Cakirok 45 - KITAWO MALEŊ Catholic

Yozefu waco ri wutmin ŋata go obedo

¹ Kenyo Yozefu doko k'onyalo dhumirok ruwaŋ jom'oyido jocungo cegin gi go, aka oywak, “Miy kisi nyatoro wowoki bongan.” Ameno ongoye ŋat'obedo gi go munyo Yozefu nyuthere ri wutmin.

² Aka oywaki malo ma Jomisir jowinjo, aka wac otundo i cel pa kere pa Farawo.

³ Yozefu owaco ri wutmin ni, “An Yozefu; baba fodi kwo?” To wutmin jok'onyalo dwoko go, rupiri lworo omako jo swa ro bedo pere kenyo.

⁴ Ameno Yozefu owaco ri wutmin ni, “Mondo core win cegin bongan.” Jocore aka go owaco ni, “Abedo omin win Yozefu ma witana i Misir.

⁵ Aka onyo pama wikiri rembi kosa wopusere rupiri witana an ka, rupiri Were ooran yuwiy win botho kwo pa ji.

⁶ Me nyaka oro mar'ario ma kec i piny; bino bedo oro abic doko ma kilabedo fur kosa keco.

⁷ Aka Were ooran yuwiy win botho win i nger ma dhier me gi neno ni win gi nyikway win wikwo.

⁸ Ameno oyido k'obedo win ama wioran ka, to Were. Go okethan jadhum pa Farawo ma malo, aka aŋat'akuro piny pere gipi; abedo jadhum ma Misir gipi.”

⁹ “Redi win wikadhi malo bongi baba aka wiwaci rigo ni me gima wode Yozefu waco, ‘Were okethan jadhum ma Misir gipi; biye bongan m'ongoye galo.

¹⁰ Ilabedo iy'adec ma Gosen, kama cegin kodan in gi nyithindho perin, nyikwayin, mwendi, dhok, kodi kisi gim'initie gine.

¹¹ Aka kenyo anyalo konyin, rupiri fodi nitie oro abic ma kec ma bino aka akimiti in gi peco perin g'ogwaŋe wiriy kec.’ ”

¹² Yozefu omedere, “Onyo wijoje, kiri gi in Benyamin, winyalo neno ni me an won Yozefu.

¹³ Wiripo waco ri baba nger ma adwoŋ iye ka i Misir kodi gigipiny je ma witieko neno. Aka redi win wikel go ka.”

¹⁴ Kenyo opodho i ŋuti omin go Benyamin to ywak, aka Benyamin bende oywaki i ŋute.

¹⁵ Aka gi pigi waŋe ocwiyo lembi wutmin je. Rumacen ma gime wutmin jocako luwo gine.

¹⁶ Munyo wac otundo i ot pa Farawo ni wutmin Yozefu jobino, Farawo gi jodhum pere jowinjo maber.

¹⁷ Aka Farawo owaco ri Yozefu ni, “Waci ri wutmin in jowoyey punde pajo gi ŋano, jodok i piny Kanan.

¹⁸ Weyi jowokwany bajo gi pecin pajo aka jowodwoki ka. Abino miyo jo lowo maber loyo i Misir, aka jobino bedo gi ma romo maloyo ma kwo i iye.

¹⁹ Waci rijo bende jowoteri cawila madongo wok Misir ri mon gi nyithindho pajo maŋic jowogwey, aka jowobin gi bajo.

²⁰ Jokiri jowodew kwoŋ lim pajo ma jolaweyo cen rupiri gigipiny mabeyo i lowo ma Misir je bino bedo apajo.”

²¹ Wot Yakobo jotimo ameno; aka Yozefu omiyo jo cawila madongo, cungo kwoŋ cik pa Farawo to miyo jo cemo ma woth.

²² Ri kisi nyatoro aka ri joje omiyo nangin awira. To ri Benyamin omiyo feza 300 kodi nangin awira abic.

²³ Odhiro ri bamere punde apar ma jotiŋo gigipiny mabeyo wok Misir, kodi punde ma mon ma jotiŋo ŋano, mugat, kodi cemo ma woth.

²⁴ Osewila wutmin aka jodok peco bongi bajo Yakobo i Kanan; aka owaco rijo ni, “Wikiri widhaw i yo.”

²⁵ Ameno jokadho malo wok Misir aka jobino i piny Kanan bongi bajo Yakobo.

²⁶ Aka jowaco rigo ni, “Yozefu fodi kwo, aka go am'obedo jadhum ma lowo ma Misir gipi.” Cuny Yakobo opodho, rupiri k'onyalo yeyo.

²⁷ To munyo jowaco rigo wac pa Yozefu je, aka go oneno cawila madongo ma Yozefu oyido odhiro ma tiŋo go, cunye ogik;

²⁸ aka Yakobo owaco ni, “Wodan Yakobo fodi kwo! Me kende a gima d'anokway! Aripo kidho anen go kafodi akitho.”