Kitawo mar'abic mapa Musa m'ilwoŋo ni Cik 14 - KITAWO MALEŊ Catholic

Tim manyakafir m'okwer

¹ Wibedo nyithindho pa Rwoth Were mewin. Wikiripi gwerok kosa ŋwekirok ka dhano otho.

² Kole wibedo ji maleŋ ri Rwoth Were mewin, obedo win ama Rwoth otieko yero kwoŋ nonin je i piny bedo ji pere, aka lim pere ma welo.

Ogwaŋe makoc kodi m'olony

³ Wikiripi camo gima kelo amien moro je.

⁴ Me ogwaŋe ma winyalo camo: Dhiaŋ, rombo, diel,

⁵ apol, rudina, rombo madudi, diegi madudi, kosa amudhe.

⁶ Ogwaŋ moro je ma par tiendi jo opokere dirio, kodi ma jonyamo cemo dirio, winyalo camo.

⁷ Kucel kwoŋ ogwaŋe ma jonyamo cemo dirio aka par tiendi jo opokere dirio, wikiripi camo me, ŋamia, oculu, kodi oyeyo ma telin, kwoŋbedo jonyamo cemo dirio, to par tiendi jo k'opokere dirio. Riameno jokoc riwin.

⁸ Mbiji bende, kwoŋbedo tiende opokere dirio to kinyam cemo dirio, koc riwin. Wikiripi camo riŋo pajo kosa geyo ma jotho.

⁹ Kwoŋ ogwaŋe je ma jobedo i pi winyalo camo me: Ma nitie gi thwoke kodi magambala.

¹⁰ Aka m'ongoye gi thwoke kodi magambala wikiripi camo, meno jokoc riwin.

¹¹ Winyalo camo winyin ma jolony je.

¹² To me ama wikiripi camo: Ango, acut, ari piny,

¹³ obuko yath, nger otengo je,

¹⁴ nger agak je,

¹⁵ maya, koka ma wor, acik, nger koka moro je;

¹⁶ tula mathindho gi madongo, gweno ma pi,

¹⁷ tula ma thim, winyin ma jwombe, acut kodi acwodho,

¹⁸ obusi (karoli) naminakin, wakalanya kodi kilafundo.

¹⁹ Winyin ma jobwombi gin je jokoc riwin; kiripi camo.

²⁰ Winyalo camo cwec ma jobwombi gin ma jolony.

²¹ Wikiripi camo gima won otho; winyalo miyo jokicar ma jobedo i tindin mewin jowocami, kosa winyalo kitana ri japath. Kole wibedo ji maleŋ ri Rwoth Were mewin. Wikiri witedo nyathi diel i cak pa min.

Cik kwoŋ acel wiy apar

²² Kethi win gicen acel wiy apar ma ranyak mewin je wok i ndelin mewin kisi oro.

²³ Wiripo camo ruwaŋ Rwoth Were mewin, i kabedo ma go layero paka kabedo ri nyinge, ŋano mewin, vini mewin, mo mewin, kodi okayin ma dhok kodi mwendi mewin, ŋey winyal fonjirok lworo Rwoth Were mewin noknok.

²⁴ To ka Rwoth Were mewin otieko miyo win silwany, to woth bedo riwin mabor, ma wikinyal tiŋo kodirok gi gigipiny, kwoŋbedo kabedo ma Rwoth Were mewin oyero paka kabedo ri nyinge bor gi win,

²⁵ nyaka winyalo wilo loko pesa, to witiŋo pesa no i cingi win kadho i kabedo ma Rwoth Were mewin oyer.

²⁶ Wilaoro pesa no ma nyewo gima cuny win omiti je, dhok, rombo, vini, medho makec, kosa gima cuny win omiti. Aka wilacamo koro ruwaŋ Rwoth Were mewin, win kodi pecin mewin ka wisangala kanyacel.

²⁷ Aka Jolevi ma jonitie i dier win, wikiri wijwangi jo, kwoŋbedo jongoye gi lim pajo kosa alunja gi win.

²⁸ I kisi oro mar'adek wiripo kelo acel wiy apar ma cemo mewin je to wikano i tindi mewin.

²⁹ Aka Jolevi, kwoŋbedo jongoye gi lim kosa alunja gi win, kiri gi jopath ma jobedo gi win, nyithindho kic, kodi citho je ma tindin mewin, jonyalo bino camo ma romo jo, ŋey Rwoth Were mewin womiy win silwany i tic mewin je ma witimo.