Kitawo mar'abic mapa Musa m'ilwoŋo ni Cik 21 - KITAWO MALEŊ Catholic

Cik ma mako kwoŋ nek ma k'oŋeyere

¹ K'onwaŋere i lowo ma Rwoth Were mewin miyo win bedo mewin, del pa dhano m'oneki oriere kam'othangere, aka ŋat'oneko go k'oŋeyere,

² jodongo mewin kodi jothum banja mewin jolakadho kipima boro ma tindin macegin gi kama del onwaŋere i iye.

³ Jodongo ma tindi macegin gi del jolakwanyo roya dhiaŋ ma fodi k'otiy gine kosa k'otiŋo bieto.

⁴ Jodongo ma tindi no jolakelo roya dhiaŋ no piny i milelo ma kicwiy, kama kifur kosa fodi k'ocwoy'iye, aka jolaturo ŋute kenyo.

⁵ Jocway ri Were i wi migam, nyikway Jolevi, jolabino yumalo winjo banjin mar'akaka. Kole Rwoth Were mewin otieko yero jo tic rigo kodi miyo silwany i nyingi Rwoth.

⁶ Jodongo je ma tindi macegin gi del pa ŋat'oneki jolalwoko cingi jo kwoŋ roya dhiaŋ m'otur ŋute i milelo ma kicwiy.

⁷ Aka jolawaco ni, “Cingi wan k'ooyo remo me, aka waŋ wan k'oneno.

⁸ Cwaki ji perin Isiraili, Awi Rwoth, ji perin m'ibotho; ikir'iwey banja ma remo ma bubanja wodoŋ i dier ji perin Isiraili.” Ameno ilacwako jo i banja ma oyo remo.

⁹ Ameno apaka wilacido woko banja ma remo ma bubanja i dier win, kwoŋbedo wiripo timo gim'otire ruwaŋ Rwoth.

Cik kwoŋ mon jojiera lweny

¹⁰ Ka wikadho lweny gi jokwor mewin, aka Rwoth omiyo jo i cingi win to wimako jo paka jojiera,

¹¹ k'ineno kwoŋ jojiera dhako maŋon m'igomba nywomo,

¹² ilatero go peco i ot perin, aka go ripo lielo ye wiye, to ŋado lwet cinge.

¹³ Go lalunyo woko nanga pere ma jiera, to doŋ i ot perin ka ywako bamere kodi min ma dwe acel; aka rumacen, inyalo donjo bonge paka cwore, aka go labedo dhako perin.

¹⁴ To k'inen, go k'osangala in, inyalo weyo go kadho. Ikiripi kitana go ri pesa kosa tero go paka mukop, paka itieko riyo go nindo kodin.

Alunja p'okayo

¹⁵ Ka jacwo nitie gi mon ario, omaro acel, aka k'omaro acel; ka joje jonywolo rigo wote, to okayo bedo wod pa dhako ma go k'omaro,

¹⁶ kenyo i ndelo ma go poko wote lim ma go nitie gine ri wote, go kiripi tero wod pa dhako ma go omaro paka okayo to weyo wod pa dhako ma go k'omaro, m'obedo okayo.

¹⁷ Go ripo yeyo wod pa dhako ma go k'omaro paka okayo, to miyo go adec ma lim pere mirundi ario, manyacik go ripo nwaŋo kwoŋbedo go obedo remo marapena ma meni pere.

Nyithindho ma jogwenyirok

¹⁸ Ka dhano nitie gi wode ma jawictek aka jagwenyirok ma kiwinji dwondi bamere kosa min, makada nende jomiy go gir'acula,

¹⁹ bamere kodi min jolamako go to jotero go bongi jodongo ma tindi pere i waŋkac ma kabedo no.

²⁰ Jolawaco ri jodongo ma tindi me ni, “Wod wan me wiye tek aka jagwenyirok. Go kiwinji dwondi wan, jaworo aka jamero.”

²¹ Cwo je ma tindi jolacadho go gi telin cuka tho. Aka Isiraili je lawinjo, to jobedo gi bwok.

Cik man

²² Ka dhano otimo banja ma gir'acula ma tho, t'iŋawo go wi yath,

²³ del pere kiripi weyo wonindi wi yath; wiripo yiko go i ndelo no won, kwoŋbedo ŋat'oŋaw wi yath nitie i lam pa Were. Wikiripi koco lowo ma Rwoth Were mewin miyo win wobedi mewin.