Kitawo mar'abic mapa Musa m'ilwoŋo ni Cik 20 - KITAWO MALEŊ Catholic

Cik ma mako kwoŋ lweny

¹ Ka wikidho lweny gi jokwor mewin, to wineno punde kodi cawilin, jolweny madwoŋ loyo mewin wikiri wibwok ro jo; kole Rwoth Were mewin nitie gi win, go m'owodho win wok i piny Misir.

² Mafodi wikicako lweny, jacway ri Were i wi migam ripo bino malo to luwo gi jolweny,

³ ka waco rijo ni: “Winji, Awi Isiraili! Konon wicore cegin lweny kodi jokwor mewin. Cuny win wokiri wopodhi, kosa wikiri wibwok, kosa wikirin, kosa wibedi gi lworo rijo;

⁴ kole obedo Rwoth Were mewin ma kadho gi win, lwenyo riwin gi jokwor mewin, miyo win loyo.”

⁵ Kenyo jotel pa jolweny jolaluwo gi jolweny, ka jowaco ni, “Poyi nitie jacwo m'otieko geto ot aka fodi k'oketho i cingi Were? Go ripo gik i ot pere, kosa nyalo tho i lweny to jacwo man ama ketho i cingi Were.

⁶ Poyi nitie jacwo m'otieko pidho ndelo vini, to fodi k'obilo olemo mere? Go ripo gik i ot pere, kosa go nyalo tho i lweny to jacwo man ama telo bilo olemo mere.

⁷ Poyi nitie jacwo m'otieko penjere gi dhako, to fodi k'onywomo go? Go ripo gik i ot pere, kosa go nyalo tho i lweny to jacwo man nywomo go.”

⁸ Jotel pa jolweny jolamedere luwo gi jolweny, ka jowaco ni, “Poyi nitie jacwo manitie gi bwok kosa cunye podho? Go ripo dok peco pere, kosa go bende nyalo miyo cuny wadi podho paka apere.”

⁹ Ka jotel pa jolweny jotieko luwo gi jolweny, kenyo jomituka jolatelo jo.

¹⁰ Ka wicore cegin lweny gi tindi, kutho miy win jo silwany ma timo siem.

¹¹ Ka joyere timo siem to jotiŋo cingi jo malo riwin, kenyo ji je ma iye jolatimo riwin tic arom.

¹² To ka jok'omiyere riwin i siem, to jolwenyo gi win, kenyo wiripo thoko mako.

¹³ Aka ka Rwoth Were mewin okethi tindi no i cingi win, wiripo neko cwo mere je.

¹⁴ Winyalo, kad'ameno, kwanyo paka gima winyaga, mon mere, nyithindho, dhok kodi gigipiny man ma tindi, gimoro je ma dicwe. Wiwinji cwe ma gigipiny pa jokwor mewin, ma Rwoth Were mewin omiyo win.

¹⁵ Ameno bende apaka witim ri tindin je mabor gi win swa ma jok'obedo tindin ma nonin ma ka.

¹⁶ To paka ri tindin pa ji me ma Rwoth Were mewin miyo win paka gir'alunja, wikiri wiwey gimoro je ma ywe wodoŋ makwo.

¹⁷ Wiripo reyo woko jo: Johiti, kodi Joamor, Jokanan kodi Joperiz, Johivi kodi Joyebus paka Rwoth Were mewin omiyo win or,

¹⁸ ŋey jokiri jowofonji win timo gigipiny mareco ma jotimo ri werin pajo, ameno to witimo reco kwoŋ Rwoth Were mewin.

¹⁹ Ka withoko mako tindi ma hongo malac, lweny gine ŋey wimaki, wikiri wirey yen mere gi toŋo gi le. Makada nende winyalo kwanyo cemo kwoŋ jo, wikiripi toŋo jo piny. To manago yen ma ndelin bende jobedo ji ma wiripo thoko mako?

²⁰ Winyalo reyo woko yen ma wiŋeyo nike kinyak cemo kende; winyalo toŋo jo piny ma timo tic ma geto cel kwoŋ tindi ma lwenyo gi win, cuka podho.