Kitawo mar'abic mapa Musa m'ilwoŋo ni Cik 16 - KITAWO MALEŊ Catholic

Kalima ma Kadho

¹ Kur win dwe ma Abib gi timo Kalima ma kadho ri Rwoth Were mewin, kwoŋbedo i dwe ma Abib Rwoth Were mewin owodho win wok i Misir wor.

² Wiripo miyo cowirok ma Kalima ma kadho ri Rwoth Were mewin, wok kwoŋ mwendi mewin kodi dhok mewin, i kabedo ma Rwoth layero paka kabedo ri nyinge.

³ Wikiripi camo gi mugat m'otimi gi thow. Ma ndelo abirio wilacamo mugat ma buthow, mugat ma litho, kwoŋbedo wiwok i Misir i kwakirok madwoŋ; ŋey i kwo mewin gipi winyal poyo ndelo ma wiwok i lowo ma Misir.

⁴ Wikiripi bedo gi mugat m'otimi gi thow iy'adec mewin ma ndelo abirio, aka wongoye riŋo mar'ogwaŋ ma withumo othieno ma ndelo marapena ma wonindi yawo piny.

⁵ Wikiripi miyo cowirok ma Kalima ma kadho i tindin mewin ma Rwoth Were mewin miyo win,

⁶ to i kabedo ma Rwoth Were mewin layero paka kabedo ri nyinge, kenyo kende ama wiripo miyo cowirok ma kadho, othieno ka waŋceŋ podho, sawa ma ndelo ma wiay wok i Misir.

⁷ Wiripo tedo to wicamo i kabedo ma Rwoth Were mewin layero; yawere mere odikin winyalo dok i wemin mewin.

⁸ Ma ndelo aucel wilamedere camo mugat ma buthow, aka i ndelo mar'abirio wilacokere lamo Rwoth Were mewin, aka wikiripi tiyo i ndelo no.

Kalima ma keco

⁹ Wiripo kwano sabiti abirio, ka wicako kwano wok i hongo ma wicako nyaro ŋano.

¹⁰ Wiripo kuro Kalima ma Keco ri Rwoth Were mewin, ka wimiyo go mic ma dhano won miyo cungo kwoŋ silwany ma wilimo wok bongi Rwoth Were mewin.

¹¹ Wiripo kisangala ruwaŋ Rwoth Were mewin, win, nyithindho mewin, ŋecin mewin, Jolevi ma jobedo i tindin mewin, jopath, nyithindho kic kodi citho ma jobedo i dier win, i kabedo ma Rwoth Were mewin oyer paka kabedo ri nyinge.

¹² Poyi win nike oyido wibedo ŋecin i Misir, kur win cik me gi kinen.

Kalima ma kayindi

¹³ Wiripo kuro Kalima ma Kayindi ma ndelo abirio ka witieko coko ŋano mewin kodi vini.

¹⁴ Sangala win i hongo ma kalima mewin, win, nyithindho mewin, ŋecin mewin, Jolevi, jopath, nyithindho kic, kodi citho ma jobedo i tindin mewin.

¹⁵ Ma ndelo abirio wiripo timo kalima ri Rwoth Were mewin i kabedo ma Rwoth layero. Kole Rwoth Were mewin lamiyo win silwany i fur mewin je kodi i tic je ma cingi win.

¹⁶ Didek kisi oro cwo mewin je joripo bino ruwaŋ Rwoth Were mewin i kabedo ma go layero: I Kalima ma Mugat ma buthow, Kalima ma Keco, kodi Kalima ma Kayindi. Jokiripi bino ruwaŋ Rwoth gi cingi jo nono;

¹⁷ joje joripo miyo paka jonyalo, cungo kwoŋ silwany ma Rwoth Were otieko miyo win.

Timo tiro

¹⁸ Wiripo yero jothum banja, kodi jodhum i nonin mewin je, i tindin mewin je ma Rwoth Were mewin miyo win, aka joripo thumo banja ri ji gi tiro.

¹⁹ Wikiripi wiro tiro, kosa timo nyakucel, aka wikiripi jolo nyew, kole nyew thowaŋ jomariek aka cego tiro ri joma timo gim'otire.

²⁰ Tiro, adieri tiro kende, ama wiripo luwo, ŋey winyal kwo to wilunjo lowo ma Rwoth Were mewin miyo win.

Nger lamo m'okwer

²¹ Wikiri wicom yath moro je paka kalamo i thengi migam ma wilageto ri Rwoth Were mewin,

²² kosa wikethi siro ma tele; gigipiny ma Rwoth Were mewin odak.