Kitawo mar'abic mapa Musa m'ilwoŋo ni Cik 30 - KITAWO MALEŊ Catholic

Isiraili ladwoko bongi Rwoth

¹ Gigipiny me je labino kwoŋ win, silwany je kodi lam je, m'aketho ruwaŋ win, aka wilapoyo i cuny win, i dier nonin je kama Rwoth lajwang'iye win.

² Aka wiladwoko bongi Rwoth Were mewin, to wiwinjo dwondi go, paka amiyo win or konon, win kodi nyithindho mewin, gi cuny win je kodi kwo mewin je.

³ Aka Rwoth Were mewin ladwoko win wok i twec mewin, to mako gi win wor, aka go lawire to coko win wok i dier nonin kama Rwoth Were mewin okedh'iye win koro.

⁴ Makada nende bedi nike go oyido ojwango win i gike ma polo, Rwoth Were mewin lacoko win, aka go ladwoko win wok koro.

⁵ Rwoth Were mewin lakelo win i lowo ma kwarere mewin jolunjo, wilalunjo, aka lakadho maber gi win, aka go laloko win mathoth loyo.

⁶ Rwoth layomo cuny win kodi cuny nyikway win, ŋey wimar Rwoth Were mewin gi cuny win je kodi kwo mewin je, ŋey wibedi makwo.

⁷ Rwoth laketho lam me je kwoŋ jokwor mewin kodi jono ma jodak win, ma jomiyo win litho.

⁸ Aka wilagik winjo dwondi Rwoth kodi timo or pere je paka amiyo win or konon.

⁹ Rwoth Were mewin lamiyo win ŋaŋo mathoth i tic ma cingi win je, nywol mewin, nywol p'ogwaŋe mewin kodi ranyak ma lowo mewin. Kole lakisangala Rwoth miyo win bero paka osangala go miyo kwarere mewin bero.

¹⁰ Ka winowinji dwondi Rwoth Were mewin, kuro or pere kodi fonji pere m'ondiki i kitawo ma cik me, ka winowire bongi Rwoth Were mewin gi cuny win je kodi kwo mewin je.

¹¹ Kole or m'amiyo win or kwoŋe konon me kitek riwin, kosa kibor gi win.

¹² Kinitie i polo, ma winowaci ni, ŋa ma laidho riwan i polo ŋey wonyali omo riwan, aka ŋey wanyal winjo to watimo.

¹³ Kosa kinitie i thengi nam ca, ma winowaci ni, ŋa m'ocewere kadho i thengi nam yukoca, ŋey wonyali omo riwan, aka ŋey wanyal winjo to watimo.

¹⁴ Kole wac nitie cegin swa gi win, i dhok win kodi i cuny win ŋey winyal timo.

¹⁵ Neni ee, aketho ruwaŋ win konon me, kwo kodi bero, tho kodi teko,

¹⁶ paka amiyo win or konon me, maro Rwoth Were mewin, wotho i yo pere, kuro or pere, fonji pere, cik pere, wilakwo to wimedo nyay, aka Rwoth Were mewin lamiyo win silwany i lowo ma wicegin kadh'iye koro lunjo.

¹⁷ To ka cuny win owire woko, to wikwero winjo, aka winorweny to wicako lamo werin man kodi tiyo rijo,

¹⁸ awaco riwin nike wilatho adieri. Ndelo mewin k'obedi mabor i lowo ma wicegin ŋado Yordan kadho yukoro lunjo.

¹⁹ Alwoŋo polo kodi piny bedo paka jokony kwoŋ win konon me, nike atieko ketho ruwaŋ win kwo kodi tho, silwany kodi lam. Yer win kwo ŋey winyal kwo, win kodi nyikway win,

²⁰ maro Rwoth Were mewin, winjo dwondi go, kodi ketho go marapena. Kole go ama miyo win kwo kodi ndelo mabor, ŋey wibedi i lowo ma Rwoth okwoŋere ri kwarere mewin ri Abraham ri Isaka kodi ri Yakobo miyo jo.