Kitawo mar'abic mapa Musa m'ilwoŋo ni Cik 28 - KITAWO MALEŊ Catholic

Kemba ma winjo Were

¹ Ka winowinji dwondi Rwoth Were mewin, kuro or pere je gi kinen paka amiyo win or konon, Rwoth Were mewin latiŋo win malo loyo nonin je ma i piny.

² Silwany me je labedo mewin, ka winowinji dwondi Rwoth Were mewin.

³ Wilabedo josilwany i tindi madwoŋ, kodi i ndelin mewin.

⁴ Silwany labedo gi nywol mewin, ranyak ma ndelin mewin, nywol p'ogwaŋe mewin, dhok kodi mwendi mewin lamedere.

⁵ Adita mewin kodi gitedo mewin lapoŋ silwany.

⁶ Silwany labedo gi win ka wikadho woth, kodi ka widwoko.

⁷ Rwoth lamiyo win kikengila jokwor mewin ma jomonji win ruwaŋ win. Jolamonjo win gi thenge acel, to jolaringo i thenge abirio.

⁸ Rwoth lamiyo or ri silwany kwoŋ cemo mewin, kodi tic je ma cingi win. Go lamiyo win silwany i lowo ma Rwoth Were mewin miyo win.

⁹ Rwoth laloko win ji pere maleŋ, paka otieko ciko win, ka winokur or pa Rwoth Were mewin kodi wotho i yo pere.

¹⁰ Nonin je ma i piny jolaneno nike ilwoŋo win gi nyingi Rwoth, aka jolabedo gi bwok riwin.

¹¹ Rwoth lamiyo lim mewin wonyay, nywol mewin, nywol p'ogwaŋe mewin, kodi ranyak ma lowo ma Rwoth okwoŋere ri kwarere mewin miyo win.

¹² Rwoth layawo kakan ma ŋaŋo pere, polo, miyo win koth i lowo mewin i hongo ma ripo to miyo tic je ma cingi win silwany. Wilakikopa nonin kweth, to wikilabedo gi banjin pajo.

¹³ Rwoth lamiyo win bedo marapena, makiweno macowe; wilabedo wic, makiweno yiwe, ka winowinji or pa Rwoth Were mewin, paka amiyo win or konon, gi kuro je gi kinen.

¹⁴ Ka wikiwire kwoŋ wac je m'amiyo win or kwoŋe konon, obedi racuc kosa racam, luwo werin man gi tiyo rijo.

Gima wok i kwero winjo

¹⁵ To ka winokwer winjo Rwoth Were mewin gi kinen, kuro or pere je kodi cik, paka amiyo win or konon, lam me je laluwo win.

¹⁶ Lam laluwo tindi mewin madwoŋ, kodi ndelin mewin.

¹⁷ Lam labedo iy'adita mewin kodi i wer ma dwanyo ŋano mewin.

¹⁸ Lam laluwo nywol mewin, nywol p'ogwaŋe mewin, dhok mewin kodi mwendi mewin.

¹⁹ Lam laluwo win ka wikadho woth kodi ka widwoko.

²⁰ Rwoth ladhiro kwoŋ win kwoŋ, nywowirok, kodi dhierok i gima winotem timo je, cuka wirere piyo, ro tim mewin marac, rupiri wijwangan.

²¹ Rwoth lamiyo two nundu wocwire kwoŋ win cuka wirere woko kicutho i lowo ma widonj'iye lunjo.

²² Rwoth lamiyo win litho gi two ma nyeko del, senyiga, lietho ma waŋo jo, g'abor, gi milengela, kodi koyo malieth kodi two ma topo woko cemo gi ndelin cuka wirere woko.

²³ Polo manitie i wiwin labedo ywel, aka piny manitie i tiendi win labedo nyweny.

²⁴ Rwoth laloko koth ma lowo mewin moko, aka fukefuke ama lacwe piny kwoŋ win wok i polo cuka wirere woko.

