Cakirok 4 - KITAWO MALEŊ Catholic

Kayin kodi Abel

¹ Onyo Adam obedo gi cege Eva aka ogamo iye to nywolo Kayin ka waco ama: “Gi kony pa Rwoth alimo wodan.”

² Eva doko onywolo wode man, Abel. Abel oyido obedo jakwath rombo, aka Kayin obedo jafur.

³ Rumacen ma hongo moro Kayin okelo olemo pere paka mic ri Rwoth,

⁴ aka Abel okelo nyathi rombo makayo, acel kwoŋ rombo pere to thumo, aka omiyo adec mabeyo paka mic. Rwoth ojolo mic pa Abel,

⁵ aka okwero mic pa Kayin. Ameno Kayin nge omako swa, to coko nyime.

⁶ Rwoth owaco ri Kayin ni, “Raŋo nge omakin? Raŋo icoko nyimin?

⁷ Kabedi oyido itimo gim'otire, dinyo ibwonjo. To rupiri itimo gimarac, reco gwaro thigo perin mito dhumin; t'iripo dhumo.”

⁸ Kayin owaco ri omin go Abel ni, “Wakadhi i ndelo.” Aka munyo jonitie i ndelo, Kayin omonjo omin to neko.

⁹ Kenyo Rwoth openjo Kayin ni, “Nikune Abel omin in?” Kayin odwoko ni, “An akuya; abedo jakur p'omin an?”

¹⁰ Kenyo Rwoth openjo ni, “Aŋo m'itimo? Remo p'omin in ywak ran wok i lowo.

¹¹ Aka onyo akwoŋo rin lowo m'oyawo dhoke to madho remo p'omin in wok i cingin.

¹² K'inotem furo cemo, lowo kilanyak gimoro je; aka ilangoye gi peco aka ilabedo jawoth kicar.”

¹³ Kayin owaco ri Rwoth ni, “Gir'acula paran pek swa ran ciro.

¹⁴ Neni, konon me irieman woko i lowo kodi wok ruwaŋin. Abino bedo jawoth kicar i piny aka kisi nyatoro m'orom kodan je bino nekan.”

¹⁵ Kenyo Rwoth owaco rigo ni, “K'ameno! Ka nyatoro moro je onekin, abino culo kwoŋe kwor dibirio.” Aka Rwoth oketho ranyuth kwoŋ Kayin ma gwoko kisi ŋat'oromo gi go wokiri woneki go.

¹⁶ Aka Kayin oeye woko ruwaŋ Rwoth to bedo i lowo m'ilwoŋo ni Nod yuwok ceŋ ma Eden.

Nyikway Kayin

¹⁷ Kayin obedo gi cege, aka ogamo iye to nywolo wode to cwoko nyinge ni Enoka; aka Kayin ogeto tindi madwoŋ to cwoko gi nyingi wode Enoka.

¹⁸ Enoka olimo wode m'ilwoŋo ni Irad; m'oyido ba Mehuyael. Mehuyael obedo ba Methusael, aka Methusael oyido ba Lamek.

¹⁹ Lamek oyido nitie gi mon ario, Ada kodi Zila.

²⁰ Ada onywolo Yabal m'obedo kwari ji ma jokwayo dhok aka jobedo i wema.

²¹ Nyingi omin Yabal oyido Yabul m'obedo kwari jower ma jogoyo tongol gi madundo.

²² Zila onywolo Tubal Kayin m'ocwogo gigipiny wok kwoŋ cumin. Nyamin Tubal Kayin oyido ilwoŋo ni Nama.

²³ Lamek owaco ri mon pere ni “Ada gi Zila, winjan win: Atieko neko jayac rupiri ogoyan.

²⁴ K'inen kwo abirio ama culo kwor ri nyatoro m'oneki Kayin, Kwo piero abirio g'abirio ama bino culo kwor ka nyatoro onekan.”

Seth kodi Enos

²⁵ Adam obedo gi cege kendo, to Eva nywolo wode to waco ni, “Were omiyan wodan ma culo waŋ Abel ma Kayin oneko.” Ameno ocwoko nyinge ni Seth.

²⁶ Seth bende olimo wode to cwoko nyinge ni Enos. I hongo no ama ji jocako lwoŋo nyingi Rwoth maleŋ i lamo.