Cakirok 38 - KITAWO MALEŊ Catholic

Kigana kwoŋ Yuda gi Tamar

¹ Otimere nike i hongo no Yuda oeye bongi wutmin go, to kidho bedo gi jal m'ilwoŋo ni Hira m'oyido wok i tindi Adulam.

² Kenyo Yuda onen'iye nyar Jakanan m'ilwoŋo ni Suwa; onywomo go to nindo gine.

³ Suwa ogamo iye to nywolo wode, aka ocwoko nyinge ni Eri.

⁴ Ogamo iye kendo to nywolo wode aka ocwoko nyinge ni Onan.

⁵ Kendo go ogamo iye to nywolo wode, aka ocwoko nyinge ni Sela. Go oyido nitie i Kezib munyo nywolo Sela.

⁶ Aka Yuda onywomo ri Eri wode makayo cege m'ilwoŋo ni Tamar.

⁷ To Eri, wod pa Yuda makayo oyido jakidakana ruwaŋ Rwoth, to Rwoth neko go.

⁸ Kenyo Yuda owaco ri wode Onan ni, “Kadhi inindi gi ciliendi omin in, aka itimi tic pa jacwo rigo, t'inywolo nyithindho r'omin in.”

⁹ To Onan niaŋ ni nyithindho oyido jok'obedi apere, ameno munyo go okidho to nindo gi ciliendi omin, ojayo piny, ŋey wokiri wonywol r'omin.

¹⁰ Aka gima go otimo k'osangala Rwoth to Rwoth neko go bende.

¹¹ Kenyo Yuda owaco ri Tamar ni, “Dok idoŋ citho i ot pa benin cuka wodan Sela odongi.” Owaco gime rupiri olworo ni Sela bende nyalo tho paka wutmin go. Ameno Tamar odok to bedo i ot pa bamere.

¹² I hongo moro cipa Yuda nyar Suwa otho. Munyo hongo ma ywak orumo, Yuda gi mere pere Hira ma Adulam jokidho Timina, kam'oyido oliel'iye rombo pere.

¹³ Aka munyo owaci ri Tamar ni ba cwore oyido kidho Timina lielo rombo pere,

¹⁴ olunyo nanga pere ma citho to umo waŋe gi kitambala to bedo i waŋkac ma donjo Enayim i yo ma kidho Timina; rupiri go oneno ni Sela oyido otieko odongo aka fodi k'omiy go i nywomirok.

¹⁵ Munyo Yuda oneno go, oparo ni manago malaya, rupiri go oyido oumo waŋe.

¹⁶ Okidho bonge i thengi royo to waco ni, “Biye anindi kodin.” Rupiri go oyido okuya ni manago ciwode. Tamar openjo go ni, “Aŋo m'ilamiyan ŋey inindi kodan?”

¹⁷ Yuda odwoko ni, “Aladhiro rin nyathi diel wok kwoŋ mwendi paran.” Tamar odwoko ni, “Singa ran gimoro cuka inodhir ran diel.”

¹⁸ Yuda openjo ni, “Ginaŋo m'anosinga rin?” Tamar odwoko ni, “Peta perin manitie iye nyingin gi thol mere kodi luth manitie i cingin.” Yuda omiyo go to nindo gine aka ogamo iye.

¹⁹ Tamar oay to kadho, aka ogonyo woko kitambala pere to ruko nanga pere ma citho.

²⁰ Yuda ooro mere pere Hira Jadulam gi nyathi diel, ŋey wojol gim'osinga wok i cingi dhako, to Hira k'onwaŋo go.

²¹ Hira openjo cwo ma kabedo no ni, “Nikune malaya m'oyido nitie i Enayim i thengi royo?” Cwo no jodwoko ni, “Fodi ongoye malaya m'obedo ka.”

²² Ameno Hira ogik bongi Yuda aka owaco rigo ni, “Akinwaŋo go, aka kiri cwo ma Enayim jowaco ni fodi ongoye malaya m'obedo kenyo.”

²³ Yuda odwoko ni, “Weyi go wokur gigipiny no, paka apere, ji jokiri jowonyer wan. Adhiro rigo diel me, t'ikinwaŋo go.”

²⁴ Munyo dwe ma romo adek okadho, owaci ri Yuda ni, “Ciwodin Tamar otimere pa malaya, aka onyo ogamo iye.” Yuda owaco ni, “Wodhi win go wowaŋ.”

²⁵ Munyo oyido iwodho go, Tamar odhiro wac ri ba cwore ni, “Won gigipiny me am'agamo gine iyan. Kaŋasa jo akinen ni apa ŋa, peta gi nyinge manitie i iye, thol kodi luth me.”

²⁶ Yuda oniaŋ kwoŋ jo aka owaco ni, “Go otire loyan, paka akimiyo go wodan Sela.” Aka Yuda doko k'onindo gine.

²⁷ Munyo hongo otundo rigo ma nywol, onwaŋere ni go oyido nitie gi ici ma rut.

²⁸ Aka munyo ŋedi ocakere gine, acel owodho cinge woko, aka jacol mon otweyo iye uzi m'obokere ka waco ni, “Me am'otelo wok.”

²⁹ To munyo odwoko cinge, neni omin go owok; aka jacol mon owaco ni, “Ameno apaka oturo yo pere woko!” Riameno ocwoki go ni Perez.

³⁰ Rumacen omin owok gi uzi m'obokere i cinge, aka ocwoki ni Zera.