Kitawo mar'abic mapa Musa m'ilwoŋo ni Cik 25 - KITAWO MALEŊ Catholic

¹ Ka dhaw obedo i dier j'ario, aka jobino bongi jothum banja theko jo, jolanwaŋo ŋat'otire kodi ŋat'okom.

² K'inen ŋata jabanja iripo cwado, jathum banja lamiyo go nindo piny, aka wocwadi go ruwaŋe, gi goco marom gi komo pere.

³ Inyalo cwado go kiboko piero aŋwen, to ka okalo kenyo, nyalo miyo go bedo m'ongoye gi wor i dier ji.

⁴ Ikir'itwey dhok merikwa ka teŋo ŋano.

Kony ri omin in m'otho

⁵ Ka wutmere jobedo kanyacel, aka acel kwoŋ jo otho m'ongoye gi wode, dhako pa jatho kiripi nywomirok woko ma peco gi jakicar. Omin cwore lanywomo go to timo rigo paka omin cwore.

⁶ Nyathi makayo ma dhako no onywol ilacwoko nyingi jatho, ŋey nyingi go wokiri worere i Isiraili.

⁷ To ka jacwo no k'omaro nywomo ciliendi omin, kenyo citho lakidho bongi jodongo i waŋkac to waco ni, “Omin cworan odak tiŋo malo nyingi omin i Isiraili, go kilatimo ran paka yworan.”

⁸ Kenyo jodongo ma tindi pere jolalwoŋo go luwo gi go. To ka go ocwire waco ni, “Angoye gi mito ma nywomo go.”

⁹ Kenyo ciliendi omin lakadho ruwaŋ jodongo, to fudho war i tiendi ywore, woŋul law i waŋe, to waco ni, “Me a gim'itimo ri jacwo ma kigeti peco p'omin go.”

¹⁰ Ilalwoŋo nyinge i Isiraili je nike peco pa ŋat'oluny war pere.

Cik man

¹¹ Ka cwo ario jogore, aka cipa ŋat'acel odonj'iye botho cwore kwoŋ goco pa nyawote gi ywayo mandi go,

¹² iripo toŋo woko cingi dhako no m'ongoye wor.

¹³ Ikir'itiŋ latir masew kodi mapek i mugowa mewin.

¹⁴ Ikir'ibedi gi rapim masew kodi mapek i udi mewin.

¹⁵ Iripo bedo gi latir kodi rapim m'otire, ŋey ndelo perin wobedi mabor i lowo ma Rwoth Were mewin miyo win.

¹⁶ Kole jono je ma jotimo nger gino, jono je ma jokitim adieri, jobedo amien ri Rwoth Were mewin.

Cik neko Joamalek

¹⁷ Poyi win gima Joamalek jotimo riwin i woth mewin wok Misir.

¹⁸ Jomonjo win i royo, munyo wiol aka wiloc, to joneko jono m'oyido jodoŋ cen; jok'olworo Were.

¹⁹ Riameno ka Rwoth Were mewin otieko miyo win ywomirok kwoŋ jokwor mewin je i thenge je, i lowo ma Rwoth Were mewin miyo win paka gir'alunja, wiripo reyo woko Joamalek wok i pendi polo, wicwil okir womaki win.