Cakirok 31 - KITAWO MALEŊ Catholic

Yakobo ringo kwoŋ Laban

¹ Onyo Yakobo owinjo ni wot Laban oyido jowaco ni, “Yakobo otieko kwanyo lim pa bawan je; aka wok kwoŋ gim'oyido obedo apa bawan, olimo lim pere me je.”

² Yakobo bende oneno ni Laban oyido kiter go gi wor paka con mere.

³ Kenyo Rwoth owaco ri Yakobo ni, “Dok i piny pa bacere perin aka bongi wade perin. Abino bedo kodin.”

⁴ Ameno Yakobo odhiro wac ri Laker gi Leya ni joworom gine i sa kama mwendi pere oyido nitie iye.

⁵ Yakobo owaco rijo ni, “Atieko neno ni bawin kiteran gi wor paka oyido timo con mere. To Were pa baba oyido nikodan.

⁶ Wiŋeyo nike atieko tiyo ri bawin gi meni paran je,

⁷ kucel bawin otieko kwalan to wiro cul paran dipar. To Were k'oyeyo go miyan litho.

⁸ Kisi ka Laban owaco ni, ‘Diegi m'akol je bino bedo cul perin.’ Mwendi je jonywolo nyithindhi jo m'akol. Aka ka go owaco ni, ‘Diegi m'akor je bino bedo cul perin.’ Mwendi je jonywolo nyithindhi jo m'akor.

⁹ Were okwanyo woko mwendi kwoŋ bawin, aka omiyan jo.

¹⁰ I hongo ma mwendi joring'iye, atiŋo malo waŋan, aka aneno i lek nike ni wot diegi m'oyido joidho ma mon oyido jobedo makicin, akol kodi akor.

¹¹ Malaika olwoŋan i lek ni, ‘Yakobo’ Adwoko ni, ‘An e!’

¹² Aka go owaco ran ni, ‘Tiŋi waŋin malo akinen, wot diegi je ma joidho ma mon jobedo makicin, akol, kodi akor; rupiri atieko neno gima Laban timo rin je.

¹³ Abedo Were m'omenyere rin Bethel, kam'iwir'iye tele gi mo t'ikwoŋere ran. Ay malo, weyi piny me idok i piny m'inywol'iye.’ ”

¹⁴ Laker gi Leya jodwoko Yakobo ni, “Lokere nitie adec ma gir'alunja m'owey riwan i ot pa bawan?

¹⁵ Go tero wan pa jopath. Rupiri go otana wan, aka oyido oro pesa m'ocul riwan.

¹⁶ Lim me je ma Were okwanyo kwoŋ bawan jobedo amawan gi nyithindho mawan. Onyo pama tim gima Were owaco rin.”

¹⁷ Ameno Yakobo oay, aka oketho wote gi mon pere i wi ŋamin,

¹⁸ aka ocwayo dhok pere, kodi ogwaŋe pere je m'oyido go olimo i Padanaram kadho i piny Kanan bongi bamere Isaka.

¹⁹ Laban oyido okadho lielo rombo pere, aka Laker okwalo werin ma ot pa bamere.

²⁰ Yakobo owondo Laban Jaramean ma k'omiyo go ŋeyo nike go oyido yiko ringo.

²¹ Yakobo oringo gi kisi gimoro je ma go oyido nitie gine, aka oay to ŋado malawa Yufrete to como yupiny matendere ma Giliad.

Laban limo Yakobo

²² Munyo ndelo adek okadho, owaci ri Laban ni Yakobo okwale.

²³ Laban okwanyo cwo pere aka oluwo Yakobo ma ndelo abirio; aka oluwo go to rikere gine i piny matendere Giliad.

²⁴ To Were bino ri Laban Jaramean i lek wor, aka owaco rigo ni, “Gwokere m'ikiwaco ri Yakobo wac moro, maber kosa marac.”

²⁵ Laban oyombo Yakobo kama Yakobo oyido oketh'iye kambi pere wi got, aka Laban gi cwo pere joketho kambi pajo i piny matendere tendere Giliad.

²⁶ Laban openjo Yakobo ni, “Aŋo m'itimo, m'idiyan, aka itiŋo woko nyir paran pa mon m'omak i lweny.

²⁷ Raŋo iringo nyaliŋliŋ, t'idiyan, aka ikiwaco ran ŋey asewila in gi siemirok gi wer, kodi sasi gi tongol?

²⁸ Aka raŋo ikiyeyan cwiyo lembi nyikwayan gi nyir paran t'asewila jo. Onyo itieko timo gimiŋo.

²⁹ Anigi dwoŋ ma miyin litho; to Were pa benin oluwo kodan nyoro wor ka waco ni, ‘Gwokere m'ikiwaco ri Yakobo gimaber, kosa gimarac.’