²⁵ Rwoth lamiyo wokengila win ruwaŋ jokwor mewin, wilamonjo jo gi thenge acel, to wilaringo woko kwoŋ jo i thenge abirio. Wilabedo gibwok ri kerin je ma i piny.

²⁶ Delkwoŋ win labedo cemo ri winyin ma koyo kodi ogwaŋe ma i piny, aka ongoye ŋata lariemo woko jo.

²⁷ Rwoth lamiyo win litho gi bur ma Misir, akwota kwoŋ, gwenyo, kasengo, kodi ayilayila ma jokicangi.

²⁸ Rwoth lamiyo win litho gi neko, waŋtho, kodi paro m'onywowere.

²⁹ Aka wilakimudamuda odieceŋ paka ŋata waŋ'otho i mudho, aka wikilaneno royo. Iladiyo win kodi kinyaga win noknok, aka ongoye ŋata lakonyo win.

³⁰ Ilayiko nywomirok gi dhako, to jacwo man ama lanindo gi go. Ilageto ot, t'ikila nind'iye. Ilapidho ndelo vini, t'ikila camo olemo mere.

³¹ Ilathumo thwon perin ruwaŋin, aka ikilacamo. Ilakwalo punde perin k'ineno ama, aka k'odwoki rin. Rombo perin ilamiyo jokwor perin, aka ongoye ŋata lakonyin.

³² Nyithindho perin ilapoko ji man, kareno ineno gi waŋin, iladwaro jo gi waŋin ndelo gipi, t'ilangoye gi meni i cingin timo gimoro je.

³³ Ji ma fodi wikuya ama jolacamo olemo ma lowo mewin kodi kwok mewin, aka ilamedo diyo win kodi ŋinyo win.

³⁴ Neko lamako win gi gima waŋ win laneno.

³⁵ Rwoth lagoyo congi win kodi tiendi win gi bur malith makicangi, wok i par tiendi win tundo i katap wiwin.

³⁶ Rwoth latero win, kodi kere mewin ma wilayero dhumo win, i piny ma fodi win kosa kwarere mewin jokuya, koro wilatic ri werin man, ma mbawo kodi tele.

³⁷ Wilalokere gibwok, ageca, kodi gir'awaca i dier nonin kama Rwoth later'iye win.

³⁸ Wilacwoyo kodhi kweth i ndelin, to wilakeco manok, kole bonyo lacamo woko.

³⁹ Wilapidho ndelo vini kodi kikolesa, to wikilamadho vini kosa fono nyinge, kole kudin lacamo woko.

⁴⁰ Wilabedo gi yen oliv iy'adece mewin je, to wik'owir mo mere, kole oliv mere laoy woko.

⁴¹ Wilanywolo nyithindho, to jokilabedo mewin, kole ilatero jo i twec.

⁴² Bonyo lareyo woko yen je kodi olemo ma lowo mewin.

⁴³ Jopath ma jobedo i dier win jolamedere dongo kadho malo, to wilamedere giki cen.

⁴⁴ Jolakikopa win, to wikilakikopa jo, jolabedo wic aka wilabedo yiwe.

⁴⁵ Lam me je labino kwoŋ win, laluwo win to laco win, cuka wirere woko, kwoŋbedo wikiwinjo dwondi Rwoth Were mewin, gi kuro or pere kodi cik pere paka omiyo win or.

⁴⁶ Me labedo ranyuth kodi gir'aura kwoŋ win kodi nyikway win cil gi cil.

⁴⁷ Kwoŋbedo wikwero tiyo ri Rwoth Were mewin gi kisangala kodi forok i cuny win ri thotho ma gigipiny je,

⁴⁸ riameno wilatic ri jokwor mewin ma Rwoth ladhiro monjo win, i kec kodi riyo pi, kinyoro kodi awanya. Go laketho bieto ma nyweny i ŋuti win cuka reyo woko win.

