Kitawo mar'abic mapa Musa m'ilwoŋo ni Cik 3 - KITAWO MALEŊ Catholic

Joisiraili jokengila Kere Og

¹ Wagiki to waluwo royo ma kadho i Basan, Kere Og ma Basan kodi ji pere jowok kwoŋ wan, lweny gi wan i Edirey.

² Rwoth owaco ran ni, “Ikir'ilwor go, kole atieko ketho go i cingin, kiri gi ji pere kodi lowo pere. Tim rigo paka itimo ri Kere Sihon pa Joamor, m'oyido dhumo i Hesibon.”

³ Ameno Rwoth Were mawan omiyo Kere Og ma Basan kodi ji pere je i cingi wan. Wafodo go piny cuka ongoye ŋat'obothi.

⁴ I hongo no wamako tindin madongo pere je, ongoye tindi madwoŋ ma wakimayo jo, je piero aucel, adec je ma Arigob, ker pa Og ma Basan.

⁵ Me je oyido tindin m'otinda gi cel m'oŋawere, waŋkace ario m'omakere, kodi cumin, medo i wi calin madongo.

⁶ Wareyo woko jo kicutho, paka watimo ri Kere Sihon ma Hesibon, i kisi tindi wareyo kicutho cwo, mon kodi nyithindho.

⁷ To ogwaŋe kodi gima wanyaga i tindin wakano paka mawan wegi.

⁸ Ameno i hongo no wamayo kerin ario pa Joamor lowo kalo Yordan, wok i milelo ma malawa Arinon kiri i Got Hamon.

⁹ (Ji ma Sidon jolwoŋo Hamon ni Sirion, aka Joamor jolwoŋo ni Senir.)

¹⁰ Tindin je ma kam'obipere, Giliad gibe, kodi Basan gibe, tundo kiri Salaka, kodi Edirey tindin ma ker pa Og i Basan.

¹¹ (Onyo nyaka Kere Og ma Basan am'obothi kwoŋ Jorefayim. Adieri kitanda pere oyido obedo ma nyweny, aka fodi inyalo neno i Raba tindi madwoŋ pa Joamon. Boro mere obedo fut abuŋwen, aka laco mere obedo fut aŋwen.)

Nonin ma jogeto yuwok ceŋ ma Yordan

¹² Lowo me, ma wamako i hongo no, amiyo jo ri nono pa Ruben kodi Gad adec ma yumalo ma Arower, manitie i gike ma milelo ma malawa Arinon, kiri g'adec ma piny matendere ma Giliad kodi tindin mere.

¹³ Amiyo adec nono pa Manase adec Giliad m'odoŋ kodi Basan gibe, ker pa Og. (Adec gibe ma Argob: Adec ma Basan no gibe oyido ilwoŋo ni lowo pa Jorefayim.

¹⁴ Yayir nyakwar Manase omako adec ma Argob gibe tundo kiri i kew ma Gesur kodi Makath, aka olwoŋo gi nyinge, meno Basan ni Havoth Yayir paka nitie kiri konon.)

¹⁵ Amiyo Giliad ri Makir.

¹⁶ Aka nono pa Ruben kodi Gad amiyo jo adec wok i Giliad tundo kiri i milelo ma malawa Arinon, gi dier milelo paka kew, kodi tundo kiri i malawa Yabok, gi milelo paka kew gi Joamon.

¹⁷ Amiyo jo bende Araba, Yordan kodi thenge mere, wok i Kinereth loro piny i nam ma Araba, Nam Cumbi gi tiendi Got Pisiga yuwok ceŋ.

¹⁸ I hongo no amiyo win or k'awaco riwin ni, “Makada nende Rwoth Were mewin otieko miyo win lowo me bed'iye, jolweny mewin je joripo ŋado gi gilweny kadho konyo wade mewin.

¹⁹ Nyaka mon mewin, nyithindho, kodi ogwaŋe mewin, paka aŋeyo nike withoth g'ogwaŋe, ama jowodoŋ i tindin m'atieko miyo win;

²⁰ Tundo kama Rwoth otiek miyo wade mewin kaywomirok paka win, to jo bende jomako lowo ma Rwoth Were miyo jo kalo Yordan, kenyo kisi dhano nyalo gik i lim pere m'atieko miyo win.”

²¹ Amiyo Yosuwa bende or i hongo no k'awaco ni, Waŋin otieko neno kisi gima Rwoth Were mewin otieko timo ri kerin ario me, ameno bende Rwoth latimo ri kerin je ma wicegin ŋado.

²² Ikir'ilwor jo, kole Rwoth Were mewin, lalwenyo riwin.

Musa ŋiyo Kanan gi Pisiga

²³ Aywak gi Rwoth i hongo no k'awaco ni,

²⁴ “Awi Rwoth Were, nyaka icako nyutho ŋeca perin dwoŋ perin kodi meni perin; were mene i polo kosa i piny m'anyalo timo tim ma meni paka aperin!

²⁵ Weyi aŋadi anen lowo maber kalo Yordan, piny matendere maber no kodi Lebanon.”

²⁶ To Rwoth oyido omako nge kodan kwoŋbedo win aka k'onyalo winjan. Rwoth owaco ran ni, “Ajok kodin! Ikir'iwaci ran wac me kendo!”

²⁷ Idhi malo wilwindi Pisiga aka iŋiy yupodho ceŋ, yumalo, yupiny, kodi yuwok ceŋ. Ŋiy maber, kole ikilakalo Yordan me.

²⁸ To miy Yosuwa or, miy go meni, aka iloki go matek, kwoŋbedo go ama latelo yuwiy ji me miyo jo lunjo lowo m'ilaneno.

²⁹ Ameno wadoŋ i milelo m'oŋiyere gi Beth Pewor.