Cakirok 44 - KITAWO MALEŊ Catholic

Kikopo m'orwenyo

¹ Yozefu omiyo ŋeca ma ot pere cik ni, “Poŋi kutiyin pa cwo no gi cemo madit ma jonyalo tiŋo, aka ikethi pesa pa kisi jacwo i wi kutiya pere

² Kethi kikopo paran ma feza i dhok kutiya pa jacwo mathin kodi pesa pere ma ŋano.” Aka ŋeca no otimo paka Yozefu owaco.

³ Tekin odikin bedo maler, Yozefu osewila jo gi punde pajo.

⁴ Munyo fodi jok'otundo bor, Yozefu owaco ri ŋeca pere ni, “Ay, iluwi cwo no aka k'inomaki jo, penji jo ni, ‘Raŋo wiculo bero gi raco? Raŋo wikwalo kikopo paran ma feza?

⁵ Raŋo wikwalo kikopo pa jadwoŋ paran ma feza? Meno a kikopo ma go medh'iye, aka oro ma ŋeyo gima ji jotemo muŋo. Witimo banja madwoŋ ma.’ ”

⁶ Munyo omako jo, oluda wac me rijo.

⁷ Jodwoko go ni, “Aŋo m'inyutho jadwoŋ k'iluwo ama? Wakwoŋere ni wakitimo nger gino.

⁸ Neni, pesa ma wanwaŋo i dhok kutiyin mawan, wadwoko rin wok i piny Kanan; t'onyo wakwal nedi feza kosa zahabu wok i ot pa jadwoŋ perin?

⁹ Jadwoŋ, k'acel kwoŋ wan onwaŋere nike nitie gine, ibino neko go, aka wan ma wadoŋ walalokere ŋecin perin.”

¹⁰ Ŋeca no odwoko ni, “Weyi wobedi paka iwaco ŋat'onwaŋ gine bino bedo ŋeca paran, aka win ma widoŋ wilangoye g'apuse.”

¹¹ Kenyo kisi jacwo olunyo kutiya pere piny, aka kisi jacwo oyawo kutiya pere.

¹² Ŋeca pa Yozefu orango, cako kodi kutiya pa ŋatadwoŋ to cowo kodi ŋatathin; aka kikopo onwaŋere i kutiya pa Benyamin.

¹³ Kenyo joyeco nangin pajo i rem, aka joyeyo ŋano i wi punde pajo to jogik i tindi madwoŋ.

¹⁴ Munyo Yuda gi wutmin jotundo i ot pa Yozefu, go oyido fodi nikenyo, aka jokule piny ruwaŋ go.

¹⁵ Yozefu owaco rijo ni, “Tim aŋo me ma witimo? Oyido wikuya ni nyatoro paka an nyalo ŋeyo nyaliŋliŋ gi gigipiny ma ji jotemo muŋo?”

¹⁶ Aka Yuda odwoko ni, “Aŋo ma wanowaci rin jadwoŋ? Aŋo ma wanoluw? Wanokwedere nedi? Were otieko kedho ŋecin perin; neni, wajoje makiweno ŋat'onwaŋ kikopo i kutiya pere, onyo pama wabedo ŋecin perin.”

¹⁷ Yozefu owaco ni, “Thodenge, wobedi bor kodan ni alatimo ameno! Nyaka jacwo m'onwaŋ kikopo i cinge ama labedo ŋeca paran; to riwin dok win bongi bawin i siem.”

Yuda ywakere ro Benyamin

¹⁸ Yuda okidho malo bongi Yozefu aka owaco ni, “A jadwoŋ paran, mondo weyi ŋeca perin woluwi ye wac i ithin, aka nge perin wokiri woliel kwoŋ ŋeca perin rupiri icale Farawo won.

¹⁹ Jadwoŋ paran ipenjo ŋecin perin ni, ‘Winitie gi bawin kosa omin win man?’

²⁰ Aka wadwokin ni, ‘Wanitie gi bawan, jacwo m'oti, kodi omin wan mathin, nyathi ma tiyo pere, aka omin go otho, to go kende am'odoŋ kwoŋ nyithindho pa min aka bamere omaro go swa.’

²¹ Kenyo iwaco ri ŋecin perin ni, ‘Keli win go piny bongan ŋey anen go gi waŋan.’

²² Wawaco rin ni jayac no kinyal eye bongi bamere, rupiri k'inotim, bamere nyalo tho.

²³ Kenyo iwaco ri ŋecin perin ni, ‘Kwanyowoko k'omin win mathin obino piny gi win, wikilanenan doko.’ ”

²⁴ “Munyo wadok bongi baba, wawaco rigo gim'iwaco.

²⁵ Aka munyo bawan owaco ni, ‘Gik win doko winyew cemo manok.’

²⁶ Wadwoko ni, ‘Wakinyali kidho piny. K'omin wan mathin okadhi gi wan, kenyo walakidho; rupiri kilayeyo wan neno jacwo no kwanyo woko k'omin wan mathin nitie gi wan.’

²⁷ Kenyo baba owaco riwan ni, ‘Wiŋeyo paka dhako paran Laker onywolo ran wotan ario kende.

²⁸ Acel otieko weyan. Ripo bedo ni ogwaŋe madudi joyeco go i muma, rupiri fodi akineno go wok cuka go kadhi.

²⁹ Ka winoter me bende kwoŋan to teko mako go, rem ma winokel ran dinyal nekan paka ati.’ ”

³⁰ “Riameno k'anogiki bongi baba m'ongoye jayac me, kenyo paka kwo pere otwere kwoŋ kwo pa jayac me,

³¹ ka go onen ni jayac ongoye bongi wan, gi tiyo pere rem ma wanokeli rigo dinyal neko go.

³² Maloyo mere aciko kwo paran ri baba ro jayac me k'awaco ni, ‘K'akidwoko gi go bongin, kenyo alatero apuse ruwaŋ baba i kwo paran je.’

³³ Onyo riameno akwayin, weyi adoŋ i kabedo pa jayac me paka ŋeca perin jadwoŋ; aka weyi jayac wodoki gi wutmin.

³⁴ Rupiri anyalo nedi dok bongi baba majayac me ongoye bongan? Alworo neno teko ma dinyal podho kwoŋ baba.”