Cakirok 8 - KITAWO MALEŊ Catholic

Gike ma mikula

¹ To Were poyo Nowa kodi ogwaŋe m'oyido nitie gi go i ye. Aka Were omiyo koyo to kudho i piny to pi cwiyo

² Waŋ pi ma piny gi pondeponde ocegi, aka koth ocoki

³ to pi cwiyo moth ma ndelo 150.

⁴ I ndelo mar'abirio ma dwe mar'abirio ye ocungo wi got Ararat.

⁵ Pi omedere cwiyo tundo i dwe mar'apar. I ndelo marapena ma dwe mar'apar kisul gote oneno.

⁶ Rumacen ma ndelo piero aŋwen Nowa oyawo dirisa

⁷ aka odhiro agak woko. Agak k'ogiki, to omedere kiwaya thoko cuka pi othwo wok i piny.

⁸ Kenyo Nowa odhiro akuru neno ka pi ocwiyo,

⁹ to paka akuru k'onwaŋo kapie, ogik bonge i ye rupiri oyido fodi pi k'ocwiyo. Ameno Nowa otelo cinge to rwako go i ye.

¹⁰ Nowa okuro ma ndelo abirio to kendo dhiro akuru.

¹¹ Akuru ogik bonge othieno gi boke yath manumu ma yath m'ilwoŋo ni oliv. Ameno Nowa oŋeyo ni pi oyido ocwiyo piny.

¹² Kenyo Nowa doko okuro ndelo abirio to doko dhiro akuru; akuru rume k'odwoko.

¹³ Munyo Nowa jaoro 601 i ndelo marapena ma dwe marapena pi oyido othwo woko. Nowa ohalo woko gim'oumo ye to ŋiyo, aka neni wi lowo oyido othwo.

¹⁴ Ka ndelo piero ario g'abirio ma dwe mar'ario piny oyido othwo.

¹⁵ Kenyo Were owaco ri Nowa ni,

¹⁶ “Wok woko i ye gi dhako perin, wotin kodi mon pajo.

¹⁷ Wok gi winyin kodi ogwaŋe ŋey jowonywol joywore i piny.”

¹⁸ Ameno Nowa owok i ye gi cege kodi wote kodi mon pajo.

¹⁹ Ogwaŋe je kodi winyin jowok i ye i kitipin ma nger pajo.

Nowa miyo cowirok

²⁰ Kenyo Nowa ogeto ri Rwoth migam aka okwanyo acel kwoŋ kisi ogwaŋ gi winyo m'olony to waŋo je paka cowirok i wi migam.

²¹ Kur ma cowirok osangala Rwoth to waco i cunye ni, “Doko akibino kwoŋo piny kwoŋbedo ji, rupiri wok i thino pajo paro pajo reco. Doko akibino reyo kisi cwec makwo paka atimo.

²² Paka piny nitie, bino bedo ndir ma cwoyo gi ndir ma keco, ndir ma ŋico gi lietho, ndir ma ceŋ gi koth, odieceŋ gi wor.”