Kitawo mar'abic mapa Musa m'ilwoŋo ni Cik 26 - KITAWO MALEŊ Catholic

Olemo marapena kodi acel wiy apar

¹ Ka witieko tundo i lowo ma Rwoth Were mewin miyo win paka gir'alunja mewin, to wilunjo, to wibed'iye,

² wiripo kwanyo olemo marapena ma kisi ranyak ma wikeco wok i lowo ma Rwoth Were mewin miyo win, wikethi iy'adita to wikadho i kabedo ma Rwoth Were mewin layero ri nyinge koro.

³ Wilakidho bongi jacway ri Were i wi migam manitie i tic i hongo no, aka wilawaco rigo ni, “Konon me awaco ri Rwoth Were perin nike atieko tundo i lowo ma Rwoth okwoŋere ri kwarere mewin miyo wan.”

⁴ Aka jacway ri Were i wi migam lakwanyo adita wok i cingin to ketho piny ruwaŋ migam pa Rwoth Were perin,

⁵ iladwoko k'iwaco ruwaŋ Rwoth Were perin ama: “Kwara cango obedo jawoth Arameyan, okadho piny i Misir aka obedo koro paka japath, manok i welo, aka kenyo olokere nono madwoŋ, jameni, aka oŋeyere.

⁶ To munyo Jomisir jotero wan gi gwayo to jomiyo wan litho, gi miyo wan tic matek,

⁷ waywak ri Rwoth Were pa kwarere mawan, Rwoth owinjo dwondi wan aka oneno litho mawan, kwok mawan, kodi adica mawan.

⁸ Rwoth owodho wan wok i Misir gi cinge ma meni, cinge m'oyare, gi meni ma kelo lworo, gi ranyuth kodi gir'aura.

⁹ Go okelo wan i kabedo me to miyo wan lowo me, lowo ma mol gi cak kodi mo kic.

¹⁰ Onyo neni pama akelo olemo marapena ma lowo ma in, Awi Rwoth Were paran, imiyan.” Ilaketho piny ruwaŋ Rwoth Were perin, t'ikule piny ruwaŋ Rwoth Were perin.

¹¹ Ilakisangala gi bero je ma Rwoth Were perin omiyin, kodi ot perin, kanyacel gi Jolevi, kodi jopath ma jobedo i dier win.

¹² K'itieko culo acel wiy apar je ma ranyak perin i oro mar'adek (m'obedo oro ma culo acel wiy apar) miyo Jolevi, jopath, nyithindho kic, kodi citho i waŋkac perin, ŋey jowocami to joyeŋ i tindin mewin.

¹³ Aka ilawaco ruwaŋ Rwoth Were perin ni, “Atieko kwanyo woko migew maleŋ wok i ot paran, aka atieko miyo Jolevi, jopath ma jobedo gi wan, nyithindho kic, kodi citho, cungo kwoŋ or perin je m'imiyan. Akituro, kosa wiyan k'owil gi or perin.

¹⁴ Akicamo munyo aywak, akikwanyo munyo akoc, aka akimiyo jom'otho. Atieko winjo dwondi Rwoth Were paran, timo paka imiyan or.

¹⁵ Ŋiy piny wok i kabedo perin maleŋ, wok i polo, aka imiy ji perin Isiraili silwany kodi lowo m'itieko miyo wan, paka iciko kwarere mawan, lowo ma mol gi cak kodi mo kic.”

Ji pa Were won

¹⁶ Konon me Rwoth Were mewin miyo win or kuro fonji me kodi cik me; timo gi kinen gi cuny win je kodi adundo mewin je.

¹⁷ Paka witieko yeyo konon me, nike Rwoth obedo Were mewin, aka win wilawotho i yo pere, luwo fonji pere, or pere kodi cik pere, kodi winjo dwonde.

¹⁸ Konon me Rwoth otieko waco nike wibedo ji pere m'omaro, paka go oluwo gi win, kuro or pere;

¹⁹ kodi tiŋo win malo swa loyo nonin je ma go ocweyo, i pak, i limo nyingi win, kodi dwoŋ, kodi riwin bedo ji maleŋ ri Rwoth Were mewin paka go otieko waco.