⁴⁹ Rwoth lakelo nono wok bor swa, wok i gike ma piny, ma dwir paka ango, nono ma wikiniaŋ dhodhok pajo.

⁵⁰ Nono ma jongoye gi wor i waŋ jo, ma kiwor jodongo kosa nyuthi nyithindho wor.

⁵¹ Jolacamo nyithindhi ogwaŋe mewin, kodi olemo ma lowo mewin cuka wirere woko, to joweyo win m'ongoye ŋano, vini, mo, kosa nyithindhi dhok kodi nyithindhi mwendi.

⁵² Jolathoko tindin mewin je cuka kor ot mewin m'oŋawere m'otinda m'oyido wigeno opodhi piny je. Jolathoko tindin mewin je i lowo ma Rwoth Were mewin miyo win.

⁵³ Wilacamo nywol mewin won, riŋo nyithindho mewin won ma Rwoth Were mewin otieko miyo win, i litho ma jokwor mewin jolamiyo win, ka jothoko win.

⁵⁴ Kiri kwoŋ cwo m'imiyo dwoŋ i dier win lathwono omin go won, kosa dhako pere m'omaro, kosa nyithindho pere ma joboth cemo.

⁵⁵ Kilamiyo kad'acel kwoŋ jo riŋo pa nyithindho pere ma camo kwoŋbedo meno a gima go odoŋ gine kende, i litho ma jokwor mewin jolaketh'iye win i tindin mewin je.

⁵⁶ Kiri dhako m'imiyo dwoŋ swa i dier win, ma kinyal kada temo nyono piny gi par tiende, lathwono cwore m'omaro kodi nyithindho pere cemo.

⁵⁷ Lathwono jo kiri biero nyathi kodi nyathi m'onywolo, kwoŋbedo go camo aponda ro ngoye gi giman je, i litho ma jokwor mewin jolamiyo win ka jothoko win.

⁵⁸ Ka wikikuro gi kinen wac je ma cik me, m'ondiki i kitawo me, lworo nyingi go ma didwoŋ aka ma kelo lworo, Rwoth Were mewin,

⁵⁹ ladhiro kwoŋ win kodi nyikway win litho marac swa, ma kelo lworo, ma yindira kodi two malith swa makicangi.

⁶⁰ Go lakelo kwoŋ win two ca je ma Misir, ma bin wilworo, aka lacwire kwoŋ win.

⁶¹ Rwoth lamiyo win litho gi two man je makicangi, ma k'ondiki i kitawo ma cik me, cuka winorere woko.

⁶² Wiladoŋ manok, makada nende oyido withoth paka micalin ma i polo, kwoŋbedo wikiwinjo dwondi Rwoth Were mewin.

⁶³ Paka Rwoth osangala miyo win lim kodi loko win mathoth, apaka go bende lakisangala kisika kodi reyo woko win. Go lafudho woko win wok i lowo ma wikidho lunjo.

⁶⁴ Rwoth lakedho win i dier nonin je, wok i gike ma piny acel tundo i meca, aka koro ama wilatic ri werin man, ma mbawin kodi telin, ma win kosa kwarere mewin fodi wikuya.

⁶⁵ Aka i dier nonin no, kilabedo riwin mayot, kosa wik'onwaŋ karwako tiendi win. Rwoth lamiyo cuny win wokirin, waŋ win lacor aka cuny win larembo.

⁶⁶ Kwo mewin laliero i kiganagana, wor g'odieceŋ wilapoŋ gi lworo, aka wilangoye gi geno i kwo mewin.

⁶⁷ Odikin wilawaco ni, “Kabedi oyido piny yuthi!” Aka othieno wilawaco ni, “Kabedi oyido piny yawere!” Kwoŋbedo cuny win labwok kodi gima waŋ win laneno.

⁶⁸ Rwoth ladwoko win i mel kiri Misir, gi royo m'aciko win nike wikilaneno kendo; aka koro wilatanere ri jokwor mewin paka ŋecin ma mon kodi cwo, to langoye janyew.