ywel, aka paka ndelo perin bedo, apaka meni perin bende.

²⁶ Ongoye ŋata cale Were, Awi Yesurun, ma gweco i polo ri kony perin, i dwoŋ pere i pondeponde.

²⁷ Were ma cil gi cil obedo kabwok perin, cinge ma cil gi cil nitie i pendi piny, go lariemo woko jakwor perin ruwaŋin, aka owaco ni, “Reyi woko.”

²⁸ Ameno Isiraili labedo kakende i siem, i waŋ pi pa Yakobo, i lowo ma ŋano kodi vini manyen, kama polo pere thono thoyo piny.

²⁹ Sangala, Awi Isiraili! Ŋa ma cale win, ji ma Rwoth obotho, kwot ma kony mewin, aka abor maloyo mewin! Jokwor mewin jolabino gi twodo bongi win, aka wilanyono ŋey jo.