Biblia Todo Logo
Bìoball air-loidhne

- Sanasan -


Kitawo mar'abic mapa Musa m'ilwoŋo ni Cik 11 - KITAWO MALEŊ Catholic


Dwoŋ pa Rwoth

1 Riameno wiripo maro Rwoth Were mewin, to wikuro cik pere, fonji pere kodi or pere noknok.

2 Ŋey win konon nike k'obedo nyithindho mewin ma fodi jokuya kosa jok'oneno ragwok pa Rwoth Were mewin, dwoŋ pere, cinge ma meni kodi bade m'oyare,

3 ranyuth pere kodi tim pere m'otimo i Misir ri Farawo, kere ma Misir, kodi lowo pere je.

4 Gima go otimo ri jolweny ma Misir, kayinin pajo, cawilin, kodi nger m'omiyo pi ma Nam M'obokere mol kwoŋ jo munyo joriemo win, to Rwoth reyo woko jo kiri gunyo ni;

5 Gima go otimo riwin i thim, cuka witundo i kabedo me,

6 kodi gima go otimo ri Dathan kodi Abiram, wot Eliab wod pa Ruben, nger ma i dier Joisiraili je piny oyawo dhoke to mwonyo woko jo, gi pecin pajo, wemin, kodi lim pajo je.

7 Kole witieko neno gi waŋ win tim madongo je ma Rwoth otimo.


Silwany ma lowo m'ocik

8 Kur win or me je m'amiyo win konon, ŋey winyal bedo gi meni ma kadho donjo mako lowo ma wiŋado kidho bed'iye.

9 Aka ŋey winyal bedo gi kwo mabor i lowo ma Rwoth okwoŋere ri kwarere mewin miyo jo kodi nyikway jo, lowo ma mol gi cak kodi mo kic.

10 Kole lowo ma wicegin donjo mako kicale lowo ma Misir, ma wiwok'iye, kama wicwoyo kodhi to wikonj'iye pi atiendi, paka ndelo fufa.

11 To lowo ma wiŋado kadho lunjo obedo lowo matendere kodi milelo, ma koth cwe iye wok i polo,

12 lowo ma Rwoth Were mewin kuro. Waŋ Rwoth Were mewin noknok nitie kwoŋe, wok i cakirok ma oro tundo i cowe.

13 Ka winowinji kisi or pa Rwoth, m'amiyo win konon, maro Rwoth Were mewin, tiyo rigo gi cuny win je kodi adundo mewin je,

14 kenyo go lamiyo win koth ri lowo mewin i hongo mere, koth ma cwir kodi ma oro, ŋey winyal coko ŋano, vini, kodi mo mewin.

15 Go lamiyo win lum i sa mewin ri mwendi mewin, aka wilacemo to wiyeŋ.

16 Gwokere win, cuny win wokiri owondi win wirok, tiyo ri werin man kodi lamo jo.

17 Nge pa Rwoth laliel kwoŋ win to cego polo, ŋey koth wongoye to ngoye ranyak i lowo; wilarere woko piyo wok i lowo maber ma Rwoth miyo win.

18 Wiripo ketho wac paran me i cuny win kodi iy'adundo mewin, tweyo i cingi win paka ranyuth, kodi i nyim win paka rapoy.

19 Fonji win nyithindho mewin, luw win kwoŋe ka winitie peco kodi ka wiwotho, ka winindo piny kodi ka wicew.

20 Ndiki win ruwaŋ dhiot ma udi mewin kodi i waŋkace mewin,

21 ŋey ndelin ma kwo mewin kodi apa nyithindho mewin womedere i lowo ma Rwoth okwoŋere ri kwarere mewin miyo jo, paka polo nitie malo ma piny.

22 Ka winokur or me je m'amiyo win konon gi kinen, maro Rwoth Were mewin, wotho i yo pere je, kodi ketho go marapena,

23 kenyo Rwoth lariemo woko nonin me je ruwaŋ win, aka wilalunjo nonin malac aka ma jotek loyo win.

24 I kisi kabedo je ma winonyon gi tiendi win labedo mewin; adec mewin layare wok i thim tundo i Lebanon kodi wok i malawa Yufrete, kiri i Nam ma yupodho ceŋ.

25 Ongoye ŋata lanyalo ciro win, Rwoth Were mewin lakelo lworo kodi bwok ro win i lowo je ma winonyon, paka go ociko win.

26 Neni, aketho ruwaŋ win konon silwany kodi lam.

27 Silwany, ka winowinji or pa Rwoth Were mewin m'amiyo win konon.

28 Aka lam, ka wikwero winjo or pa Rwoth Were mewin, to wiwire kwoŋ yo m'amiyo win or konon, to wiluwo werin ma fodi wikuya.

29 Ka Rwoth otieko kelo win i lowo ma wikidho donjo lunjo, wilaketho silwany wi Got Gerizim kodi lam wi Got Ebal.

30 Paka wiŋeyo, jonitie kalo Yordan, yupodho ceŋ, i lowo pa Jokanan ma jobedo i Araba, ma ŋiyere gi Gilgal, i thengi olwa ma More.

31 Ka wiŋado Yordan kadho lunjo lowo ma Rwoth Were mewin miyo win, ka witieko bed'iye,

32 wiripo kuro gi kinen, cik je kodi or je m'aketho ruwaŋ win konon.

Dhopadhola DC Bible © Bible Society of Uganda, 2018.

Bible Society of Uganda
Lean sinn:



Sanasan