Kitawo mar'abic mapa Musa m'ilwoŋo ni Cik 19 - KITAWO MALEŊ Catholic

Tindin madongo ma pondo

¹ Ka Rwoth Were mewin otieko reyo woko nonin ma Rwoth Were mewin miyo win lowo pajo, to wilunjo bedo i tindin pajo kodi udi pajo,

² wilaketho gicen tindin madongo adek i lowo ma Rwoth Were mewin miyo win lunjo.

³ Wiripo baro royo ma kadho i jo, to wipoko lowo ma Rwoth Were mewin miyo win lunjo iy'adec adek, ŋey ŋat'oneki nyatoro ma k'ogendera nyalo kwalok to pondo iy'acel kwoŋ jo.

⁴ Onyo me banja pa janek, m'oringi koro botho kwo pere, meno, ŋat'oneko nyawote ma k'ogendera m'oyido jok'obedo jokwor con.

⁵ K'obedi ni dhano okadho i lul gi nyawote ŋolo yen, to cinge wito le ma toŋo yath, to wic le budhere i loki mere to goyo nyawote to tho, go nyalo ringo iy'acel kwoŋ tindin madongo me to pond'iye botho kwo pere;

⁶ to ka woth obedi mabor, jaculi kwor i nge malieth nyalo riemo janek to neko janek, makada nende jalo oyido kiripi tho, rupiri oyido k'obedo jakwor pa nyawote i hongo macon.

⁷ Riameno amiyo win or ketho gicen tindin madongo adek.

⁸ Ka Rwoth Were mewin oloki malac adec mewin, paka otieko kwoŋere ri kwarere mewin to miyo win lowo je ma go ociko kwarere mewin miyo win;

⁹ tekin ni wikuro or me je maber, m'amiyo win konon, kanyo wimaro Rwoth Were mewin kodi wotho i yo pere noknok, nyaka wilamedo tindin madongo adek man kwoŋ adek me,

¹⁰ ŋey remo pa ŋata bubanja okir wooy i lowo mewin ma Rwoth Were mewin miyo win paka gir'alunja, to banja ma oyo remo yimere kwoŋ win.

¹¹ To ka nyatoro ro kwor gi nyawote onindi rigo apondi, to monjo go, neko go, to ringo iy'acel kwoŋ tindin me,

¹² gikenyo jodongo ma tindi madwoŋ pa janek jolaoro woomi go wok kenyo, t'iketho go i cingi jaculi kwor woneki go.

¹³ Wikiri wimaki gi go wor, to wiripo kwanyo woko banja ma oyo remo ma bubanja i Isiraili, ŋey winwaŋ bero.

Kew ma lim i hongo macene

¹⁴ Ikiripi fudho kew pa jager ma jodongo macon jocomo i lim m'ilamiyin i lowo ma Rwoth Were mewin miyo win.

Cik ma mako kwoŋ jokony ma joluwo adieri

¹⁵ Jakony acel won kende kilaromo i thumo ri dhano banja moro je, kosa komo moro je, kwanyowoko ka jokony ario kosa adek jonitie, to nyaka ithumo banja.

¹⁶ Ka jakony ma luwo adieri ma mito kelo teko ri nyawote oay to segeya nyawote ma timo gimarac,

¹⁷ kenyo j'ario me joripo bino ruwaŋ Rwoth, ruwaŋ jocway ri Were i wi migam kodi jothum banja ma jotimo tic i hongo no;

¹⁸ jothum banja joripo menyo gino gi rieko, aka ka jakony ma luwo adieri obedo dhano m'okom to segeya nyawote i gima k'obedo adieri,

¹⁹ kenyo winyalo timo rigo paka oyido mito ni wotim ri nyawote; ameno wilakwanyo woko raco wok i dier win.

²⁰ Aka jom'odoŋ jolawinjo to jolokere malwor, aka jok'otimi reco ma cale ameno kendo i dier win.

²¹ Wikiri wimaki wor gi go, labedo kwo ri kwo, waŋ ri waŋ, lak ri lak, cingi jo ri cingi jo, tiendi jo ri tiendi jo.