³⁰ Aka onyo pama aŋeyo ni itieko kadho rupiri oyido iyenyo swa ot pa benin; to raŋo m'ikwalo werin paran?”

³¹ Yakobo odwoko Laban ni, “Rupiri lworo oyido omakan, rupiri oyido aparo ni inyalo mayan nyikin gi mbaka.

³² Ŋatimoro je m'inonwaŋ gi werin perin, kilakwo. Ruwaŋ cwo perin, cim gim'anitie gine m'obedo aperin aka ikwany.” Onyo Yakobo oyido okuya ni Laker oyido okwalo werin pa Laban.

³³ Laban odonjo i wema pa Yakobo, i wema pa Leya, kodi i wema pa ŋecin ario ma mon, to k'onwaŋo werin pere. Kenyo Laban owok i wema pa Leya, to kidho i wema pa Laker.

³⁴ Onyo Laker oyido okwanyo werin ma ot to ketho jo i mugowa ma kom pa ŋamia to bedo i wi jo. Laban orango i wema je to k'onwaŋo werin pere.

³⁵ Laker owaco ri bamere ni, “Weyi jadwoŋ paran wokiri womaki kodan nge nike akicungo ruwaŋin, rupiri royo pa mon nitie kwoŋan.” Ameno Laban orango, to k'onwaŋo werin pere ma ot.

³⁶ Kenyo Yakobo omako nge, aka osegeya Laban. Yakobo owaco ri Laban ni, “Banja paran aŋo? Reco paran aŋo, m'idwaran.

³⁷ Makada nende itieko rango i gigipiny paran, aŋo m'inwaŋo m'obedo aperin? Kethi ka ruwaŋ cwo paran kodi cwo perin, ŋey jowoyere i dier waj'ario.

³⁸ Ma oro piero ario oyido anitie kodin; megi rombo gi megi diegi perin iy gin k'opodho, aka akicamo wot rombo perin

³⁹ Kiri m'ogwaŋe madudi joyeco je akikelo rin, t'atero keŋ mere an won. Ibanja an m'okwal odieceŋ kosa wor.

⁴⁰ Meno apaka oyido anitie. Lietho owaŋan odieceŋ, to koyo nekan wor, aka akinyalo nindo.

⁴¹ Oro piero ario me je abedo i ot perin. Atiyo rin ma oro apar g'aŋwen ri nyikin ario, kodi oro aucel ri mwendi perin, to iwiro cul paran dipar.

⁴² Kabedi Were pa baba, Were pa Abraham aka Were pa Isaka k'obedo i thenge paran, adieri dinyo pama irieman thangalala. To Were oneno litho paran gi tic ma cingan, am'omiyo obwokin nyoro wor.”

Yakobo gi Laban jotimo cikirok

⁴³ Kenyo Laban odwoko ni, “Mon me jobedo nyir paran, nyithindho pajo jobedo aparan, mwendi me aparan, aka kisi gim'ineno je aparan. T'anotim aŋo ri nyir paran gi nyithindho pajo ma jonywolo?

⁴⁴ Ere pama biye, weyi watim cikirok, an kodin, aka weyi wobedi jakony i dier an kodin.”

⁴⁵ Ameno Yakobo okwanyo tele, aka oketho paka siro.

⁴⁶ Owaco ri cwo pere ni, “Coki win telin.” Kenyo jotero to jodhuro kanyacel, to jocemo i ŋete.

⁴⁷ Laban olwoŋo kenyo ni Yegar Sahadutha aka Yakobo olwoŋo ni Galed.

⁴⁸ Laban owaco ri Yakobo ni, “Kidhur telin me bino bedo gima poyo wan ndelo me.” Riameno olwoŋi kabedo no ni Galed.

⁴⁹ Laban doko owaco ni, “Weyi Rwoth wokethi waŋe kwoŋ wan ka wangoye kanyacel.” Ameno kabedo no olwoŋi ni Mizipa.

⁵⁰ Laban omedere waco ni, “K'inocandi nyir paran, kosa k'inonywom mon man, makada nende ongoye ŋata nitie gi wan poyi nike Were neno wan.

⁵¹ Neni kidhur telin ee kodi siro, m'atieko ketho i dier an kodin.

⁵² Kidhur telin gi siro me jobedo gir'apoya. Akibino kalo ka monjin, aka ikiripi kalo ka monjan.

⁵³ Were pa Abraham, Were pa Nahor, Were pa bajo wothum riwan banja.” Kenyo Yakobo okwoŋere i nyingi Were pa Isaka bamere.

⁵⁴ Yakobo omiyo cowirok wi got aka olwoŋo wade pere cemo, aka jocemo to jonindo wi got.

⁵⁵ Yawere odikin, Laban ocwiyo lembi nyikwaye gi nyir pere, omiyo jo silwany, to go dok peco.